Home ព័ត៌មានអន្តរជាតិ បុរស​ម៉ាឡេស៊ី...

បុរស​ម៉ាឡេស៊ី​ម្នាក់​ត្រូវ​កាត់ទោស​ជាប់គុក ១.០៥០ ឆ្នាំ​ពី​បទ​រំលោភ​កូនចុង​

​ប្រែ​សម្រួល : កញ្ញា​ដា​លី​ស ៖ តុលាការ​នៅ​ប្រទេស​ម៉ាឡេស៊ី​បាន​កាត់ទោស​បុរស​ម្នាក់​ឱ្យ​ជាប់គុក ១.០៥០ ឆ្នាំ រួម​ជាមួយ​ការ​វាយ ២៤ រំពាត់​ពី​បទ​រំលោភ​កូនស្រី​ចុង​របស់​គាត់​។​

​ទីភ្នាក់ងារ​សារព័ត៌មាន Bernama បាន​រាយការណ៍​នៅ​ថ្ងៃ​ព្រហស្បតិ៍​នេះ​ថា បុរស​គ្មាន​ការងារ​ធ្វើ​រូបនោះ​បាន​សារភាព​ទោស​កំហុស​ពី​បទ​រំលោភ​ក្មេងស្រី​អាយុ ១២ ឆ្នាំ​ចំនួន ១០៥ ដង​ក្នុង​រយៈពេល​ពីរ​ឆ្នាំ គិត​ចាប់ពី​ថ្ងៃទី ៥ ខែ​មករា​ឆ្នាំ ២០១៨ ដល់​ថ្ងៃទី ២៤ ខែ​កុម្ភៈ​ឆ្នាំ​មុន​។​

​ជនជាប់ចោទ​ត្រូវបាន​ផ្តន្ទាទោស​ជាប់​ពន្ធនាគារ​រយៈពេល ១០ ឆ្នាំ​ពី​បទ​រំលោភ​សេពសន្ថវៈ​ក្នុងករណី​នី​មួយៗ ។​តុលាការ​ត្រូវ​ចំណាយ​ពេល​សរុប​ជិត ៥​ម៉ោង​ដើម្បី​អាន​សាលក្រម​កាលពី​ថ្ងៃ​ពុធ ទី​២៧ មករា​។​

​យោងតាម​ទីភ្នាក់ងារ​សារព័ត៌មាន Bernama ចៅក្រម​តុលាការ​ឈ្មោះ អេម គូ​ណា​ស៊ូ​ន​ដា​រី និយាយ​ថា​បទល្មើស​នេះ​មាន​ផលប៉ះពាល់​យ៉ាងធ្ងន់ធ្ងរ​ដល់​កុមារ​។​

​ចៅក្រម​និយាយថា “​ខ្ញុំ​សង្ឃឹមថា​អ្នក​នឹង​មាន​វិប្បដិសារី​ពេល​ជាប់គុក​។ អ្នក​មិន​គួរ​ប្រព្រឹត្ដ​អំពើ​ហិង្សា​ទេ​ហើយ​ទោះបី​ទណ្ឌកម្ម​មាន​កម្រិត​ទាប ក៏​ប៉ុន្តែ​តុលាការ​យល់ថា​វា​គ្រប់គ្រាន់​ហើយ​ដោយ​សរុប​ពី​​ចំនួន​ករណី​ចោទប្រកាន់​”​។​

​រដ្ឋអាជ្ញារង​សាធារណៈ​លោក នូ​រុល គី​ស្ទី​នី កា​ម៉ា​រុល អា​ប្រា បាន​ជំរុញ​ឱ្យ​តុលាការ​ដាក់ទោស​ជាប់គុក​ឱ្យ​ធ្ងន់​ជាង​នេះ និង វាយ​នឹង​រំពាត់​ឱ្យ​ច្រើន​បន្ថែមទៀត​។​

​លោក​និយាយថា “​ក្នុងនាម​ជា​ឪពុកចុង គាត់​គួរ​មាន​ទំនួល​ខុស​ត្រូវ​ការពារ​ជនរងគ្រោះ ប៉ុន្តែ​ផ្ទុយទៅវិញ គាត់​បាន​បំផ្លាញ​តម្លៃ​របស់​នាង​អស់រលីង​។​អំពើ​របស់​គាត់​នឹង​បង្ក​របួស​ផ្លូវចិត្ត​អស់​មួយ​ជីវិត​​ដល់​ជនរងគ្រោះ​”៕

ទីតាំងផ្សាយពាណិជ្ជកម្ម

- Advertisment -

Most Popular