Home ព័ត៌មានសំខាន់ៗ ប្រកាស​ជា​ផ្ល...

ប្រកាស​ជា​ផ្លូវការ​នូវ​គណបក្ស “​កែទម្រង់​កម្ពុជា​”

ដោយៈ​មុនី​រ័ត្ន​/​ភ្នំពេញៈ​លោក​អ៊ូ​ច័ន្ទ​រ័ត្ន​អតីតមន្ត្រី​ជាន់ខ្ពស់​នៃ​អតីត​គណបក្ស​សង្គ្រោះ​ជាតិ​បានប្រកាស​ជា​ផ្លូវការ​នូវ​ឈ្មោះ​គណបក្ស​ដែល​បង្កើត​ថ្មី​គឺ​គណបក្ស​“​កែទម្រង់​កម្ពុជា​”​ដែល​នឹងដាក់​ពាក្យស្នើសុំ​បង្កើត​ទៅ​ក្រសួងមហាផ្ទៃ​ក្នុង​សប្តាហ៍​នេះ​។គណបក្ស​ថ្មី​នេះ​គឺ​បង្កើតឡើង​ដោយ​ក្រុម​អតីតមន្ត្រី​ជាន់ខ្ពស់​នៃ​អតីត​គណបក្ស​សង្គ្រោះ​ជាតិ​ឮ​ពោលគឺ​ដោយសារតែ​ពួកគេ​មិនមាន ជំនឿ​ថា អតីត​គណបក្ស​សង្គ្រោះ​ជាតិ អាច​រស់​ឡើងវិញ​បានឡើយ​។​

លោក​អ៊ូ​ច័ន្ទ​រ័ត្ន​បាន​ប្រាប់​រស្មី​កម្ពុជា​នៅ​ថ្ងៃទី​២៦​ខែមករា​នេះ​ថា​ទាក់ទង​ការបង្កើត​គណបក្ស​ថ្មី​នេះ​បានសម្រេច​យកឈ្មោះ ជា​ផ្លូវការ​ហើយ គឺ​គណបក្ស “​កែទម្រង់​កម្ពុជា​” (​គ​.​ក​.​ក , CRP) ដោយ​កំពុងតែ​រៀបចំ​បញ្ជី​និង​ឯកសារ​ដើម្បី​ដាក់​ទៅ ក្រសួងមហាផ្ទៃ​ឲ្យ​បាន​មុន​ដំណាច់​ខែមករា​នេះ​។ ចំណែក​រូប​សញ្ញា​គណបក្ស​“​កែទម្រង់​កម្ពុជា​” គឺមាន​រូប​ព្រះអាទិត្យ និង​ក្បាលដំរី​បួង​ផ្កាឈូក​បី​ដើម​។

លោក​បាន​បញ្ជាក់ថា ការបង្កើត​គណបក្ស​ថ្មី​នេះ គឺមាន​អតីតមន្ត្រី​ជាន់ខ្ពស់ នៃ​អតីត​គណបក្ស​សង្គ្រោះ​ជាតិ​មួយចំនួន បានមក​ចូលរួម​ជាមួយ​។ ប៉ុន្តែ​នៅក្នុង​ការបង្កើត​គណបក្ស​ថ្មី​នេះ លោក​មិនមែនជា​បេក្ខភាព​ប្រធាន​គណបក្ស​នោះទេ ពីព្រោះ​មាន​បុគ្គល​ដែល​អាច​នឹង​ចេញមក​ដឹកនាំ​គណបក្ស​ថ្មី​នេះ​។​

ទាក់ទង​ព័ត៌មាន​ដែលថា នឹងមាន​ការអញ្ជើញ​លោក​កឹម សុខា ចូលរួម​ជាមួយ​គណបក្ស​ថ្មី​នេះ លោក អ៊ូ ច័ន្ទ​រ័ត្ន បាន​បញ្ជាក់ថា លោក​មិន​បានធ្វើ​ទំនាក់ទំនង​ជាមួយ​លោក​កឹម សុខា ទេ ពីព្រោះ​វា​ប៉ះពាល់​ផ្លូវច្បាប់ ហើយ​លោក​កឹម សុខា មិនមាន​ចេតនា​បង្ហាញ​ពី​ជំហរ​របស់លោក​ក្នុង​រឿង​ទាំងនេះ​ទេ​។ ប៉ុន្តែ​លោក​បានប្រកាស​ហើយ​ថា​មិន​ប៉ះពាល់​ឈ្មោះ លោក​កឹម សុខា នោះទេ​។ ប៉ុន្តែ​ក្នុងករណី​ណា​ដែល​លោក​កឹម សុខា មានលទ្ធភាព​ចេញមក​ដឹកនាំ​នយោបាយ​វិញ ឬមួយ​ក៏​ខាង​ភាគី​លោក​សម រង្ស៊ី អាចមាន​លទ្ធភាព​ចេញមក​ដឹកនាំ​នយោបាយ​វិញ គណបក្ស​“​កែទម្រង់​កម្ពុជា​” នឹង​ផ្អាក​សកម្ម​ភាពមិន​ចូលរួម​ប្រកួតប្រជែង​នៅក្នុង​ការបោះឆ្នោត​នោះទេ​។​

សូមជម្រាបថា លោក អ៊ូ ច័ន្ទ​រ័ត្ន អតីត​តំណាងរាស្ត្រ នៃ​អតីត​គណបក្ស​សង្គ្រោះ​ជាតិ​ទទួលបាន​នីតិសម្បទា ឡើងវិញ​កាលពី​ថ្ងៃទី​១៩ ខែមីនា ឆ្នាំ​២០១៩​។ ក្រៅពីនេះ ក៏មាន​អតីតមន្ត្រី​ជាន់ខ្ពស់​ចំនួន​១២​រូប​ផ្សេងទៀត​ក៏​ទទួល បាន​នីតិសម្បទា​ឡើងវិញ​ដែរ​។ ក្នុងចំណោម​អ្នកទទួលបាន​នីតិសម្បទា​ឡើងវិញ​នោះ គឺមាន​លោក​ជីវ កត្តា បាន​បង្កើត​គណបក្ស​ខ្មែរ​ស្រឡាញ់​ជាតិ , លោក​រៀល ខេ​ម​រិ​ន្ទ្រ បង្កើត​គណបក្ស​ខ្មែរ​អភិរក្សនិយម​។ ចំណែក​លោក​គង់ គាំ បាន​ទៅ​ចូលរួម​ជាមួយ​គណបក្ស​ឆន្ទៈ​ខ្មែរ ដែល​បង្កើតឡើង​ដោយ​លោក​គង់ ម៉ូ​នី​កា កូនប្រុស​បង្កើត​របស់​លោក​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular