Home ព័ត៌មានជាតិ សេដ្ឋកិច្ច ក្រសួងកសិកម្ម...

ក្រសួងកសិកម្ម​ចុះ​ដល់​ក្រុមហ៊ុន​សម្បទាន​ដី​សេដ្ឋកិច្ច​ពីរ​នៅ​ខេត្តក្រចេះ

ដោយៈ​ជា សីហៈ​/​ភ្នំពេញៈ នៅ​ព្រឹក​មិញ​នេះ លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង នេសាទ បាន​ដឹកនាំ​មន្ត្រី​ចុះទៅពិនិត្យ​ដី​សម្បទាន​ក្រុមហ៊ុន​ពីរ​នៅ​ខេត្តក្រចេះ ស្រុក​ស្នួល ឃុំ​ខ្សុំ ភូមិ​ស្រែ​ថ្មី ។

​ក្រុមហ៊ុន​ទាំងពីរ​នេះ​គឺ​ក្រុមហ៊ុន Binhphuoc Kratie Rubber2 Company Limited និង​ក្រុមហ៊ុន Eastern Rubber (Cambodia) Co., Ltd ដែល​នៅពេលនេះ ក្រុមហ៊ុន​បាន​កំពុងតែ​ដាំ​ដុះ​ដំណាំ​ចេក អំបូង​លឿង​ចំនួន ២.៨១១​ហ​.​ត ស្វាយ​ចំនួន ២០៥​ហ​.​ត និង​ខ្នុរ​ចំនួន ២៣១​ហ​.​ត ។

​បន្ទាប់ពី​បាន​អញ្ជើញ​ចុះ​ពិនិត្យ​ខ្សែ​ច្រវាក់​ផលិតកម្ម ប្រមូល​ផល លាង​សំអាត ធ្វើ​អនាម័យ និង វេច​ខ្ចប់​រួចមក លោក​រដ្ឋមន្ត្រី​បាន​ចូលរួម​អបអរសាទរ និង​វាយតម្លៃ​ខ្ពស់​ចំពោះ​កិច្ចខិតខំ​ប្រឹង ប្រែង ពុះពារ និង​ជំនះបាន​នូវ​រាល់​បញ្ហា​ប្រឈម​នានា​រហូត​សម្រេចបាន​ជោគជ័យ​ដែល ស្តែងចេញ​ឲ្យ​ឃើញ​នូវ​សមិទ្ធផល​ដូច​យើង​បានទទួល​នា​ថ្ងៃនេះ​។

​ភ្ជាប់​ទៅនឹង​ការវិនិយោគ​អភិវឌ្ឍន៍​ដី​សប្បទាន​សេដ្ឋកិច្ច​ដែល​ទទួលបាន​សិទ្ធិ​ពី​រាជរដ្ឋាភិបាល លោក​រដ្ឋមន្ត្រី​បាន​ជម្រាបជូន​ក្រុមហ៊ុន​ថា ស្ថិតក្នុង​បរិបទ​នៃ​ការរីក​រាលដាល​ជា​សកល​ជំងឺឆ្លង​កូ​វីដ​-១៩ ការអភិវឌ្ឍ​នៅនឹងកន្លែង​គឺជា​ជម្រើស​ដ៏​ល្អ ក្នុងន័យ​ត្រូវ​បង្កើន​ផលិតភាព​ផលិតកម្ម​លើ​ដំណាំ​ក​សិ​-​ឧស្សាហកម្ម​ឲ្យ​អស់​សក្តានុពល ប្រើប្រាស់​បច្ចេកវិទ្យា​កសិក​ម្ម បង្កើត​រោងចក្រ​កែច្នៃ ស​ម្ងួ​ត វេច​ខ្ចប់ និង​នាំចេញ ដើម្បី​បង្កើត​ការងារ ប្រាក់ចំណូល​ក្នុង​គ្រួសារ កាត់បន្ថយ​ភាពក្រីក្រ​ក្នុង​តំបន់​។

​ក្រសួងកសិកម្ម រុក្ខាប្រមាញ់ និង​នេសាទ ដែលមាន​អគ្គនាយកដ្ឋាន​កសិកម្ម​ជា​សេនាធិការ បាននិងកំពុង​ខិតខំ​ពង្រឹង​កិច្ចសហប្រតិបត្ដិការ​ជាមួយ​ដៃគូ​អភិវឌ្ឍន៍ និង​វិស័យ​ឯកជន ដើម្បី​គាំទ្រ​លើ​ការវិនិយោគ​គ្រប់​ខ្សែ​ច្រវាក់​តម្លៃ​កសិកម្ម​ចាប់ពី​ចំណុច A ដល់ Z តាមរយៈ​ការបង្កើន​ផលិតភាព​ផលិតកម្ម ការ​វេច​ខ្ចប់ ការរក្សា​ស្តុក​ទុក ការកែច្នៃ​ប្រកបដោយ​គុណភាព អនាម័យ និង​សុវត្ថិភាព សម​ស្របតាម​ស្តង់ដា​ទីផ្សារ​នាំចេញ​។ ដើម្បី​សម្រេច​គោលដៅ​នេះ​។

​លោក​រដ្ឋមន្ត្រី​បាន​សំណូមពរ​ឲ្យ​ក្រុមហ៊ុន​ទាំងពីរ​បន្ត​រក្សា​កិច្ចសហប្រតិបត្តិការ​ឲ្យ​មាន​លក្ខណៈ​ប្រទាក់ក្រឡា​គ្នា​ល្អជា​មួយ​អគ្គនាយកដ្ឋាន​កសិកម្ម​ក្នុងការ​បំពេញបែបបទ ឬ​លក្ខខណ្ឌ​តម្រូវ​ភូតគាម​អនាម័យ​មុន​ធ្វើការ​នាំចេញ​ធ្វើយ៉ាងណា​ចូលរួម​គាំទ្រ ជំរុញ និង​បង្កើន​បរិមាណ​នាំចេញ​ចេក ខ្នុរ និង​ស្វាយ​ទៅកាន់​ទីផ្សារ​អន្តរជាតិ​ឲ្យ​កាន់ តែ​ច្រើន​ថែមទៀត​នាពេល​អនាគត​។


​នាឱកាស​នេះ ឯកឧត្តម​រដ្ឋមន្ត្រី​បាន​ណែនាំ​ក្រុមហ៊ុន​គួរប្រើ​ប្រាស់ និង​សរសេរ​ភាសា​ខ្មែរ​ជា​គោល​ហើយ​ក្រុមហ៊ុន​ក៏ត្រូវ​បង្កើន​ការយកចិត្តទុកដាក់​លើ​ស្ថានភាព​ជីវភាព និង​សុខភាព​របស់​បងប្អូន​បុគ្គលិក កម្មករ​ឲ្យ​បានល្អ​ប្រសើរ ដើម្បី​ចៀស​ផុតពី​ជំងឺឆ្លង​កូ​វីដ​-១៩​។​

​ក្នុង​ឆ្នាំ​២០២០ ក្រុមហ៊ុន Binhphuoc Kratie Rubber2 Company Limited បាន​នាំចេញ​ចេកអំបូង​លឿង​ចំនួន ៣៦.០០៤​តោន (​ក្នុង​នោះបាន​នាំ ចេញទៅ​កាន់​ប្រទេស​ចិន​ចំនួន ៣៥.១៣៣,៥៥​តោន និង​វៀតណាម​ចំនួន ៨៧០​តោន និង​នាំចេញ​ស្វាយ​ស្រស់​ចំនួន ៨៥១​តោន ទៅកាន់​ប្រទេស​វៀតណាម​។ ដោយឡែក​ក្រុមហ៊ុន Eastern Rubber (Cambodia) Co., Ltd មាន​ផ្ទៃ​ដាំ​ដុះ​ដំណាំ​ចេកអំបូង​លឿង​ចំនួន ៩៧៧​ហ​.​ត និង​ខ្នុរ​ចំនួន ១៦១​ហ​.​ត និង​បាន​នាំចេញ​ចេកអំបូង​លឿង​ចំនួន ៤២០​តោន និង​ផ្លែ​ខ្នុរ​ចំនួន ១៨៨​តោន ទៅ កាន់​ប្រទេស​វៀតណាម​៕

ទីតាំងផ្សាយពាណិជ្ជកម្ម

- Advertisment -

Most Popular