Home ព័ត៌មានជាតិ សន្តិសុខ តុលាការ ចេញ​ដ...

តុលាការ ចេញ​ដីកា​កោះហៅ ឧ​ត្ត​ម​សេនីយ៍​ទោ​ម្នាក់ និង​បក្ខពួក ឲ្យ​ចូល​បំភ្លឺ ជា​បន្តបន្ទាប់

ដោយៈ ស​រិ​ទ្ធ/កំពង់ស្ពឺៈ លោក ខៃ សម្ផស្ស ព្រះរាជអាជ្ញារង អម​សាលាដំបូង ខេត្តកំពង់ស្ពឺ កាលពី​ថ្ងៃទី​២៦ ខែមករា ឆ្នាំ​២០២១ បានចេញ​ដីកា​កោះហៅ ជនសង្ស័យ​ឈ្មោះ សូ​យ ចាន់​សឿន ជា​ឧ​ត្ត​ម​សេនីយ៍​ទោ និង​មាន​តួនាទី ជា​នាយរង​ទីចាត់ការ​អភិវឌ្ឍន៍ អគ្គ​បញ្ជា ការដ្ឋាន នៃ​ក្រសួងការពារជាតិ អោយចូល​បំភ្លឺ នា​ព្រឹក​ថ្ងៃទី​១៥ ខែកុម្ភៈ ឆ្នាំ​២០២១ ខាងមុខនេះ ដើម្បី​សាកសួរ ពី​ដំណើររឿង «​ប្រើ​ហិង្សា​ដោយ មាន​ស្ថាន​ទម្ងន់ទោស និង បង្ខាំង​មនុស្ស ដោយ​ខុសច្បាប់​» ។​

​ជាមួយគ្នានេះ តុលាការ ក៏បាន​ចេញ​ដីកា​កោះហៅ ជនសង្ស័យ​ម្នាក់ទៀត ឈ្មោះ ស្រី សម្បត្តិ ភេទ​ប្រុស មាន​តួនាទី​ជា​នាយ​ស្តីទី ការិយាល័យ​អភិវឌ្ឍន៍ អគ្គបញ្ជាការដ្ឋាន នៃ​ក្រសួងការពារជាតិ អោយចូល​បំភ្លឺ នា​រសៀល ថ្ងៃទី​៨ ខែកុម្ភៈ ឆ្នាំ​២០២១ ខាងមុខនេះ​។​

​យោងតាម​ពាក្យបណ្តឹង របស់​ស្ត្រី​ម្នាក់ ឈ្មោះ ឌួង ហេ​ម៉ាលី​ស អាយុ​៤១​ឆ្នាំ មុខរបរ ពាណិជ្ជករ មាន​ទីលំនៅ​ផ្ទះ​លេខ​៤៧ ផ្លូវ​លេខ​៣៥២ សង្កាត់​បឹង​កេងកង​ទី​១ ខណ្ឌ​បឹង កេងកង រាជធានី​ភ្នំពេញ បាន​រៀបរាប់ថាៈ កាលពី​វេលា​ម៉ោង ១០​និង​៣០​នាទី ថ្ងៃទី​២២ ខែមករា ឆ្នាំ​២០២១ នៅក្នុង​រថយន្ត ដែល​កំពុង​ជិះ​តែ ២ នាក់ ស្ថិត​លើ​ដងផ្លូវ​នៅ​ចំណុច រង្វង់​មូល​តាខ្មៅ ទី​រួម​ខេត្តកណ្តាល លោក សូ​យ ចាន់​សឿន​បាន​វាយដំ ជនរងគ្រោះ និង​បាន​ដក​កាំភ្លើងខ្លី ភ្ជង់​គំរាម មិនអោយ​ជនរងគ្រោះ ស្រែក និង​គំរាម​បាញ់ បាក់ជើង និង​បាញ់​សម្លាប់ចោល តាមផ្លូវ​រហូត ដល់​ខេត្តកំពង់ស្ពឺ ស្ថិតនៅ​ភូមិ​ចំការចេក ឃុំ​ត្រែងត្រយឹង ស្រុក​ភ្នំស្រួច ខេត្តកំពង់ស្ពឺ ។​

​ជនរងគ្រោះ បាន​រៀបរាប់​ទៀតថាៈ លោក សូ​យ ចាន់​សឿន បាន​បង្ខាំង​ជនរងគ្រោះ ទុក​ក្នុងផ្ទះ​កូនចៅ របស់គាត់ ឈ្មោះ ស្រី សម្បត្តិ ដែលមាន​តួនាទី​ជា​នាយ​ស្តីទី ការិយាល័យ​អភិវឌ្ឍន៍ អគ្គបញ្ជាការដ្ឋាន នៃ ក្រសួងការពារជាតិ រហូតដល់​ម៉ោង ៧ យប់ ទើប​មាន​សមត្ថកិច្ច​នគរបាល ចុះមក​អន្តរាគមន៍ រំដោះ​ជនរងគ្រោះ ចេញពីផ្ទះ យកទៅ​សង្គ្រោះ នៅ​មន្ទីរពេទ្យ ។​

​ជាមួយគ្នានេះ ជនរងគ្រោះ សំណូមពរ​អោយ​តុលាការ ចាប់ខ្លួន និង​ឃុំខ្លួន លោក​ផ្កាយ​២ សូ​យ ចាន់​សឿន និង ទាមទារ​ថ្លៃ​សំណង ព្យាបាល​របួស ចំនួន ១ លាន​ដុល្លារ ព្រមទាំង​ជំងឺ​ចិត្ត​ចំនួន​១​លាន​ដុល្លារ​។​

​បន្ថែម​ពីលើ​ពាក្យបណ្តឹង​នេះ នៅ​ព្រឹក​ថ្ងៃទី​២៧ ខែមករា ឆ្នាំ​២០២១ ជនរងគ្រោះ​បាន​ប្រាប់ រស្មី​កម្ពុជា​ថា រឿងរ៉ាវ​នេះ កើតឡើង​ពី​ជម្លោះ​ពាក្យសម្តី​ក្នុង​ឡាន ហើយ​ពេលនេះ លោកស្រី កំពុងមាន​ការបារម្ភ ពី​សុវត្ថិភាព​ជាខ្លាំង និង​សង្ឃឹមថា សមត្ថកិច្ច នឹង​ចាប់ខ្លួន​ជនល្មើស បាន​នាពេល​ឆាប់ៗ ខាងមុខនេះ ។ ដោយឡែក លោក​ឧ​ត្ត​ម​សេនីយ៍​ទោ សូ​យ ចាន់​សឿន ក៏​ពុំទាន់​សុំ​ការបំភ្លឺ​បានដែរ ដោយសារ​គ្មាន​លេខ​ទូរស័ព្ទ ដើម្បី​ទំនាក់ទំនង​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular