រដ្ឋបាល​ព្រៃឈើ​ខេត្ត ដាំ​ដើម​ធ្នង់ ៧៥ ដើម ជុំវិញ​រង្វង់​មូល​ទូក ដើម្បី​ទាក់ទាញ​ភ្ញៀវទេសចរ​

ដោយៈ ទេ​ពក​ង្រី / កំពង់ឆ្នាំងៈ នៅ​ព្រឹក​ថ្ងៃទី​២៦ ខែមករា ឆ្នាំ​២០២១ នេះ រដ្ឋបាល​ព្រៃឈើ ខេត្តកំពង់ឆ្នាំង បាន​ដាំ​ដើម​ធ្នង់ ចំនួន ៧៥ ដើម នៅ​ជុំវិញ​រង្វង់​មូល​ទូក ស្ថិតនៅក្នុង​ទឹកដី សង្កាត់​ខ្សា​ម ក្រុង​កំពង់ឆ្នាំង ដើម្បី​ផ្ដល់​ជា​ម្លប់ និង​សម្រាប់​ភ្ញៀវទេសចរ មកលេង​កម្សាន្ត នៅក្នុង​តំបន់​អភិវឌ្ឍន៍​ថ្មី​នេះ​។​

​មន្ត្រីរដ្ឋបាល​ព្រៃឈើ​កំពង់ឆ្នាំង​ម្នាក់ ជា​អ្នកចង្អុល​ការ ឲ្យ​ក្រុមកម្មករ​ដាំ​ដុះ​ដើម​ធ្នង់ ខាងលើនេះ បាន​និយាយ​ឲ្យ​ដឹងថាៈ ដើម​ធ្នង់​ចំនួន ៧៥ ដើម​នេះ គឺ​លោក ថោង វី​រ៉ា​វុទ្ធី នាយ​ខណ្ឌ​រដ្ឋបាល​ព្រៃឈើ​កំពង់ឆ្នាំង បាន​ជួយឧបត្ថម្ភ ដល់​រដ្ឋបាលខេត្ត ដើម្បី​យកមក ដាំ​ដុះ នៅ​ជុំវិញ​បរិវេណ​រង្វង់​ទូក​នេះ ដែល​នឹងត្រូវ​ប្រារព្ធ​ធ្វើ ពិធីបុណ្យ​ក្រុង​ពាលី នា​ព្រឹក​ថ្ងៃស្អែក ថ្ងៃទី​២៧ ខែមករា ដើម្បី​ឆ្លង​សមិទ្ធផល​ថ្មី មួយ​នេះ​។​

​លោក ជុំ យ៉ង ជា​ប្រជាពលរដ្ឋ រស់នៅ​ភូមិ​ទី​៥ សង្កាត់​ខ្សា​ម ក្រុង​កំពង់ឆ្នាំង នៅ​ព្រឹក​ថ្ងៃទី ២៦ មករា​នេះ បានលើកឡើង​ថាៈ ក្នុងនាម​លោក ជា​ប្រជាពលរដ្ឋ​ម្នាក់ សូម​កោតសរសើរ ដល់​រដ្ឋបាលខេត្ត​កំពង់ឆ្នាំង ដែល​បាន​យកចិត្តទុកដាក់ កសាងឡើង​នូវ​សមិទ្ធផល​ថ្មី មួយ​នេះ ដែល​ធ្វើ​ឲ្យ​ប្រជាពលរដ្ឋ គាំទ្រ និង​ស្វាគមន៍ គ្រប់គ្នា​។​

​ជាមួយគ្នានេះដែរ លោក​ក៏​សូម​អំពាវនាវ​ដល់ ប្រជាពលរដ្ឋ​ទាំងអស់ សូម​ចូលរួម​ធ្វើ អនាម័យ សំអាត​ជុំវិញ​រង្វង់​មូល​ស្តូប​នេះ ទាំងអស់គ្នា និង​សូមកុំ​ចោល សំរាម​ពាសវាល ពាសកាល ដើម្បីឱ្យ​សមិទ្ធផល​ថ្មី​មួយ​នេះ មាន​បរិស្ថាន​ល្អ ស្វាគមន៍​ភ្ញៀវទេសចរ ដែល​មកលេង​កម្សាន្ត​នៅក្នុង​ទឹក ដី​ខេត្តកំពង់ឆ្នាំង ។​

​សូមបញ្ជាក់ថាៈ ចំណុច​រង្វង់​មូល​ទូក សមិទ្ធផល​ថ្មី​នេះ គឺជា​ចំណុច​ផ្លូវ​ប្រសព្វ ចំនួន ៦​ខ្សែ ហើយ​នៅ​ផ្នែក​ខាងកើត ជាប់​គ្នា​នេះ គឺជា​កំពង់ផែ​ថ្មី របស់​ក្រុង​កំពង់ឆ្នាំង ដែលមាន ប្រជាពលរដ្ឋ ឆ្លងកាត់​ចុះឡើង តាម​សាឡាង​ឆ្លងទន្លេ ទៅកាន់​ទឹកដី​ស្រុក​កំពង់លែង និង​ខេត្តកំពង់ធំ ហើយក៏​ជា​តំបន់​ទេសចរណ៍ ថ្មី​មួយទៀត ដែល​រដ្ឋ បាល​ខេត្តកំពង់ឆ្នាំង កំពុងធ្វើការ​អភិវឌ្ឍ​ន៍ ពង្រីក​វិសាលភាព​ទេសចរណ៍ នៅតាម​មាត់ទន្លេ​សម្រាប់​លើក ស្ទួយ​ជីវភាព រស់នៅ​របស់​ប្រជាពលរដ្ឋ ឲ្យ​កាន់តែ​ប្រសើរឡើង ក្រោម​ការដឹកនាំ​ដ៏​ឈ្លាសវៃ របស់​ប្រមុខ​រាជរដ្ឋាភិបាល​កម្ពុជា​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular