Home ព័ត៌មានសំខាន់ៗ ក​យ​កា​និង​ធន...

ក​យ​កា​និង​ធនាគារជាតិ ប្រកាស​ដាក់​ឲ្យ​ដំណើរការ​ជា​ផ្លូវកា​រ‍​‍​‍​‍​‍​‍​‍​‍​‍​ប្រព័ន្ធ “​រី​ធែ​ល​ផេ​”

​ដោយៈ​សុផល​/ភ្នំពេញ​: ទីភ្នាក់ងារ​សហប្រតិបត្តិ​ការ​អន្តរជាតិ​កូរ៉េ ​(​ក​យ​កា​) និង​ធនាគារជាតិ​នៃ​កម្ពុជា​នៅ​ថ្ងៃទី​២៦​ខែមករា​នេះ​បានប្រកាស​ដាក់​ឲ្យ​ដំណើរការ​ជា​ផ្លូវកា​រ‍​‍​‍​‍​‍​‍​‍​‍​‍​ប្រព័ន្ធ “​រី​ធែ​ល​ផេ​”​។ ហេដ្ឋារចនាសម្ព័ន្ធ​ហិរញ្ញវត្ថុ​ដ៏​សំខាន់​នេះ ដើរតួ​យ៉ាងសំខាន់ ក្នុងការ​ចូលរួមចំណែក អភិវឌ្ឍន៍​សេដ្ឋកិច្ច តាមរយៈ​ការ​ផ្តល់នូវ ការទូទាត់​ប្រកបដោយ សុវត្ថិភាព ប្រសិទ្ធភាព និង ជា​ឧបករណ៍​ទូទាត់​ដោយ​រហ័ស សម្រាប់​ការទូទាត់​ពាណិជ្ជកម្ម​។​

​បណ្ឌិត ផាក ហ៊ឹង​ខ្យ​ង់ (Park Heung-kyeong) ឯកអគ្គរដ្ឋទូត​នៃ​សាធារណរដ្ឋ​កូរ៉េ ប្រចាំ​នៅ​កម្ពុជា លោកស្រី នាវ ច័ន្ទ​ថា​ណា ទេសាភិបាលរង ធនាគារជាតិ​នៃ​កម្ពុជា និង លោក នោ​ហ្យ​ន់ ជូន​(RhoHyun Jun)​ប្រធាន​តំណាង​ទីភ្នាក់ងារ​សហប្រតិបត្តិ​ការ​អន្តរជាតិ​កូរ៉េ​(​ក​យ​កា​)​ប្រចាំ​នៅ​កម្ពុជា​បាន​អញ្ជើញ​ចូលរួម​ក្នុង​ប្រកាស​ដាក់​ឲ្យ​ដំណើរការ​ជា​ផ្លូវកា​រ‍​‍​‍​‍​‍​‍​‍​‍​‍​ប្រព័ន្ធ “​រី​ធែ​ល​ផេ​” ព្រមជាមួយ​អ្នកតំណាង​មកពី​សមាគម​ធនាគារ​នៅ​កម្ពុជា (ABC) តំណាង​មកពី​សមាគម​មីក្រូហិរញ្ញវត្ថុ​កម្ពុជា​(CMA) និង​ធនាគារ និង​មីក្រូហិរញ្ញវត្ថុ ។​

​សូមជម្រាបថា​៖​សាធារណរដ្ឋ​កូរ៉េ និង​ព្រះរាជាណាចក្រ​កម្ពុជា បាន​ព្រមព្រៀង​ធ្វើការ​រួមគ្នា​លើ គម្រោង​ការពង្រឹង​ប្រព័ន្ធ​ទូទាត់​ជាតិ​ក្នុងប្រទេស​កម្ពុជា ពី​ឆ្នាំ​២០១៥ ដល់​ឆ្នាំ​២០២០ ដោយ​ផ្តល់​ជំនួយឥតសំណង​ចំនួន ៨ លាន​ដុល្លារ (​ប្រាំបី​លាន​ដុល្លារ​អាមេរិក​) តាមរយៈ​ទីភ្នាក់ងារ​សហប្រតិបត្តិ​ការ​អន្តរជាតិ​កូរ៉េ (​ក​យ​កា​-KOICA) សម្រាប់​ការធ្វើផែនការ ការកំណត់​អត្តសញ្ញាណ​/​ការបញ្ជាក់ ការ​រចនា ការអនុវត្ត ការសាកល្បង និង​ការបង្កើត​ប្រព័ន្ធ​ទូទាត់​ចំនួន​៣៖ ប្រព័ន្ធ​ផ្ទេរ​មូលនិធិ​ភ្លាមៗ (real-time fund transfer “RFT”) ប្រព័ន្ធ​ទូទាត់​ចល័ត​(mobile payment system “MPS”) និង​ប្រព័ន្ធ​ទូទាត់​តាមរយៈ​QR​កូដ (QR-code payment system “QPS”) ។ វា​ក៏​រួមបញ្ចូល ប្រព័ន្ធ​ផាត់ទាត់​អេ​ឡិច​ត្រូ​និ​ច (electronic clearing system “ECS”) ផងដែរ​។​

​ប្រព័ន្ធ​ទូទាត់​ថ្មី ឬ “​ប្រព័ន្ធ​រី​ធែ​ល​ផេ” ត្រូវបាន​បង្កើតឡើង ក្រោម​ការផ្តល់​ជំនួយឥតសំណង​ពី ទីភ្នាក់ងារ​សហប្រតិបត្តិ​ការ​អន្តរជាតិ​កូរ៉េ (​ក​យ​កា​-KOICA) ។​ប្រព័ន្ធ​រី​ធែ​ល​ផេ​គឺជា​ហេដ្ឋារចនាសម្ព័ន្ធ​ហិរញ្ញវត្ថុ​ដ៏​សំខាន់ ដែល​ដើរតួ​យ៉ាងសំខាន់ ក្នុងការ​ចូលរួមចំណែក អភិវឌ្ឍន៍​សេដ្ឋកិច្ច តាមរយៈ ការ​ផ្តល់នូវ ការទូទាត់​ប្រកបដោយ សុវត្ថិភាព ប្រសិទ្ធភាព និង ជា​ឧបករណ៍​ទូទាត់​ដោយ​រហ័ស សម្រាប់​ការទូទាត់​ពាណិជ្ជកម្ម​។ លើសពីនេះ​ទៀត​ធនាគារជាតិ​នៃ​កម្ពុជា បាននិងកំពុង​ធ្វើការ​លើ​ការអភិវឌ្ឍ​ប្រព័ន្ធ​រី​ធែ​ល​ផ‍េ​ដែលជា​អាទិភាព​មួយ ដើម្បី​កាត់បន្ថយ​ការប្រើប្រាស់​សាច់ប្រាក់​និង​ជំរុញ​ការប្រើប្រាស់​ការទូទាត់​តាម​អេឡិចត្រូនិក​ក្នុង​សេដ្ឋកិច្ច ក៏ដូចជា​ជំរុញ​ការដាក់បញ្ចូល​ហិរញ្ញវត្ថុ ស្របតាម យុទ្ធសាស្ត្រ​អភិវឌ្ឍន៍​វិស័យ​ហិរញ្ញវត្ថុ​របស់​រដ្ឋាភិបាល​។​

​តាមរយៈ “​ប្រព័ន្ធ​រី​ធែ​ល​ផេ​” នៅពេល​អ្នក​ផ្ញើ​ប្រាក់​ផ្ញើ​ប្រាក់ (​រៀល​ឬ​ដុល្លារ​) ដោយ​ទៅ​ធនាគារ​ដោយផ្ទាល់ ឬ​ប្រើប្រាស់​សេវា​ធនាគារ​ចល័ត​លុយ​ត្រូវ​បានដាក់​ទៅក្នុង​គណនី​ធនាគារ របស់​អ្នកទទួល​ក្នុង​រយៈពេល​តែ​ពីរ​បី​វិនាទី​ប៉ុណ្ណោះ​។ សេវាកម្ម​នេះ​បានអនុញ្ញាត​ឲ្យ​យើង បង់ថ្លៃ​ឈ្នួល ថ្លៃ​ថែទាំ និង​វិក័យប័ត្រ​ប្រើប្រាស់ ដែល​កាត់បន្ថយ​ហានិភ័យ នៃ​ការបាត់បង់​សាច់ប្រាក់ ឬ​ចោរលួច​។​

​បណ្ឌិត ផាក ហ៊ឹង​ខ្យ​ង់ (Park Heung-kyeong) ឯកអគ្គរដ្ឋទូត​នៃ​សាធារណរដ្ឋ​កូរ៉េ មានប្រសាសន៍ថា ប្រព័ន្ធ​ទូទាត់​នេះ មាន​អត្ថប្រយោជន៍​យ៉ាងច្រើន​ទាក់ទង​នឹង​ការជំរុញ​សេដ្ឋកិច្ចជាតិ​តាមរយៈ​ការកាត់បន្ថយ​ចំណាយ​ប្រតិបត្តិការ​នៅក្នុង​ទីផ្សារ​ហិរញ្ញវត្ថុ​។​ដោយ​ដឹង​អំពី​សារៈសំខាន់​នៃ​ប្រព័ន្ធ​បែបនេះ​ធនាគារជាតិ​នៃ​កម្ពុជា​និង​កូយ​កា​បានធ្វើការ​រួមគ្នា​យ៉ាង​ជិតស្និទ្ធ​ដើម្បី​បង្កើត​ការទូទាត់ Retail Pay​ប៉ុន្មាន​ឆ្នាំ​កន្លងមកនេះ​។ ពិធី​បើក​ជា​ផ្លូវការ​ថ្ងៃនេះ​គឺជា​លទ្ធផល​នៃ​កិច្ចខិតខំ​ប្រឹងប្រែង​និង​កិច្ចសហប្រតិបត្តិការ​ដ៏​អស្ចារ្យ​រវាង​ភាគី​ទាំងពីរ​។​

​លោក​បាន​បន្តថា​បន្ទាប់​ពី​ភ្ជាប់​ចំណង​ទំនាក់ទំនង​ការទូត​ឡើងវិញ​នៅ​ឆ្នាំ​១៩៩៧ ប្រទេស​កម្ពុជា និង​សាធារណរដ្ឋ​កូរ៉េ មានការ​ជឿនលឿន​ទៅមុខ​គួរឱ្យកត់សម្គាល់​ក្នុង​ទំនាក់ទំនង​ទ្វេភាគី​លើ​វិស័យ​សហប្រតិបត្តិការ​នយោបាយ​សេដ្ឋកិច្ច ការអភិវឌ្ឍ និង​វប្បធម៌​ពេញលេញ​។​

​ឯកអគ្គរដ្ឋទូត​នៃ​សាធារណរដ្ឋ​កូរ៉េ បន្តថា បច្ចុប្បន្ន​ប្រទេស​កម្ពុជា​គឺជា​ប្រទេសមួយ​ក្នុងចំណោម​ប្រទេស​ដៃគូ​សំខាន់ៗ​របស់​ប្រទេស​កូរ៉េ​ទាក់ទង​នឹង​កម្មវិធី ODA ។ នៅ​ដើម​ទសវត្ស​ឆ្នាំ ១៩៩០ ជំនួយឥតសំណង​រប​ស់​កូរ៉េ​ដល់​ប្រទេស​កម្ពុជា​បានចាប់ផ្តើម​ក្នុង​ទ្រង់ទ្រាយ​តូច​មួយ​ភាគច្រើន​ជា​ទម្រង់​ជំនួយ​មនុស្សធម៌​។ ប៉ុន្តែ​ទំហំ​ជំនួយ​នេះ​បាន​កើនឡើង​គួរឱ្យកត់សម្គាល់​រហូត​ដល់ ៧១ លាន​ដុល្លារ​ក្នុង​ឆ្នាំ ២០១៩ គ្របដណ្ដប់​លើ​វិស័យ​សុខាភិបាល អប់រំ ហិរញ្ញវត្ថុ និង​បច្ចេកវិទ្យា​ព័ត៌មានវិទ្យា​។​

​លោក​ជឿជាក់ថា​ពិធី​បើក​ជា​ផ្លូវការ​នូវ​ប្រព័ន្ធ​រី​ថេ​ល​ផេ​នាពេល​បច្ចុប្បន្ននេះ​គឺជា​ព្រឹត្តិការណ៍​ដ៏​សំខាន់​មួយ​ទាក់ទង​នឹង​ការច្នៃប្រឌិត​ថ្មី​ប្រព័ន្ធ​ទូទាត់​ប្រាក់ ការធ្វើឱ្យ​ប្រសើរឡើង​នូវ​ប្រតិបត្តិការ​អន្តរ​ធនាគារ បង្កើន​ប្រសិទ្ធភាព​ប្រតិបត្តិការ​និង​ធ្វើឱ្យ​ការផ្ទេរ​ប្រាក់​កាន់​តែមាន​សុវត្ថិភាព​។ ក្នុងពេល​នៃ​ការរីក​រាលដាល​នៃ​ជំងឺ​រាតត្បាត​កូ​វីដ​-១៩ រី​ថេ​ល​ផេ អាចជួយ​ការពារ​ការរីក​រាលដាល​នៃ​វីរុស​តាមរយៈ​ការផ្តល់សេវា​កម្មទ​ទាត់​ប្រាក់​តាម​ឌីជីថល ។​

​លោក​សង្ឃឹមថា​ប្រព័ន្ធ​រី​ថេ​ល​ផេ​និង​ប្រព័ន្ធ​ទូទាត់​ប្រាក់​ផ្សេងទៀត​នឹង​បង្ហាញ​ពី​ការពង្រឹង​គ្នា​ទៅវិញទៅមក​បង្កើតឱ្យមាន​ប្រសិទ្ធិភាព​រួមគ្នា​។ កត្តា​នេះ នឹង​ជា​មាគ៌ា​ដ៏​មានតម្លៃ​ក្នុងការ​អភិវឌ្ឍ​វិស័យ​ហិរញ្ញវត្ថុ​នៅ​កម្ពុជា​និង​ការធ្វើសមាហរណកម្ម​ស៊ីជម្រៅ​របស់​កម្ពុជា​ទៅក្នុង​វិស័យ​ហិរញ្ញវត្ថុ​នៃ​សហគមន៍​សេដ្ឋកិច្ច​អាស៊ាន​។​

​លោក​ឯកអគ្គរដ្ឋទូត​បានបញ្ជាក់​ជាថ្មី​នូវ​ការប្តេជ្ញាចិត្ត​ខ្ពស់​របស់​ប្រទេស​កូរ៉េ​ចំពោះ​ការអភិវឌ្ឍន៍​សេដ្ឋកិច្ចសង្គម​របស់​ប្រទេស​កម្ពុជា​និង​ភាពរុងរឿង​របស់​ប្រជាជន​កម្ពុជា​។​កូយ​កា​នឹង​បន្ត​ធ្វើជា​ដៃគូ​ដែល​អាច​ទុកចិត្តបាន​និង​មាន​ប្រសិទ្ធិភាព​សម្រាប់​កិច្ចសហប្រតិបត្តិការ​ជាមួយ​ប្រទេស​កម្ពុជា​។​

​លោកស្រី នាវ ច័ន្ទ​ថា​ណា ទេសាភិបាលរង​ធនាគារជាតិ​នៃ​កម្ពុជា បាន​ថ្លែងថា ប្រព័ន្ធ “​រី​ធែ​ល​ផេ” ជា​ឧបករណ៍​ដ៏​សំខាន់​ថ្មី​មួយ​នៅក្នុង​ប្រព័ន្ធ​ទូទាត់​ទំនើប​នៅ​កម្ពុជា​។​ប្រព័ន្ធ​ទូទាត់​ដើរតួនាទី​យ៉ាងសំខាន់​ក្នុងការ​គាំទ្រ​និង​លើក​កម្ពស់​ការអភិវឌ្ឍ​សេដ្ឋកិច្ច​ដោយ​ផ្តល់​ហេដ្ឋារចនាសម្ព័ន្ធ​ហិរញ្ញវត្ថុ​ប្រកបដោយ​ប្រសិទ្ធភាព​និង​សុវត្ថិភាព​ដើម្បី​ជួយ​​សម្រួល​ដល់​ការផ្ទេរ​មូលនិធិ​និង​ការទូទាត់​សម្រាប់​សកម្មភាព​ពាណិជ្ជ​កម្ម​។ ទន្ទឹមនឹងនេះ​ប្រព័ន្ធ​ទូទាត់​ក៏​ជា​ឧបករណ៍​ដ៏​មាន​ប្រសិទ្ធិភាព​មួយ​ដែល​ត្រូវបាន​ប្រើ​ដើម្បី​ព​ន្លឿ​ន​ការរួមបញ្ចូល​ហិរញ្ញវត្ថុ​តាមរយៈ​ការប្រើប្រាស់​ហ្វី​ន​ថិ​ច ​(Fintech)​ ថ្មី​ដើម្បី​ពង្រីក​ការផ្តល់សេវា​ទូទាត់​តាម​អេឡិចត្រូនិក​ដល់​ប្រជាជន​នៅតាម​ជនបទ​ដែល​ធនា​គារ​ទៅ​មិន​ដល់​។

​អ្វីដែល​សំខាន់បំផុត​ខណៈពេលដែល​ប្រទេស​កម្ពុជា​និង​ពិភពលោក​ត្រូវបាន​រង​ផលប៉ះពាល់​ដោយ​ការផ្ទុះ​ឡើង​នៃ Covid19​និង​វិធាន​ការការពារ​ដូចជា​ច​ត្តា​ឡី​ស័ក គម្លាត​បុគ្គល ត្រូវបាន​អនុវត្ត​នោះ ប្រព័ន្ធ​ទូទាត់​ប្រាក់​បានរួម​ចំណែក​យ៉ាងច្រើន​ដល់​ការបង្កើន​មធ្យោបាយ​ទូទាត់​តាម​អេឡិចត្រូនិក​និង​កាត់បន្ថយ​ការប្រើប្រាស់ សាច់ប្រាក់​ដែល​អាចជា​ប្រភព​នៃ​ការរីក​រាលដាល​មេរោគ​។​

​លោកស្រី​ទេសាភិបាលរង​បាន​លើកឡើងថា ដោយ​មើលឃើញ​ពី​សារៈសំខាន់​នៃ​ប្រព័ន្ធ​ទូទាត់​ធនាគារជាតិ​នៃ​កម្ពុជា​ក្នុងនាម​ជា​អាជ្ញាធរ​បាន​ខិតខំ​ប្រឹងប្រែង​យ៉ាងខ្លាំង​ក្នុងការ​អភិវឌ្ឍ​រៀបចំ​និង​ត្រួតពិនិត្យ​ប្រព័ន្ធ​ទូទាត់​ដើម្បី​លើកកម្ពស់​សុវត្ថិភាព​ប្រសិទ្ធភាព​ការប្រកួតប្រជែង​ការការពារ​អតិថិជន​និង​ការបង្កើត​ថ្មី​នៅក្នុង​វិស័យ​ទូទាត់​។​

​រហូតមកដល់​ពេលនេះ​ធនាគារជាតិ​នៃ​កម្ពុជា​បាន​បង្កើត​និង​ដាក់ឱ្យ​ដំណើរការ​ជា​ផ្លូវការ​នូវ​ប្រព័ន្ធ​ផ្សេងៗ​ដូចជា​ប្រព័ន្ធ​ទូទាត់​ជាតិ​ក្នុង​ឆ្នាំ ២០១២ ប្រព័ន្ធ​ទូទាត់​ប្រាក់​រហ័ស​នៅ​ឆ្នាំ ២០១៦ និង​ប្រព័ន្ធ​បាគង​នៅ​ខែតុលា​ឆ្នាំ ២០២០៕​

ទីតាំងផ្សាយពាណិជ្ជកម្ម

- Advertisment -

Most Popular