Home ព័ត៌មានសំខាន់ៗ អាជីវករ ចង់ឱ្...

អាជីវករ ចង់ឱ្យមាន​ការផ្លាស់ប្តូ​រប្រធាន​ផ្សារ​សាមគ្គី ទី​រួម​ខេត្តកំពត ព្រោះ​អសកម្ម​ការងារ

ដោយៈ បូកគោ / កំ​ពតៈ អាជីវករ​ផ្សារ​សាមគ្គី ទី​រួម​ខេត្តកំពត ដែល​ភាគច្រើន ជា​អ្នកលក់ គ្រឿងអលង្ការ និង​ដូរ​លុយ បាន​សម្តែង​ការមិន​ពេញចិត្ត ចំពោះ​ប្រធាន​ផ្សារ ដោយ​ចោទ ប្រកាន់ អំពី​ការបង្ក​ឱ្យមាន ភាពអនាធិបតេយ្យ បាត់បង់​សណ្តាប់ធ្នាប់ ក៏ដូចជា ភាពមិន​អើពើលើ​បញ្ហា​អនាម័យ ក្នុង​ផ្សារ​ជាដើម​។ ដើម្បីឱ្យ​ស្ថានភាព​ផ្សារ ដ៏​សំខាន់​មួយ​នេះ មាន​ភាព ល្អប្រសើរ ដូចដើម អាជីវករ​ទាំងអស់ តម្រូវឱ្យមាន​ការផ្លាស់​ប្តូរ ប្រធាន​ផ្សារ សព្វថ្ងៃ ដោយ​យក​អ្នកថ្មី មក​ជំនួស​វិញ​។​

​ក្នុង​លក្ខខណ្ឌ សុំ​មិន​បញ្ចេញ​ឈ្មោះ អាជីវករ​មួយរូប បាន​រៀបរាប់ថាៈ សព្វថ្ងៃ ភាព​អ​នា ធិបតេយ្យ នៅ​បរិវេណ​ផ្សារ​សាមគ្គី ទី​រួម​ខេត្តកំពត កំពុង​លេចឡើង​ពេញបន្ទុក ព្រោះតែ ប្រធាន​ផ្សារ មិន​អើពើ ឬ​អាច​និយាយបានថា បណ្តែតបណ្តោយ ឱ្យ​កើតមាន​ជា​ថ្នូរ​នឹង​ការ ទទួល​លាភសក្ការៈ​។ ភាព​អសកម្ម​ទាំងនោះ ដូចជា អនុញ្ញាតឱ្យ អ្នកលក់​មួយចំនួន ដាក់​អីវ៉ាន់ លយ​ដល់​ផ្លូវ និង​ការពង្រីក​តូប ដោយ​រៀប​ឥដ្ឋ និង​បាំង​ស័ង្កសី​ធ្វើឱ្យ​បាត់​ពន្លឺ ចេញចូល ខូច​សណ្តាប់ធ្នាប់ ប៉ះពាល់​សោភ័ណភាព ពិសេស​បង្ក​ឱ្យ ផ្លូវ​រួម​តូចចង្អៀត ស្ទើរ​ដើរ​ចៀស​គ្នា​មិន​រួច​។ តាមពិត​ផ្សារ​នេះ បាន​ជួសជុល និង​ធ្វើ​ឡើងវិញ ប្រកបដោយ សោភ័ណភាព ពន្លឺ​គ្រប់គ្រាន់ ហើយ​មាន​ភាព​ទូលាយ ក្រោម​ការឧបត្ថម្ភ​ថវិកា​ផ្ទាល់ របស់​សម្តេច​តេ​ជោ នាពេល​កន្លងមក​។​

​អាជីវករ​ដដែល បាន​បន្តថាៈ មកដល់​បច្ចុប្បន្ន ការលក់ដូរ មាន​ភាពច្របូកច្របល់ តូប​លក់​មាស កើតមាន​ក្នុង​ផ្សារ​គ្រឿងទេស កន្លែង​លក់​សម្លៀកបំពាក់ ឬ​នៅ​ជាមួយ​តូប លក់​ត្រី សាច់ជ្រូក ជាដើម​។ ចំណែក​តូប​លក់​ខោអាវ នៅ​លាយឡំ​នឹង​កន្លែង​លក់​បន្លែ ផ្លែឈើ នំចំណី​ផ្សេងៗ​ទៀត​។ បើ​និយាយ​ពី​សំរាម​វិញ គឺ​នៅ​គរ​ពាសវាល​ពាសកាល ហើយ​មិន​ត្រឹម​ពុំ​អើពើ ជម្រះ​សម្អាត ស្របតាម​ការបង់​លុយ របស់​អាជីវករ និង​ការទារ ឡើងថ្លៃ រាល់​ខែ​នោះទេ គឺ​ថែមទាំង​ទុក ឱ្យ​អ្នកលក់​បោស ដោយ​ខ្លួនឯង​ទៀតផង​។​

​ប្រភព​ដដែល បានបញ្ជាក់​ថាៈ រាល់ពេល​អាជីវករ មាន​បញ្ហា​មិនដែល​ឃើញ​ប្រធាន​ផ្សារ គណៈកម្មការ ឬ​សន្តិសុខ នៅ​ប្រចាំការ ដើម្បី​ជួយ​សម្របសម្រួល​ទេ ពោលគឺ គណៈកម្មការ ផ្សារ មាន​ភាព​អសកម្ម​គ្រប់យ៉ាង​។ ករណី​ទាំងនេះ អាជីវករ បានដាក់​ពាក្យ​ចូលទៅ​សាលាខេត្ត​រួចរាល់ និង​សូមឱ្យ​មានការ​ផ្លាស់ប្តូរ ប្រធាន​ផ្សារ ដោយ​ដាក់​អ្នកថ្មី មក​ជំនួស​វិញ​។ ប៉ុន្តែ​បើ​មិនមាន កិច្ច​អន្តរាគមន៍ ពី​លោក​អភិបាលខេត្ត​ទេនោះ ពួកគាត់​នឹង​បន្តទៅ​ថ្នាក់លើ​ទៀត​។​

​ពាក់ព័ន្ធ​នឹង​ករណី​ទាំងនេះ លោក ប៉ែន សត្យា ប្រធាន​ផ្សារ​សាមគ្គី ទី​រួម​ខេត្តកំពត បាន​បំភ្លឺថាៈ លោក​សូម​ទទួលស្គាល់ ចំពោះ​ការរិះគន់​មួយចំនួន ដូចជា ការដាក់​អីវ៉ាន់ លៀន​លយ​លើផ្លូវ​ជាដើម ពិសេស​តែង​កើតឡើង នៅពេល​រដូវ​បុណ្យទាន ម្តងៗ​។ ជាធម្មតា ពីមុន​មនុស្ស​តិច ទើប​ផ្ទៃ​ផ្សារ នៅ​ទូលាយ តែ​មកដល់​សព្វថ្ងៃ សូម្បី​កូនចៅ អាជីវករ ភាគច្រើន មានគូស្រករ បាន​ចាប់​ប្រកបមុខរបរ ដូច​ឪពុកម្តាយ ធ្វើឱ្យ​អ្នកលក់ដូរ មាន​ចំនួន​កើនឡើង ដូច​អ្នកទិញ​ជា​ផ្នែក​មួយ បង្ក​នូវ​ភាព​ចង្អៀត ព្រោះ​ទំហំ​ផ្សារ​នៅ ដដែល​។​

​លោក​ប្រធាន​ផ្សារ បាន​បន្តថាៈ ចំពោះ​ការពង្រីក ឬ​បង្កើន​ចំនួន​តូប មិនអាច​ធ្វើ​បានទេ ដោយ​សព្វថ្ងៃនេះ មាន​ជាង ៨០០ តូប​ទៅហើយ​។ ប៉ុន្តែ​ការកែលម្អ​នោះ មាន​មែន ព្រោះ​ជាការ​អភិវឌ្ឍ ឱ្យទាន់​សម័យកាល ហើយ​បើ​មានការ​ជំទាស់ ឬ​ជម្លោះ​កើតឡើង រវាង​អ្នក​នៅក្បែរ​គ្នា ក៏​មិន​អាចធ្វើ​បានដែរ ដើម្បី​បញ្ចៀស​វិវាទ​។ ម្យ៉ាងទៀត លោក​សូម បដិសេធ​នូវ ការចោទប្រកាន់ថា បានទទួល​លាភសក្ការៈ ក្នុង​ហេតុផល​ណាមួយ សូម្បី​លុយ​ភាស៊ី ក៏​លោក​មិនមាន​សិទ្ធិ​កាន់​ដែរ កុំថាឡើយ រហូតដល់​អនុញ្ញាត ឱ្យ​អាជីវករ កែលម្អ​តូប​លក់ដូរ​នោះ​។ និយាយ​រួម លោក ទទួល​បានតែ​ប្រាក់ខែ​ប៉ុណ្ណោះ​។

ចំណែកលោក​លាង រឿងសុធី អភិបាលក្រុងកំពតបានពន្យល់ប្រាប់រស្មីកម្ពុជាថាបញ្ហាបណ្តឹងរបស់អាជីវករគឺអាជ្ញាធរបានទទួលនិងយកចិត្តទុកដាក់ណាស់។ពេលនេះអាជ្ញារធកំពុងតែពិនិត្យនិងដំណើរការទៅតាមនីតិវិធី។ចំពោះបញ្ហាសំរាមគឺ តែងតែធ្វើការសំអាតនៅពេលយប់ដោយមិនទុកចោលនោះឡើយ៕/V-PC

ទីតាំងផ្សាយពាណិជ្ជកម្ម

- Advertisment -

Most Popular