Home ព័ត៌មានអន្តរជាតិ ចិន​ព្រមាន​តៃ...

ចិន​ព្រមាន​តៃវ៉ាន់​ថា ការប្រកាស​ឯករាជ្យ​ស្មើនឹង​ការប្រកាសសង្គ្រាម​

​ប្រែ​សម្រួល : កញ្ញា​ដា​លី​ស ៖ ចិន​រឹតបន្តឹង​ភាសា​របស់​ខ្លួន​ចំពោះ​កោះ​តៃវ៉ាន់​កាលពី​ថ្ងៃ​ព្រហស្បតិ៍ ដោយ​ធ្វើ​ការព្រមាន​បន្ទាប់ពី​បង្កើន​សកម្មភាព​យោធា​នៅក្បែរ​កោះ​នេះ​ថា “​ឯករាជ្យ​មាន​ន័យ​ថា​សង្គ្រាម​” ហើយ​ថា​កងកម្លាំង​ប្រដាប់អាវុធ​របស់​ខ្លួន​កំពុង​ធ្វើ​សកម្មភាព​ដើម្បី​ឆ្លើយតប​នឹង​ការ​ញុះញង់​និង​ការជ្រៀតជ្រែក​ពី​បរទេស​។​

​កោះ​តៃវ៉ាន់ ដែល​ចិន​អះអាងថា​ជា​ទឹកដី​របស់​ខ្លួន បាន​រាយការណ៍​ថា​យន្តហោះ​ចម្បាំង​និង​យន្តហោះ​ទម្លាក់​គ្រាប់បែក​របស់​ចិន​ជាច្រើន​គ្រឿង​បាន​ចូល​ទៅក្នុង​តំបន់​កំណត់​អត្តសញ្ញាណ​ការពារ​ដែន​អា​​កាស​នៅ​ភាគ​និរតី​របស់ខ្លួន​កាលពី​ចុង​សប្តាហ៍​មុន ជា​ហេតុ​ជំរុញ​ឱ្យ​រដ្ឋាភិបាល​ក្រុង​វ៉ាស៊ីនតោន​ទទូច​ឱ្យ​រដ្ឋាភិបាល​ក្រុង​ប៉េកាំង​បញ្ឈប់​ការដាក់​សម្ពាធ​លើ​កោះ​តៃវ៉ាន់​។​

​ចិន​ជឿ​ថា​រដ្ឋាភិបាល​ជាប់ឆ្នោត​តាម​បែប​ប្រជាធិបតេយ្យ​របស់​កោះ​តៃវ៉ាន់​កំពុង​នាំ​កោះ​នេះ​ឆ្ពោះទៅរក​ការប្រកាស​ឯករាជ្យ​ជា​ផ្លូវការ ទោះបី​ប្រធានាធិបតី​តៃវ៉ាន់ សៃ អ៊ីង​វិន​និយាយម្តង​ហើយ​ម្តងទៀត​ថា ខ្លួន​ជា​ប្រទេស​ឯករាជ្យ​រួច​ទៅ​ហើយ ដែល​មានឈ្មោះ​ថា សាធារណរដ្ឋ​ចិន ដែល​ជា​ឈ្មោះ​ផ្លូវការ​របស់​ខ្លួន​។​

តៃវ៉ាន់មានឈ្មោះផ្លូវការថា សាធារណរដ្ឋ​ចិន តែចិនចាត់ទុកវាជាផ្នែកមួយនៃទឹកដីរបស់ខ្លួន ដែលនឹងត្រូវបង្រួបបង្រួមគ្នាឡើងវិញនៅថ្ងៃណាមួយ

​នៅពេល​សួរ​នៅឯ​សន្និសីទ​សារព័ត៌មាន​ប្រចាំខែ​អំពី​សកម្មភាព​ថ្មីៗ​របស់​កងទ័ពអាកាស លោក វូ ឈៀន អ្នកនាំពាក្យ​ក្រសួង​ការពារ​ជាតិចិន បាន​និយាយថា​កោះ​តៃវ៉ាន់​គឺជា​ផ្នែក​មួយ​មិន​អាច​កាត់​​ផ្តាច់​បាន​ពី​ប្រទេស​ចិន​។​

​លោក​បាន​និយាយថា​”​សកម្មភាព​យោធា​ដែល​ធ្វើឡើង​ដោយ​កងទ័ព​រំដោះប្រជាជន​ចិន​នៅ​ច្រក​សមុទ្រ​តៃវ៉ាន់​គឺជា​សកម្មភាព​ចាំបាច់​ដើម្បី​ដោះស្រាយ​ស្ថានភាព​សន្តិសុខ​បច្ចុប្បន្ន​នៅ​ច្រក​សមុទ្រ​តៃវ៉ាន់​​និង​ដើម្បី​ការពារ​អធិបតេយ្យភាព​និង​សន្តិសុខ​ជាតិ​”​។​

​លោក​បាន​បន្ថែមថា “​សកម្មភាព​ទាំងនោះ​គឺជា​ការឆ្លើយតប​មែនទែន​និង​មិន​លេងសើច​ចំពោះ​ការជ្រៀតជ្រែក​និង​ការ​បង្កហេតុ​ពី​ខាងក្រៅ​ដោយ​កម្លាំង​ឯករាជ្យ​របស់​តៃវ៉ាន់​”​។​

​លោក​វូ​និយាយថា ប្រជាជន​មួយ​ក្តាប់​តូច​នៅ​កោះ​តៃវ៉ាន់​កំពុង​ស្វះស្វែង​ប្រកាស​ឯករាជ្យ​របស់​កោះ​នេះ​។​

​លោក​បាន​បន្ថែមថា “​យើង​ព្រមាន​កម្លាំង​ឯករាជ្យ​តៃវ៉ាន់​ថា អ្នក​ដែល​លេង​ជាមួយ​ភ្លើង នឹងរ​លា​ក​ខ្លួនឯង​។ ឯករាជ្យ​តៃវ៉ាន់​មានន័យថា​សង្គ្រាម​”៕

លោក វូ ឈៀន អ្នកនាំពាក្យ​ក្រសួង​ការពារ​ជាតិចិន បាន​និយាយថា​កោះ​តៃវ៉ាន់​គឺជា​ផ្នែក​មួយ​មិន​អាច​កាត់ផ្តាច់​បាន​ពី​ប្រទេស​ចិន​

ទីតាំងផ្សាយពាណិជ្ជកម្ម

- Advertisment -

Most Popular