Home ព័ត៌មានជាតិ សន្តិសុខ ​ត្រឡប់​ពី​ឌុ...

​ត្រឡប់​ពី​ឌុប​ចៅស្រី​ទៅ​សាលា ត្រូវ​រថយន្ត​បែន បុក​កិន​ស្លាប់ ដាច់​ជា​បំណែកៗ​

​ដោយៈ ចាន់តូ / ភ្នំពេញៈ បុរស​ម្នាក់ ស្លាប់​ភ្លាមៗ នៅនឹងកន្លែង ហើយ​ម៉ូតូ​ខ្ទេច​ទាំងស្រុង ដោយសារ​រថយន្ត​បែន ប្រភេទ​យី​ឌុប បើក​បុក​កិន​ម៉ូតូ អូស​ជាង ១០ ម៉ែត្រ ទើប​របូត​ចេញ ហើយ​រថយន្ត បាន​បន្ត​បើក​គេច បាន​ចម្ងាយ​ប្រមាណ ៧០០ ម៉ែត្រ ទើប​ឈប់​ចត អ្នកបើកបរ ចុះ​រត់​គេចខ្លួនបាត់ នៅពេល​ជនរងគ្រោះ បាន​វិលត្រឡប់ មកពី​ដឹក​ចៅស្រី ដាក់​សាលារៀន​វិញ កាលពី​វេលា​ម៉ោង ១២​និង​៣០​នាទី រសៀល ថ្ងៃទី​២៨ ខែមករា ឆ្នាំ​២០២១ ស្ថិតនៅលើ​កំណាត់​ផ្លូវជាតិ លេខ​៣ ចំណុច​ភូមិ​តាំង​រនាម សង្កាត់​ប្រទះ​ឡាង ខណ្ឌ​កំបូល ។​

​សព​បុរសរងគ្រោះ​នោះ ឈ្មោះ សាវឿន អាយុ​៦៥​ឆ្នាំ ស្ថិតក្នុង​សភាព​ដាច់ បាក់បែក ជា​បំណែកៗ ខ្ទេច​ក្បាល​ទាំងស្រុង មើល​លែង​យល់​បាត់​ទៅហើយនោះ មាន​លំនៅ នៅ​ភូមិ​គោក​ខ្សាច់ សង្កាត់​ភ្លើង​ឆេះ​រទេះ បើក​ម៉ូតូ​ម៉ាក ហុងដា​ឌ្រី​ម សេរី​២០១២ ពណ៌​ខ្មៅ ពាក់​ស្លាក​លេខ ភ្នំពេញ 1BR-2500 ។ ចំណែក​រថយន្ត​បង្ក ធុន​ធំ ប្រភេទ​បែន យី​ឌុប ពណ៌​ក្រហម ពុំមាន​ពាក់​ស្លាក​លេខ ជា​រថយន្ត​ដែល​គេ​ស្គាល់​ថា ជា​រថយន្ត​របស់​ការ​ដ្ឋា​ន​ក្រុមហ៊ុន​ចិន ស្ថាបនា​ផ្លូវជាតិ​លេខ​៣​។

​តាម​ប្រភព​នៅ​កន្លែង បាន​ឲ្យ​ដឹងថា ចំណុច​កំណាត់​ផ្លូវ​ខាងលើ មាន​ការដ្ឋាន​ធ្វើ​ផ្លូវ បើក​ឲ្យ​ចរាចរ​តែ​ម្ខាង ផ្នែក​ខាងជើង ចរាចរ​ទាំង​ទៅ​ទាំង​មក ហើយ​មុន​កើតហេតុ ជនរងគ្រោះ បើក​ម៉ូតូ​វិលត្រឡប់ ពី​ឌុប​ចៅ​ដាក់​សាលារៀន ធ្វើដំណើរ​ពី​ទិស​ខាងត្បូង ទៅខាង​ជើង លើផ្លូវ​បញ្ច្រាស ព្រោះថា កំណាត់​ផ្លូវ បាន​បិទ​មួយ​ចំហៀង លុះដល់​ចំណុចកើតហេតុ ស្រាប់តែ​រថយន្ត​បង្ក បើក​ពី​ទិស​ខាងជើង ទៅខាង​ត្បូង បុក​កិន​ជាប់​អូស​ទាំង​ម៉ូតូ ទាំង​ជនរងគ្រោះ ជាង ១០ ម៉ែត្រ ទើប​របូត​ចេញ បណ្តាល​ឲ្យ​បុរស​នោះ ស្លាប់​បែកក្បាល​ខ្ទេច រីឯ​រថយន្ត មិនបាន​ឈប់​ទេ បន្តដំណើរ​ទៅមុខ បាន​ចំងាយ​ប្រមាណ ៧០០ ម៉ែត្រ ទើប​ឈប់​ចត អ្នកបើកបរ ចុះ​គេចខ្លួនបាត់​។​

​ក្រោយ​កើតហេតុ សមត្ថកិច្ច​នគរបាល​ខណ្ឌ​កំបូល បាន​ចុះទៅពិនិត្យ​ជាក់ស្តែង វាស់វែង​រួច ប្រមូលយក​វត្ថុតាង ម៉ូតូ និង​រថយន្ត ប្រគល់​ទៅ​ការិយាល័យ ចរាចរជើងគោក នៃ​ស្នងការដ្ឋាន​នគរបាល រាជធានី​ភ្នំពេញ ដើម្បី​កសាង​សំណុំរឿង​តាម​នីតិវិធី ។ សមត្ថកិច្ច បានប្រគល់​សព ជូនទៅ​ក្រុមគ្រួសារ ចាត់ចែង​ដឹកយក​ទៅធ្វើ​បុណ្យ តាម​ប្រពៃណី បន្ទាប់ពី​បាន​វាស់វែង ធ្វើ​កំណត់ហេតុ​រួចមក​៕/V​

ទីតាំងផ្សាយពាណិជ្ជកម្ម

- Advertisment -

Most Popular