​ពលរដ្ឋ​ក្រីក្រ និង​ត្រូវ​ភ្លើង​ឆេះ​ផ្ទះ ៥​គ្រួសារ ទទួល​អំណោយ ពីសា​ខា​កាកបាទក្រហមកម្ពុជា​

ដោយៈ គ្រញូង / បាត់ដំបងៈ នា​ព្រឹក​ថ្ងៃទី​២៦ ខែមករា ឆ្នាំ​២០២១ សាខា​កាកបាទក្រហមកម្ពុជា ខេត្ត​បាត់ដំបង ដឹកនាំ​ដោយ​លោក បណ្ឌិត ប៊ុត គឹមស៊ាន ប្រធាន​គណៈកម្មាធិការ​សាខា​ខេត្ត និង​សហការី បាន​ចុះសួរសុខទុក្ខ និង​នាំយក​អំណោយ​មនុស្សធម៌ ទៅ​ផ្តល់ជូន​បងប្អូន​ប្រជាពលរដ្ឋ ដែល​ជួប​ផលប៉ះពាល់ ក្នុងពេល​មាន​វិបត្តិ​ជំងឺ​កូ​វីដ ១៩ ដោយ​ផ្តោត​ចំពោះ​ចាស់ជរា គ្មាន​ទីពឹង ស្ត្រី​មេម៉ាយ​ក្រីក្រ មានកូន​ច្រើន និង​ជនពិការ ទីទ័លក្រ ចំនួន​៥​គ្រួសារ រស់នៅ​ភូមិ​អូរ​ស្រឡៅ ឃុំ​អូរ​ដំបង​១ និង​គ្រួសារ​រង គ្រោះ​ដោយ​អគ្គិភ័យ ចំនួន ២ គ្រួសារ រស់នៅ​ភូមិ​អូរ​ខ្ជាយ ឃុំ​វត្ត​តា​មិ​ម ស្រុក​សង្កែ ខេត្តបាត់ដំបង​។​

​លោក​បណ្ឌិត ប៊ុត គឹមស៊ាន ប្រធាន​គណៈកម្មាធិការ​សាខា បាន​ពាំ​នាំនូវ​ការ​ផ្ដាំផ្ញើ​សួរសុខទុក្ខ ពី​សំណាក់​សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា ដែលជា​និច្ចកាល​សម្ដេច តែងតែ​យកចិត្តទុកដាក់ គិតគូរ​ខ្ពស់បំផុត ចំពោះ​សុខទុក្ខ​ប្រជាពលរដ្ឋ គ្រប់រូប​មិន​ប្រកាន់វណ្ណៈ ពណ៌​សម្បុរ ជំនឿ​សាសនា ឬ​និន្នាការ​នយោបាយ​អ្វី​ឡើយ ។​

​លោក​បណ្ឌិត បាន​បន្ត​ចាត់​អោយ​លោក កង ប៊​ន អនុប្រធាន​អចិន្ត្រៃយ៍​គណៈកម្មាធិការ​សាខា និង​សហការី​ចុះសួរសុខទុក្ខ និង​នាំយក​អំណោយ​មនុស្សធម៌ របស់​សាខា​កាកបាទក្រហមកម្ពុជា​ខេត្ត ជូន​ដល់​ប្រជាពលរដ្ឋ ចំនួន​២​គ្រួសារ រួមមាន ១,​លោក​ឈួន រី​ណា អាយុ​៣៥​ឆ្នាំ ជា​បុគ្គលិក​អង្គភាព​អគ្គិសនី​ខេត្ត និង​២,​លោកស្រី ឡាំង សូ​នី អាយុ​៤១ ឆ្នាំ ជាជាង​អ៊ុតសក់ ដែល​រងគ្រោះ​ដោយ​អគ្គិភ័យ កាលពី​រសៀល​ថ្ងៃទី​១៨ ខែមករា ឆ្នាំ​២០២១ ដោយ​មូលហេតុ ឆ្លង​ចរន្តអគ្គិសនី ស្ថិតនៅ​ភូមិ​អូរ​ខ្ជាយ ឃុំ​វត្ត​តា​មិ​ម ស្រុក​សង្កែ ខេត្តបាត់ដំបង​។​

​អំណោយ​មនុស្សធម៌ ដែល​បាន​ផ្ដល់ជូន ១​គ្រួសារ ទទួលបាន អង្ករ​២៥​គីឡូក្រាម ទឹកបរិសុទ្ធ​វី​ឃែ​រ មី ភួយ មុង ក្រមា សារុង អាវយឺត សាប៊ូ ទឹកត្រី ទឹកស៊ីអ៊ីវ ថវិកា និង​សម្ភារៈ​ផ្ទះបាយ​មួយចំនួន​។ ដោយឡែក គ្រួសារ​រងគ្រោះ​ដោយ​អគ្គិភ័យ បន្ថែម​អង្ករ​ចំនួន ៥០​គីឡូក្រាម ក្នុង​មួយ​គ្រួសារ​ផងដែរ ៕/V

​រូប​ថ​តះ​ពលរដ្ឋ​ក្រីក្រ​៥​គ្រួសារ​ក្នុងនោះ​២​គ្រួសារ​រងគ្រោះ​ដោយ​ភ្លើង​ឆេះ​ផ្ទះ​នៅ​ស្រុក​សង្កែ ទទួល​
​អំណោយ​មនុស្សធម៌​ពីសា​ខា​កាកបាទក្រហមកម្ពុជា​ខេត្តបាត់ដំបង​

ទីតាំងផ្សាយពាណិជ្ជកម្ម

- Advertisment -

Most Popular