ការងារ​អភិវឌ្ឍន៍​មូលដ្ឋាន ត្រូវបាន​លើក​សំណូមពរ ច្រើនជាងគេ ក្នុង​វេទិកា​ផ្សព្វផ្សាយ

ដោយៈ ភ្នំ​ស្វាយ / បន្ទាយ​មាន​ជ័​យៈ វេទិកា​ផ្សព្វផ្សាយ និង​ពិគ្រោះ​យោបល់ របស់​ក្រុម ប្រឹក្សា ខេត្តបន្ទាយមានជ័យ នៅ​ស្រុក​ស្វាយចេក កាលពី​រសៀល ថ្ងៃទី​២៧ ខែមករា ឆ្នាំ​២០២១ ត្រូវបាន​មន្ត្រី​ភូមិ ឃុំ ស្រុក និង​ពលរដ្ឋ បាន​លើក​សំណូមពរ​ច្រើនជាងគេ គឺ​ការងារ​អភិវឌ្ឍន៍​មូលដ្ឋាន ក្រៅពីនោះ គឺ​ការងារ​ចម្រុះ​ផ្សេងៗ ហើយ​លោក អ៊ុំ រាត្រី អភិបាលខេត្ត​បន្ទាយមានជ័យ បាន​ទទួលយក​សំណូមពរ និង​បញ្ហា​ប្រឈម​ទាំងនោះ យកមក​ដោះស្រាយ​។​

​មន្ត្រី​ភូមិ ឃុំ និង​ប្រជាពលរដ្ឋ ដែលជា​អ្នកចូលរួម បានលើកឡើង នូវ​មតិយោបល់ និង​បញ្ហា សំណូមពរ និង​ក្តីកង្វល់​ចំនួន ៤២ ក្នុងនោះ ការងារ​អភិវឌ្ឍន៍​មូលដ្ឋាន ចំនួន ២៥, ការងារ សន្តិសុខ សណ្ដាប់ធ្នាប់​សង្គម ១ និង​ការងារ​ផ្សេងៗ ចំនួន ១៦ ប៉ុន្តែ​បញ្ហា​ទាក់ទិន នយោបាយ មិនត្រូវ​បានលើកឡើង​ទេ​។​

​លោក អ៊ុំ រាត្រី អភិបាលខេត្ត​បន្ទាយមានជ័យ បាន​ទទួលយក​សំណូមពរ និង​បញ្ហា​ប្រឈម ទាំងនោះ យកមក​ដោះស្រាយ ភ្លាមៗ ឯ​បញ្ហា​ដែល​នៅ​សេសសល់ បាន​ត្រូវ​ដាក់បញ្ចូល ទៅក្នុង​គម្រោង​អភិវឌ្ឍន៍ របស់​ខេត្ត​បន្តទៀត​។​

​នៅក្នុង​វេទិកា​សា​ធាណៈ​នេះ ត្រូវបាន​តំណាង​ប្រជាពលរដ្ឋ នៅក្នុង​ស្រុក​ស្វាយចេក បានលើកឡើង ឱ្យ​រាជរដ្ឋាភិបាល អាជ្ញាធរ​ដែនដី ឱ្យជួយ​ដោះស្រាយ បញ្ហា​កង្វះ​ទឹក​ដាំ​បន្លែ ការជួសជុល​ផ្លូវ ដែល​រង​ការខូចខាត​, ការស្ថាបនា​ផ្លូវលំ​ជនបទ ក្រាល​កៅស៊ូ ដែល​ចាំ​បាត់ៗ នៅតាម​មូលដ្ឋាន​, ប្រព័ន្ធធារាសាស្ត្រ និង​មាន​បញ្ហា​ប្រឈម លើ​ការអភិវឌ្ឍ​មូលដ្ឋាន និង​បញ្ហា​លើកកម្ពស់​ជីវភាព​រប​ស់​ប្រជាពលរដ្ឋ​។​

​នៅក្នុង​ឱកាស​នោះ លោក ខេង ស៊ុម ប្រធាន​ក្រុមប្រឹក្សា ខេត្តបន្ទាយមានជ័យ បាន លើកឡើងថា ការរៀបចំ​វេទិកា​ផ្សព្វផ្សាយ និង​ពិគ្រោះ​យោបល់ គឺជា​ឧបករណ៍​ដ៏ មាន​សារៈសំខាន់​មួយ សម្រាប់​លើកកម្ពស់ គណនេយ្យភាព តម្លាភាព និង​ការចូលរួម របស់​ប្រជាពលរដ្ឋ ទាំងប្រុស ទាំងស្រី ក្នុង​កិច្ចដំណើរការ របស់​ក្រុមប្រឹក្សា​នៃ​រដ្ឋបាល ថ្នាក់ក្រោម​ជាតិ​។​

​លោក​បាន​បន្តទៀតថាៈ ការបើក​វេទិកា​នេះ គឺជា​ការ​ផ្តល់ឱកាស ក្នុងការ​ពិភាក្សា ប្រកបដោយ​តម្លាភាព គ្រប់​ជ្រុងជ្រោយ ការទទួលបាន​នូវ​ពហុ​គំនិត ពី​រដ្ឋបាល ថ្នាក់ក្រោម​ជាតិ សង្គម​ស៊ីវិល សាធារណជន​នានា ដែល​អាច​ទទួលបាន នូវ​ការផ្ទៀងផ្ទាត់ ប្រកបដោយ​សុចរិត​ភាព សុភ​វិនិច្ឆ័យ និង​យុត្តិធម៌​ក្នុងសង្គម ឱ្យ​កាន់តែ​ល្អប្រសើរ​ឡើង​។ ម្យ៉ាងទៀត ក៏​ដើម្បី​បង្ហាញ​នូវ ការទទួលខុសត្រូវ​មួយ របស់​រដ្ឋបាល​ថ្នាក់ក្រោម​ជាតិ ចំពោះ​ប្រជាពលរដ្ឋ និង​សង្គមជាតិ​ទៀតផង​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular