Home ព័ត៌មានសំខាន់ៗ វេទិកា​ជាតិ​អ...

វេទិកា​ជាតិ​អេកូ​ទេសចរណ៍​លើក​ទី​២ នា​ឆ្នាំនេះ​រៀបចំឡើង​នៅ​ខេត្តសៀមរាប​

​ដោយ​:​ដេប៉ូ​/​សៀមរាប​: វេទិកា​ជាតិ​អេកូ​ទេសចរណ៍​លើក​ទី​២ ស្តីពី «​ការការពារ និង​អភិរក្ស​ធនធានធម្មជាតិ​» ត្រូវបាន​រៀបចំឡើង​នា​ថ្ងៃទី​២៧ ខែ មករា ឆ្នាំ ២០២១​នេះ​។​

​ពិធី​នេះដែរ​បាន​ចូលរួម​ដោយ​លោក ថោង ខុន រដ្ឋមន្ត្រី​ក្រសួងទេសចរណ៍ ជា​ប្រធាន​ក្រុមការងារ​អន្តរក្រសួង​គ្រប់គ្រង និង​អភិវឌ្ឍន៍​សហគមន៍​ទេសចរណ៍ និង​អេកូ​ទេសចរណ៍​(​ក​.​គ​.​អ​.​អ​.) តំណាង​ដ៏​ខ្ពង់ខ្ពស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​, លោក សាយ សំ​អាល់ រដ្ឋមន្ត្រី​ក្រសួងបរិស្ថាន និង​ជា​អនុប្រធាន​អចិន្ត្រៃយ៍ ក​.​គ​.​អ​.​អ​. និង​លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ និង​ជា​អនុប្រធាន ក​.​គ​.​អ​.​អ​.​។​

​ថ្លែង​ក្នុង​វេទិការ​នេះ លោក សាយ សំ​អាល់ បានឱ្យដឹងថា ក្រសួងបរិស្ថាន​បាននិងកំពុង​ធ្វើ​ការងា​រពាក់​ព័ន្ធ​នឹង​វិស័យ​អេកូ​ទេសចរណ៍ ស្របទៅនឹង​សសរស្តម្ភ​ទាំង ០៤ របស់​ក្រសួងបរិស្ថាន ដែល​រួមមាន កិច្ច​គាំពារ​បរិស្ថាន ការ​ភិ​រក្ស​ជីវៈចម្រុះ ការរស់នៅ​ប្រកបដោយ​ចីរភាព និង​ការធ្វើ​ទំនើបកម្ម​ស្ថាប័ន​។

​លោក​រដ្ឋមន្ត្រី បាន​គូសបញ្ជាក់ថា ដើម្បីឱ្យ​ការអភិរក្ស​ជីវៈចម្រុះ និង​ធនធានធម្មជាតិ ទទួលបាន​ជោគជ័យ នោះ​គឺ​ត្រូវមាន​ការចូលរួម​យ៉ាង​សំខាន់​ពី​ប្រជាពលរដ្ឋ​នៃ​សហគមន៍​មូលដ្ឋាន ហើយ​ដើម្បីឱ្យ​មានការ​ចូលរួម​ទៅបាន​លុះត្រាតែ​ប្រជាពលរដ្ឋ​ទទួលបាន​នូវ​ជម្រើស​ថ្មី​ក្នុងការ​រស់នៅ ជៀសវាង​ការពឹង​អាស្រ័យ​លើ​ធនធាន​ធាន​ធម្មជាតិ​ទាំងស្រុង​។ ជម្រើស​ថ្មី​ទាំងនោះ រួមមាន មុខរបរ (​ដាំ​បន្លែ ឬ​ចិញ្ចឹមសត្វ​ជាដើម​) និង​តម្រូវការ​ជាក់ស្តែង រួមមាន អគ្គិសនី និង​ទឹកស្អាត​ជាដើម​។ ក្នុងនោះដែរ ការរៀបចំ​សហគមន៍​តំបន់ការពារធម្មជាតិ គឺជា​យន្តការ​ចាំបាច់ ដើម្បី​អាចឱ្យ​ប្រជាពលរដ្ឋ​មូលដ្ឋាន​ចូលរួម​ការងារ​អភិរក្ស ជាមួយ​មន្ត្រី​ឧ​ទ្យា​នុ​រក្ស​។​

​ជាមួយគ្នានេះ​លោក​រដ្ឋមន្ត្រី​បាន​បន្ត​ឱ្យដឹងថា ក្រសួងបរិស្ថាន​កំពុង​យកចិត្តទុកដាក់​យ៉ាងខ្លាំង​លើ​ការងារ​អេកូ​ទេសចរណ៍​នៅតាម​តំបន់ការពារធម្មជាតិ​នានា​នៅ​ទូទាំងប្រទេស​កម្ពុជា​។ ក្នុងនោះ ក្រសួង​បានធ្វើការ​ផ្សព្វផ្សាយ​យ៉ាងសកម្ម​អំពី​សក្តានុពល​ទេសចរណ៍​ទៅដល់​សាធារណជន និង​បាន​សហការ​យ៉ាង​ជិតស្និត​ជាមួយ​ស្ថាប័ន និង​ដៃគូរ​ពាក់ព័ន្ធ​។ ក្រោម​កិច្ចខិតខំ​ប្រឹងប្រែង​លើ​ការងារ​នេះ យើង​សង្កេតឃើញ​ពី​ការផ្លាស់ប្តូរ​ផ្នត់គំនិត​របស់​សាធារណជន ជាពិសេស​ក្នុង​ស្រទាប់​យុវជន ចំពោះ​បរិស្ថាន​។ នេះ​ជា​និន្នាកា​ថ្មី​មួយ​ក្នុង​ការជួយ​លើកស្ទួយ​សេដ្ឋកិច្ច​មូលដ្ឋាន ដែល​បានផ្តល់​ជា​ជម្រើស​ថ្មី ក្រៅពី​ការពឹង​ផ្អែកលើ​ធនធានធម្មជាតិ​ដោយផ្ទាល់ ឈានទៅ​ការអភិរក្ស​ជីវៈចម្រុះ និង​ធនធានធម្មជាតិ​ឱ្យបាន​ជោគជ័យ​។

​ទទ្ទឹម​គ្នា​នេះដែរ នៅក្នុង​គោលនយោបាយ​ភូមិ​ឃុំ​មាន​សុវត្ថិភាព​របស់​រដ្ឋាភិបាល ក៏បាន​បញ្ចូល​នូវ​បរិស្ថាន​ស្អាត មានន័យថា​បរិស្ថាន​នៅតាម​មូលដ្ឋាន និង​ទីសាធារណៈ ត្រូវ​ប្រាក​ដ្ឋ​ថា​មាន​ភាពប្រសើរ ធានា​មិន​ប៉ះពាល់​ដល់​សុខភាព​ប្រជាពលរដ្ឋ​។​

លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់​និង​នេសាទ និង​ជា​អនុប្រធាន ក​.​គ​.​អ​.​អ​. មានប្រសាសន៍​ដោយ​សុទិដ្ឋិនិយម​ចំពោះ​សេដ្ឋកិច្ចកម្ពុជា ដែល​រក្សាបាន​នូវ​កំណើន​ជា​រៀងរាល់ឆ្នាំ ក្នុងនោះ​កម្រិតជីវភាព និង​ប្រាក់ចំណូល​របស់​ប្រជាពលរដ្ឋ​មានការ​កើន​ឡើងជា​លំដាប់​។​

ពាក់ព័ន្ធ​នឹង​វិស័យ​អេកូ​ទេសចរណ៍ លោក​រដ្ឋមន្ត្រី បាន​គូសបញ្ជាក់​អំពី​សក្តានុពល​អេកូ​ទេសចរណ៍ ដែល​ស្ថិតក្រោម​ដែន​សមត្ថកិច្ច​គ្រប់គ្រង​របស់​ក្រសួងកសិកម្ម រុក្ខាប្រមាញ់ និង​នេសាទ ដែល​រួមមាន សហគមន៍​នេសាទ ចំនួន ៥១១ (​ក្នុងនោះ ១៣១​សហគមន៍ មាន​សក្តានុពល​បង្កើត​ជា​តំបន់​អេកូ​ទេសចរណ៍​) សហគមន៍​ព្រៃឈើ ចំនួន ៦៣៨ និង​សហគមន៍​កិ​សិ​កម្ម ចំនួន ១១៩០​។

​លោក រដ្ឋមន្ត្រី​សង្ឃឹម និង​ជឿជាក់ថា​វេទិកា​ជាតិ​នេះ នឹង​ផ្តល់ឱកាស​ជួបជុំគ្នា​ដើម្បី​ពិនិត្យ​តាម ដាន​អំពី​វឌ្ឍនភាព កាលានុវត្តភាព បញ្ហា​ប្រឈម ព្រមទាំង​រួមគ្នា​រិះរក​វិធានការ​ដោះស្រាយ​ប្រកប ដោយ​គំនិត​ច្នៃប្រឌិត និង​ការបំពេញភារកិច្ច​តាម​គន្លង​ថ្មី​ដើម្បី ផលប្រយោជន៍​រួម ជា​ពុទ្ធិ​ក្នុងការ ចូលរួមចំណែក​ពង្រឹង​ការងារ​គ្រប់គ្រង និង​អភិវឌ្ឍ​សហគមន៍​ទេសចរណ៍ និង​វិស័យ​ក​សិ​-​ទេស ចរណ៍ រួមគ្នា​ជួយ​ទ្រទ្រង់ និង​អភិវឌ្ឍន៍​សង្គម​-​សេដ្ឋកិច្ចជាតិ និង​ការធានា​នូវ​ចីរភាព​បរិស្ថាន​សម្រាប់​កូនចៅ​ជំនាន់​ក្រោយៗ​ទៀត​។​

​ដោយឡែក ថោង ខុន បាន​លើកឡើងថា ក្រោម​កិច្ចដឹកនាំ​ប្រកបដោយ​ភាពឈ្លៀសវៃ របស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា កម្ពុជា​បាន​កសាង​ឃឿន​សេដ្ឋកិច្ច​រឹងមាំ ប្រជាពលរដ្ឋ​មាន​កម្រិតជីវភាព និង​ប្រាក់ចំណូល​ខ្ពស់​ជាមុន​។
​លោក​បាន​មានប្រសាសន៍ថា​កម្ពុ​ជាស​ម្បូ​រ​ទៅដោយ​តំបន់​ទេសចរណ៍​យ៉ាង​សម្បូរបែប សម្រាប់​បង្កើតជា​តំបន់​អេកូ​ទេសចរណ៍​។ ការរៀបចំ​តំបន់​អេកូ​ទេសចរណ៍​មួយ​ឡើង ត្រូវ​សិក្សា​គ្រប់​ជ្រុងជ្រោយ លើ​ផ្នែក​សុវត្ថិភាព ផ្លូវ​ធ្វើដំណើរ ជំងឺ​(​កើត​ពី​មូស​ខាំ​) អនាម័យ​កន្លែង​ស្នាក់នៅ និង​បន្ទប់ទឹក​ជាដើម ទាមទា​កិច្ចសហការ​ជាមួយ​ក្រសួង​-​ស្ថាប័ន​ពាក់ព័ន្ធ​។​


គួរ​បញ្ជាក់ថា នៅក្នុង​អង្គ​វេទិកា​ជាតិ​លើក​ទី​២​នេះ រួមមាន​កម្មវិធី​សំខាន់ៗ​ដូចជា “​កិច្ចពិភាក្សា​បច្ចេកទេស​(Panel Discussion)” ដោយមាន​ការចូលរួម​ពី​វាគ្មិន​សំខាន់ៗ អញ្ជើញ​មកពី​ភាគី​សារ​ណៈ ផ្នែក​ឯកជន តំណាង​សហគមន៍​ទេសចរណ៍ និង​អេកូ​ទេសចរណ៍ ដៃគូ​ជាតិ និង​អន្តរជាតិ និង​ភាគី​ពាក់ព័ន្ធ ផ្តោតលើ​ប្រធានបទ ០៣ សំខាន់ គឺ ទី​១៖ ការវិវត្តន៍ និង​អនាគត​នៃ​វិស័យ​អេកូ​ទេសចរណ៍ និង​សហគមន៍ ក្នុង​បរិបទ​ជំងឺ​កូ​វីដ​១៩ ទី​២៖ ភាពជា​ដៃគូ​បំពេញ​គ្នា​រវាង​ដៃគូ​អភិវឌ្ឍ និង​ការអភិរក្ស ក្នុង​ការជំរុញ​អភិវឌ្ឍ​សហគមន៍​ទេសចរណ៍ និង​អេកូ​ទេសចរណ៍ និង​ទី​៣៖ ការគាំទ្រ​ក្របខណ្ឌ​គោ​នយោបាយ​អន្តរ​វិស័យ និង​យន្ត​ការជំរុញ​ការអភិវឌ្ឍ​សហគមន៍​។ ទន្ទឹមនឹងនេះ អង្គ​វេទិកា​ក៏មាន​រៀបចំ​ជា ពិព័រណ៍​ខ្នាតតូច ស្តីពី​សហគមន៍​ទេសចរណ៍ និង​អេកូ​ទេសចរណ៍ និង​រៀបចំ​ដំណើរ​ទស្សនកិច្ច​សិក្សា​ទៅកាន់​តំបន់​សហគមន៍​សំខាន់ៗ​មួយចំនួន​ផងដែរ​។​

ទីតាំងផ្សាយពាណិជ្ជកម្ម

- Advertisment -

Most Popular