Home ព័ត៌មានអន្តរជាតិ ពូ​ទីន​ព្រមាន...

ពូ​ទីន​ព្រមាន​ថា “​អរិយធម៌​មនុស្ស​អាច​នឹងត្រូវ​បញ្ចប់​” ដោយសារកូ​វីដ​១៩ ការ​ប្រជែង​គ្នា​ក្នុង​ពិភពលោក និង ភាព​តានតឹង​ជា​អន្តរជាតិ​កាន់តែ​អាក្រក់​ ​

​ប្រែ​សម្រួល : កញ្ញា​ដា​លី​ស ៖ ប្រធានាធិបតី​រុស្ស៊ី​លោក​វ្ល៉ា​ឌី​មៀរ ពូ​ទីន​បាន​ព្រមាន​កាលពី​ថ្ងៃ​ពុធ​ទី​២៧​មករា​ថា “​ទីបញ្ចប់​នៃ​អរិយធម៌​មនុស្ស​” គឺ​អាច​កើតឡើង​បាន​ដោយសារ​តែ​ការរួម​បញ្ចូល​គ្នា​​នៃ​វីរុស​កូរ៉ូណា ការ​ប្រជែង​គ្នា​លើ​សកលលោក និង​ភាព​តានតឹង​ជា​អន្តរជាតិ​កាន់តែ​អាក្រក់​ឡើង​។​

​ថ្លែង​តាមរយៈ​តំណ​ភ្ជាប់​វីដេអូ​ក្នុង​កិច្ចប្រជុំ​នៃ​វេទិកា​សេដ្ឋកិច្ចពិភពលោក​តាម​អន​ឡាញ​លោកពូ​ទីន​បានចង្អុលបង្ហាញ​អំពី​ការកើនឡើង​វិសមភាព​និង​ភាព​អត់​ការងារ​ធ្វើ​និង​ការ​ងើបឡើង​នៃ​នយោបាយ​​បែប​ប្រជា​និយម ដែល​អាច​នឹង​បង្ក​ឱ្យមាន​ជម្លោះ​ថ្មីៗ ដែល​លោក​និយាយថា​អាច​រុញ​ពិភពលោក​ធ្លាក់​ចូលទៅក្នុង “​យុគសម័យ​ខ្មៅ​ងងឹត​នៃ​ការប្រឆាំង​នឹង​សង្គម​ដែល​មាន​សេចក្តីសុខក្សេមក្សាន្ដ​”​។​

​មេដឹកនាំ​រុស្ស៊ី​រូបនេះ​និយាយថា “​ជំងឺ​រាតត្បាត​បានធ្វើឱ្យ​បញ្ហា​នានា​និង​អតុល្យភាព​កាន់តែ​ធ្ងន់ធ្ងរ​ឡើង​។ ស្ថាប័ន​អន្តរជាតិ​កំពុង​ចុះ​ខ្សោយ ជម្លោះ​ក្នុង​តំបន់​កំពុង​កើនឡើង​និង​សន្តិសុខ​ពិភពលោក​​កំពុង​អន់ថយ​”​។​

​លោកពូ​ទីន​បាន​សាទរ​ការសម្រេចចិត្តរ​បស់​រុស្ស៊ី​និង​សហរដ្ឋ​អាម៉េរិក​ក្នុង​ការបន្ត​សន្ធិសញ្ញា​គ្រប់គ្រង​អាវុធ​នុយក្លេអ៊ែរ​ចុងក្រោយ​របស់​ខ្លួន​ថា​ជា​សកម្មភាព​វិជ្ជមាន​មួយ ប៉ុន្តែ​លោក​បាន​បន្ថែមថា​ភាព​តាន​​តឹង​ដែល​កំពុង​កើនឡើង​សព្វថ្ងៃ​គឺ​ស្រដៀង​គ្នា​ទៅ​នឹង​ស្ថានភាព​មុន​សង្គ្រាមលោកលើកទី ២ ។​

​លោក​បាន​និយាយថា “​ខ្ញុំ​សង្ឃឹម​យ៉ាង​មុតមាំ​ថា​ជម្លោះ​សកល​ដ៏​ក្តៅគគុក​បែប​នេះ​នឹង​មិន​អាច​កើតឡើង​ឥឡូវនេះ​ទៅ​ចុះ​។ បើ​ចឹង​មែន​វា​នឹង​មានន័យថា អរិយធម៌​នឹង​ឈាន​ដល់​ទីបញ្ចប់​។​ប៉ុន្តែ​ស្ថានការណ៍​​សព្វថ្ងៃ​អាច​ក្លាយជា​រឿង​ដែល​មិន​អាច​ប៉ាន់ស្មាន​បាន​និង​មិន​អាច​គ្រប់គ្រង​បាន​”​។​

“​មាន​គ្រោះថ្នាក់​ពិតប្រាកដ​ដែល​ថា យើង​នឹង​ប្រឈម​មុខ​នឹង​ការធ្លាក់ចុះ​នៃ​ការអភិវឌ្ឍ​ជា​សកល​អម​ជាមួយ​នឹង​ការប្រយុទ្ធ​គ្នា​ពេញទំហឹង ការប៉ុនប៉ង​ដោះស្រាយ​ការខ្វែងគំនិត​តាមរយៈ​ការវែកមុខ​ឱ្យ​​ឃើញ​សត្រូវ​ក្នុងស្រុក​និង​បរទេស និង​ការបំផ្លាញ​តម្លៃ​ប្រពៃណី​ជា​មូលដ្ឋាន​”​។​

​លោកពូ​ទីន​វាយតម្លៃថា ស្ថានភាព​សេដ្ឋកិច្ច​កាន់តែ​អាក្រក់​ទៅៗ​គឺ​ដោយសារតែ​គំរូ​សេដ្ឋកិច្ច​សេរីនិយម​របស់​ពួក​លោក​ខាងលិច ដែល​លោក​និយាយថា “​បង្ក​ឱ្យ​មាន​ការមិនចុះសម្រុង​គ្នា​ក្នុងសង្គម ការ​ប្រកាន់ពូជសាសន៍ និង​ការរើសអើង​ជនជាតិភាគតិច​គួបផ្សំ​ជាមួយ​នឹង​ភាព​តានតឹង​នានា ដែល​ផ្ទុះ​ឡើង សូម្បី​នៅក្នុង​ប្រទេស​ដែល​មាន​ស្ថាប័ន​ស៊ីវិល​និង​ប្រជាធិបតេយ្យ​រឹងមាំ​ជា​យូរយារ​”​។​

​មេដឹកនាំ​រុស្ស៊ី​រូបនេះ​បាន​ចង្អុលបង្ហាញ​នូវ​អ្វី​ដែល​លោក​ពណ៌នា​ថា​ជា​តួនាទី​អវិជ្ជមាន​របស់​ក្រុមហ៊ុន​បច្ចេកវិជ្ជា ដែល​បើក​ដំណើរការ​បណ្តាញ​សង្គម​កំពូលៗ ដោយ​លើកឡើង​ថា​ពួកគេ​បាន​រំលោភ​​បំពាន​តួនាទី​របស់​ពួកគេ​និង​ព្យាយាម​គ្រប់គ្រង​សង្គម​ជំនួស​ស្ថាប័ន​ប្រជាធិបតេយ្យ​ស្របច្បាប់​និង​ដណ្តើម​សិទ្ធិ​បុគ្គល​ដើម្បី​សម្រេច​ពី​របៀប​រស់នៅ​និង​ទស្សនៈ​អ្វី​ដែល​អាច​បង្ហាញ​បាន​”​។​

​លោក​បាន​បន្ថែមថា ក្រុមហ៊ុន​បច្ចេកវិជ្ជា​មិនមែន​គ្រាន់តែ​ជា​យក្ស​សេដ្ឋកិច្ច​ប៉ុណ្ណោះ​ទេ ប៉ុន្តែ​នៅក្នុង​តំបន់​ខ្លះ ពួកគេ​កំពុង​ប្រកួតប្រជែង​ជាមួយ​រដ្ឋ​រួចទៅហើយ​។​

​លោកពូ​ទីន​និយាយថា “​យើង​បានឃើញ​វា​ទាំងអស់​នៅ​សហរដ្ឋ​អាម៉េរិក​”​។ លោក​និយាយ​នេះ​គឺ​សំដៅលើ​កុបកម្ម​លើ​វិមាន​កា​ពី​តូ​ល​ដែល​ញុះញង់​ដោយ​លោក​ដូណាល់ ត្រាំ​ដែល​ក្រោយមក​បាន​នាំទៅដល់​​ការហាមឃាត់​អតីត​ប្រធាន​ធិបតី​រូប​នេះ​ពី​សំណាក់ Twitter ដែល​ជា​ចំណាត់ការ​មួយ​បង្ក​ឱ្យ​មាន​ការ​មិន​ពេញចិត្ត​ក្នុង​បណ្តា​ប្រទេស​អឺរ៉ុប​ជាច្រើន​ព្រោះ​ត្រឹម​ជា​បណ្តាញ​សង្គម​សោះ​ហ៊ាន​ហាម​ប្រធានា​​ធិបតី​។​

​សម្តី​របស់​លោក​ពូ​ទីន​ធ្វើ​ឡើងខណៈ​រុស្ស៊ី​កំពុង​បង្កើន​សម្ពាធ​លើ​សកម្មភាព​របស់​ក្រុមហ៊ុន​បណ្តាញ​សង្គម​យក្ស​របស់​បរទេស​ដែល​មិន​ត្រូវបាន​ត្រួតពិនិត្យ​ដោយ​រដ្ឋ​ដូចគ្នា​ទៅ​នឹង​បណ្តាញ​ផ្សព្វផ្សាយ​ព័ត៌​​មាន​ភាគច្រើន​៕

លោកពូ​ទីន​ព្រមាន​អំពី​ទីបញ្ចប់​នៃ​អរិយធម៌​មនុស្ស​

ទីតាំងផ្សាយពាណិជ្ជកម្ម

- Advertisment -

Most Popular