​ពលករ មកពី​ក្រៅប្រទេស ជាង ២ ពាន់​នាក់ ក្រោយ​ធ្វើ​ច​ត្តា​ឡី​ស័ក និង​តេស្ត បាន​បញ្ជាក់ថា គ្មាន​កូ​វីដ​-១៩

​ដោយៈ គ្រញូង / បាត់ដំបងៈ ដោយយោង​របាយការណ៍ របស់​មន្ទីរ​សុខាភិបាល​ខេត្ត លោក សឿ​ម ប៊ុន​រិ​ទ្ធ អភិបាលរង​ខេត្ត និង​ជា​អ្នកនាំពាក្យ សាលាខេត្ត​បាត់ដំបង បានឱ្យដឹង​នៅ​ថ្ងៃទី​២៩ មករា​នេះ នៅ​សាលាខេត្ត​ថាៈ ពលករ​ខ្មែរ ដែល​ត្រឡប់​មកពី ប្រទេស​ថៃ គិត​ត្រឹម​ថ្ងៃទី ២៩ ខែមករា ឆ្នាំ​២០២១ នេះ មាន​ចំនួន ២.៣៩៧ នាក់​ហើយ ត្រូវបាន​រដ្ឋបាលខេត្ត អនុញ្ញាតឱ្យ​ពួកគេ ត្រឡប់​ទៅ​ស្រុកកំណើត ជួបជុំ​គ្រួសារ​វិញ ក្រោយពី​ធ្វើ​ច​ត្តា​ឡឺ​ស័ក និង​តេស្ត ដោយ​គ្មាន​វិជ្ជមាន ជំងឺឆ្លង​កូ​វីដ​១៩ ក្នុងចំណោម ពលករ ដែល​ចូលមក​សរុប ចំនួន ៣.៦៣៣ នាក់ ។​

​លោក​អភិបាលរង ខេត្តបាត់ដំបង បាន​មានប្រសាសន៍ថាៈ ការដែល​អាជ្ញាធរខេត្ត អនុញ្ញាតឱ្យ​ពលករ ដែល​មកពី​ប្រទេស​ថៃ ត្រឡប់ទៅផ្ទះ​សម្បែង​រៀងៗ​ខ្លួន​វិញ​នេះ ដោយសារតែ​ខាង​មន្ត្រី​សុខាភិបាល​ខេត្ត បានដាក់​ពួកគាត់ ឱ្យធ្វើ​ច​ត្តា​ឡី​ស័ក រយៈពេល ១៤ ថ្ងៃ​រួចរាល់ ហើយក៏​បានធ្វើ​តេស្ត ២ ដង ដោយ​លទ្ធផល​ឃើញថា គ្មាន​វីរុស​កូ​វីដ​-១៩​ទេ​។​

​លោក​បាន​បន្តថាៈ ចំណែក​ពលករ ដែល​នៅសល់ និង​អ្នកថ្មី នៅ​បន្តធ្វើ​ច​ត្តា​ឡី​ស័ក បន្តទៀត មុននឹង​ឱ្យ​ពួកគាត់​ត្រឡប់ទៅផ្ទះ ជួបជុំ​គ្រួសារ ដើម្បី​ជៀសវាង​ឆ្លង​ចូល​សហគមន៍ ។​

​លោក​បាន​បន្តថាៈ ខណៈពេលដែល​ប្រទេស​ថៃ នៅ​កំពុងតែ​ប្រឈមមុខ ខ្លាំង​នឹង​ជំងឺ​កូ​វីដ​១៩ នៅ​បណ្តា​ខេត្ត​នានា ដែលមាន​ប្រជាពលរដ្ឋ រាប់រយ​នាក់ ឆ្លង​ជំងឺ​កូ​វីដ ១៩ រៀងរាល់​ថ្ងៃនោះ រដ្ឋបាលខេត្ត បាន​បន្ត​សហការ ជាមួយ​ភាគី​ថៃ និង ស្ថាប័ន​ពាក់ព័ន្ធ ដូចជា មណ្ឌល​សុខភាព មន្ទីរ​សុខាភិបាល​ខេត្ត កងកម្លាំង​តាម​ព្រំដែន​ជាដើម ដើម្បី​ពង្រឹង​ការចេញចូល​តាម​ព្រំដែន និង​បន្ត​អប់រំ ផ្សព្វផ្សាយ ពី​វិធានការណ៍​នានា ក្នុង ការការពារ​ការឆ្លង​រីក​រាលដាល ជំងឺ​កូ​វីដ ១៩ និង​រឹតបន្តឹង​ការចេញ ចូល​ពី​សំណាក់ ពលករ​ខ្មែរ ពី​ប្រទេស​ថៃ ចូលមក​កម្ពុជា និង​ចេញពី​ប្រទេស​កម្ពុជា ទៅ​ប្រទេស​ថៃ តាម​ច្រករបៀង ឬ​ច្រកទ្វារ​ស្របច្បាប់ ។​

​លោក​បាន​អំពាវនាវ ឱ្យ​ប្រជាពលរដ្ឋ ជាពិសេស ពលករ ដែល​ត្រឡប់​មកពី​ក្រៅប្រទេស​ទាំងអស់ ត្រូវធ្វើ​ច​ត្តា​ឡឺ​ស័ក ដោយ​ដាក់​នៅ​ដាច់ដោយឡែក ១៤ ថ្ងៃ​សិន ហើយ​ត្រូវ​ថែរក្សា នូវ​អនាម័យ​ខ្លួនប្រាណ និង​ជុំវិញ​កន្លែង ដែល​ខ្លួន​រស់នៅ ឱ្យបាន​ស្អាត​ជាប្រចាំ រួមទាំង​ប្រកាន់​ភ្ជាប់ នូវ​គោលការណ៍ ដែល​រាជរដ្ឋាភិបាល ក៏ដូចជា ក្រសួងសុខាភិបាល បានដាក់​ចេញ ដើម្បី​ការពារ​ខ្លួន និង​គ្រូ​សារ ពិសេស​ត្រូវ​ទប់ស្កាត់ ការឆ្លង​ពី​មនុស្ស​មា្ន​ក់ ទៅ​មនុស្ស​ម្នាក់ទៀត និង​ទៅ​សហគមន៍ ។​

​សូម​បញ្ចា​ក់ថា យោងតាម​សេចក្តីប្រកាស​ព័ត៌មាន របស់​ក្រសួងសុខាភិបាល គិត​ត្រឹម​ព្រឹក​ថ្ងៃទី​២៩ ខែមករា ឆ្នាំ​២០២១​នេះ កម្ពុជា រកឃើញ​អ្នក​ឆ្លង​កូ​វីដ​-១៩ សរុប​ចំនួន ៤៦៣ នាក់ ក្នុងនោះ ព្យាបាល​ជាសះស្បើយ ចំនួន ៤៣៨ នាក់ និង​អ្នក​កំពុង​សម្រាក​ព្យាបាល នៅ​មន្ទីរពេទ្យ​ចំនួន​២៥​នាក់​៕/V

ទីតាំងផ្សាយពាណិជ្ជកម្ម

- Advertisment -

Most Popular