រដ្ឋមន្ត្រី​មុខងារសាធារណៈ ជួប​លោកស្រី​ឯកអគ្គរដ្ឋទូត​ឥណ្ឌា​ពិភាក្សា​អំពី​វិស័យ​មុខងារសាធារណៈ

ដោយៈ ជា សីហៈ​/​ភ្នំពេញៈ លោក ព្រុំ សុខា រដ្ឋមន្ត្រីក្រសួង​មុខងារសាធារណៈ កាលពី​ថ្ងៃទី ២៩ ខែ មករា បានទទួល​ជួប​លោកស្រី ដេ​វ​យ៉ា​នី ឧ​. ឃូ​ប្រ៊ា​ហ្គឺ​ដេ (Devyani. U. Khobragade) ឯកអគ្គរដ្ឋទូត​ថ្មី​នៃ​សាធារណ​រដ្ឋ​ឥណ្ឌា នៅ​ទីស្តីការក្រសួង​។

​នៅក្នុង​ជំនួប​នោះ ភាគី​ទាំង​ពីរបាន ឯកភាពគ្នា​ជម្រុញ​កិច្ចសហការ​ទ្វេភាគី​លើ​វិស័យ​មុខងារសាធារណៈ​
​និង បាន​វាយតម្លៃ​ខ្ពស់​ពី​ចំណងមិត្តភាព​សហប្រតិបត្តិ​ការ​ដ៏​យូរអង្វែង​រវាង​ប្រជាជន និង​រដ្ឋាភិបាល​ប្រទេស​ទាំងពីរ កម្ពុជា​-​ឥណ្ឌា ចាប់តាំងពី​ឆ្នាំ​១៩៥២​មកម្ល៉េះ ពិសេស​នា​ដើម​ទស្សវត្ស​ឆ្នាំ​១៩៨០ ពោលគឺ​ក្រោយពេល​កម្ពុជា​បាន​រួច​ចាក​ផុតពី​របប​ប្រល័យពូជសាសន៍​នៅ​ឆ្នាំ​១៩៧៩​។​

​ក្នុងជំនួប​ពិភាក្សា​នេះ លោក​រដ្ឋមន្ត្រីក្រសួង​មុខងារសាធារណៈ និង​លោកស្រី ឯកអគ្គរដ្ឋទូត​ឥណ្ឌា បាន​ឯកភាពគ្នា​ខ្ពស់​ក្នុងការ​ជម្រុញ​កិច្ចសហប្រតិបត្តិការ​ទ្វេភាគី​ឱ្យ​កាន់តែខ្លាំង​ទ្វេ​ឡើងលើ​វិស័យ​មុខងារសាធារណៈ បន្ថែម​ពីលើ​ទំនាក់ទំនង​កិច្ចប្រតិបត្តិការ​ដែលមាន​ស្រាប់​កន្លងមក តាមរយៈ​ការបណ្តុះបណ្តាល​តាម​កម្ម​វិធី​កិច្ចសហប្រតិបត្តិការ​សេដ្ឋកិច្ច និង​បច្ចេកទេស របស់​ឥណ្ឌា (ITEC) រួមមាន​ជាអាទិ៍​៖ គម្រោង​នានា​ទាក់ទង​នឹង​វិស័យ​មុខងារសាធារណៈ ពិសេស​កិច្ចសហប្រតិបត្តិការ​រ​វាង​ក្រសួង​មុខងារសាធារណៈ​កម្ពុជា ជាមួយនឹង​ក្រសួង​គ្រប់គ្រង​បុគ្គលិក បណ្តឹង​សារទុក្ខ និង​ប្រាក់ សោធន​និវត្តន៍ លើ​ការកសាង​សមត្ថភាព​ស្ថាប័ន និង​កម្មវិធី​សហប្រតិបត្តិ​ការជាក់ស្តែង​រវាង​សាលា​ភូមិន្ទ​រដ្ឋបាល និង​មជ្ឈមណ្ឌល​ជាតិ​នៃ​អភិបាលកិច្ច​ល្អ លើ​ការបណ្តុះបណ្តាល​មន្ត្រីរាជកា​រ​។​ល​។​

​ទន្ទឹម​នោះ លោកស្រី​ឯកអគ្គរដ្ឋទូត ក៏បាន​ស្នើ​ជម្រើស​សហប្រតិបត្តិការ​មួយទៀត​ជា​លក្ខណៈ​ត្រីភាគី រវាង​ប្រទេស​កម្ពុជា ឥណ្ឌា និង​សិង្ហ​បុរី តាមរយៈ​ការពិនិត្យ​លទ្ធភាព​រៀបចំ​អោយមាន​ការបណ្តុះបណ្តាល​ដល់​មន្ត្រីរាជការ​កម្ពុ​ជា​នៅ​មជ្ឈមណ្ឌល​សហប្រតិបត្តិ​ការ​កម្ពុជា​-​សឹង្ហ​បុរី (Cambodia-Singapore Cooperation Center) នៅ​ភ្នំពេញ​៕​

ទីតាំងផ្សាយពាណិជ្ជកម្ម

- Advertisment -

Most Popular