Home ព័ត៌មានជាតិ សេដ្ឋកិច្ច កសិករ​ក្នុងស្...

កសិករ​ក្នុងស្រុក​ជុំ​គិរី ត្អូញត្អែរ​អំពី​បញ្ហា​តម្លៃ​បន្លែ​តាសក់ ចុះថោក​

ដោយៈ បូកគោ/កំ​ពតៈ អ្នក​ដាំ​ដំណាំ​តាសក់ ក្នុង​ឃុំ​ស្រែ​ចែង ស្រុក​ជុំ​គិរី កំពុង​ប្រឈម នឹង​បញ្ហា​តម្លៃ​ចុះថោក ខណៈដែល​គ្រួសារ​កសិករ​នីមួយៗ ប្រមូល​ផល​បាន​រាប់រយ គីឡូក្រាម ក្នុង​មួយថ្ងៃៗ​។ ពួកគាត់​បាន​សំណូមពរ ដល់​មន្ត្រី​ជំនាញ អ្នកពាក់ព័ន្ធ ជួយ​អន្តរាគមន៍ ដើម្បី​មាន​ទីផ្សារ ល្អប្រសើរ​ឡើង​។​

​អ្នកស្រី មុំ កសិករ​រស់នៅ​ភូមិ​ដំណាក់​សុ​ក្រំ ឃុំ​ស្រែ​ចែង ស្រុក​ជុំ​គិរី បាន​រៀបរាប់ថាៈ ក្រុមគ្រួសារ​អ្នកស្រី បាន​ប្រក​បរបរ​ដាំ​បន្លែ​តាសក់ ជាង​មួយឆ្នាំ​ហើយ​។ ដំណាំ​ប្រភេទ​នេះ ត្រូវ​ចំណាយ​ដើមទុន ច្រើន​គួរសម​។ កាល​ពេល​ចាប់ផ្តើម​ដាំ​ដំបូង នៅលើ​ផ្ទៃដី​កន្លះ​ហិកតា ត្រូវ​ចំណាយ​អស់​ជាង មួយ​ពាន់​ដុល្លារ ដោយ​ត្រូវ​ទិញ​ម៉ាស៊ីនបូមទឹក ទុយោ​ដំណក់ទឹក ជី និង​ថ្នាំ​សម្លាប់​សត្វល្អិត ផ្សេងៗ​ទៀត​។ បន្លែ​តាសក់ ឆាប់​បាន​ទទួលផល គឺ​គិត​ចាប់ពី​ថ្ងៃ កប់​គ្រាប់ពូជ ដល់​ថ្ងៃ​បេះ​ផ្លែ មាន​រយៈពេល ១​ខែ ៥​ថ្ងៃ ។ បន្ទាប់មក អាច​បន្ត​បេះ​ផ្លែ រយៈពេល​១​ខែ​១០​ថ្ងៃ ទើប​អស់ ហើយ ត្រូវធ្វើ​ដី​ដាក់​ជី ដើម្បី​ដាំ​សាជាថ្មី​។​

​អ្នក​ស្រីមុំ បាន​បន្តថាៈ ជាមួយ​មុខរបរ​នេះ បាន​ជួយ​ឱ្យ​ជីវភាព​គ្រួសារ​អ្នកស្រី ប្រសើរ​ជាង មុន​។ ប៉ុន្តែ​ចាប់​ប៉ុន្មាន​សប្តាហ៍ ចុងក្រោយ​នេះ​មក តម្លៃ​តាសក់ បាន​ចុះថោក ធ្វើឱ្យ​ចំណូល ត្រូវ​ធ្លាក់ចុះ យ៉ាងច្រើន បើ​ប្រៀបធៀប​នឹង​កាល​ចាប់ផ្តើម​ដាំ​ដំបូង​។​

​ជាមួយគ្នានេះដែរ លោក ខែម ពៅ កសិករ​នៅ​ភូមិ​ឃុំ​ខាងលើ បាន​ប្រាប់​ឱ្យដឹងថាៈ លោក​បាន​ដាំ​ដាំ​ណាំ​តាសក់ ជាង​២​ឆ្នាំ​មកហើយ​។ ចំណេះ​ជំនាញ​នេះ គឺ​លោក​ធ្វើតាម អ្នកភូមិ​តៗ​គ្នា ដោយ​មិនបាន​ឆ្លង វគ្គ​បណ្តុះបណ្តាល ឬ​ទទួល​ការណែនាំ ពី​ផ្នែក​ណា​ទេ​។ អ្នក​ដាំ​តាសក់​រូបនេះ បាន​អំពាវនាវ​ថា ដោយសារ​តាសក់ ចុះថោក​យ៉ាងគំហុក​នោះ តំណាងឱ្យ​កសិករ​ទាំងអស់ លោក​សូម​សំណូមពរ ដល់​មន្ត្រី​ជំនាញ និង​គ្រប់​អ្នកពាក់ព័ន្ធ មេត្តាជួយ​រក​ទីផ្សារ ដើម្បីឱ្យ​តម្លៃ បាន​ប្រសើរ​ឡើងវិញ​ផង​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular