​សប្បុរសជន ផ្តល់​សម្ភារ​សិក្សា ជូន​សិស្សានុសិស្ស​ក្រីក្រ​បំផុត នៅ​សាលាបឋមសិក្សា ក្រចាប់​

​ដោយៈ ទេ​ពក​ង្រី / កំពង់ឆ្នាំងៈ មន្ត្រី​ការិយាល័យ​អប់រំ នៃ​មន្ទីរអប់រំ យុវជន និង​កីឡា​ខេត្តកំពង់ឆ្នាំង អមដំណើរ​ដោយ​អភិបាលរង ស្រុក​បរិបូណ៌ នៅ​ព្រឹក​ថ្ងៃទី​៣០ ខែមករា ឆ្នាំ​២០២១ បាន​នាំយក​អំណោយ​របស់​សប្បុ​រស​ជន ជា​សម្ភារ​សិក្សា មានដូចជា សៀវភៅ ប៊ិច និង​ខ្មៅ​ដៃ ទៅ​ប្រគល់ជូន​សិស្ស ចំនួន ៣៤ នាក់ ដែល​ក្រីក្រ​បំផុត តែមាន​ចិត្ត​ចង់​រៀន នៅ​សាលាបឋមសិក្សា ក្រចាប់ ស្ថិតនៅ​ក្នុងភូមិ​ត្រពាំង​ចាន់ ឃុំ​ត្រពាំង​ចាន់ ស្រុក​បរិបូណ៌ ។

​នៅក្នុង​ឱកាស​នោះ លោក ផល សុភាព អភិបាលរង ស្រុក​បរិបូណ៌ បាន​មានប្រសាសន៍ថាៈ ជាការ​ពិតណាស់ ក្រោយពី​ទទួលដំណឹង​ថា ក្មួយៗ ដែលជា​សិស្ស​ក្រីក្រ​បំផុត ចំនួន ៣៤ នាក់ មានចិត្ត​ចង់​រៀន លោក​ក៏បាន​ស្នើ​ទៅ​មន្ទីរអប់រំ យុវជន និង​កីឡា ដើម្បី​ស្នើសុំ​សម្ភារ​សិក្សា មក​ជូន​ក្មួយ នៅពេលនេះ ហេតុ​ដូច្នេះហើយ សូម​ក្មួយ​ខំរៀន​សូត្រ ដើម្បី​ឲ្យ​បានក្លាយ ជា​កូន​ល្អ សិស្ស​ល្អ ហើយ​មិនត្រូវ​បោះបង់ ការសិក្សា​នោះទេ ព្រោះ​ដើម្បី​អនាគត​រុងរឿង ។​

​ជាមួយគ្នា​នោះ លោក លី រតនៈ មន្ត្រី​ការិយាល័យ នៃ​មន្ទីរអប់រំ យុវជន និង​កីឡា ខេត្តកំពង់ឆ្នាំង ក៏បាន​ផ្ដាំផ្ញើ​លោកគ្រូ​អ្នកគ្រូ ត្រូវ​យកចិត្តទុកដាក់ បង្រៀន​សិស្ស ស្របតាម​គោលការណ៍ របស់​ក្រសួង​អប់រំ យុវជន និង​កីឡា ដែល​បាន​ដាក់ចេញ និង​ត្រូវ​ណែនាំ​ក្មួយៗ ឱ្យ​ចេះ​អនាម័យ​ចៀសវាង​ការឆ្លង​ជំងឺ​កូ​វីដ​១៩​។​

​លោក លី រតនៈ បានបញ្ជាក់​ថាៈ ថ្ងៃនេះ លោក​បាន​នាំយក​នូវ សៀវភៅ ប៊ិច ខ្មៅ​ដៃ បន្ទាត់ ដែល​បានមកពី សប្បុរសជន​នានា មក​ផ្ដល់ជូន​សិស្ស ដែល​ចង់​រៀន ចំនួន ៣៤ នាក់ ដោយ​ក្នុង​ម្នាក់ៗ ទទួលបាន​កាបូប​មួយ ក្នុង​កាបូប​នីមួយៗ មាន សៀវភៅ ២០ ក្បាល ប៊ិច​ពណ៌​ខៀវ ២០ ដើម ប៊ិច​ក្រហម ៥ ដើម ខ្មៅ​ដៃ ៥ បន្ទាប់ ២ ជ័រលុប ២ ដុំ និង​ប្រដាប់​ចិត​ខ្មៅ​ដៃ ចំនួន ២ ។ ដោយឡែក នៅ​ថ្ងៃ​ដដែល​នេះដែរ សិស្ស​ក្រីក្រ​ម្នាក់ ឈ្មោះ ស៊ុន ប៊ុនធឿន ដែល​រៀន​នៅ​សាលា​អនុវិទ្យាល័យ ជី​សុវណ្ណ បានទទួល​អំណោយ ជា​កង់​មួយគ្រឿង របស់​សប្បុរសជន ពី​ក្រុមការងារ ខាងលើនេះ​៕/V​

ទីតាំងផ្សាយពាណិជ្ជកម្ម

- Advertisment -

Most Popular