Home ព័ត៌មានជាតិ សន្តិសុខ រមិលគុណ បង្ករ...

រមិលគុណ បង្ករ​ហិង្សា​លើ​ម្តាយៈ អាវុធហត្ថ​ចាប់ខ្លួន បញ្ជូនទៅ​តុលាការ ឃុំខ្លួន​ហើយ​

ដោយៈ ប​.​ជ័យ / បន្ទាយ​មាន​ជ័​យៈ អាវុធហត្ថ​ក្រុង​ប៉ោយប៉ែត បាន​បញ្ជូន​ខ្លួន​យុវជន​ម្នាក់ ទៅ​តុលាការខេត្ត នៅ​ថ្ងៃទី​៣០ ខែមករា ឆ្នាំ​២០២១ នេះ ហើយ​តុលាការ បានសម្រេច​ឃុំខ្លួន បន្ទាប់ពី​អាវុធហត្ថ ក្រុង​ប៉ោយប៉ែត បាន​ឃាត់ខ្លួន នៅ​ថ្ងៃទី​២៩ ខែមករា ពាក់ព័ន្ធ​ករណី​ប្រព្រឹត្ត​ហិង្សា លើ​ម្នា​យ​បង្កើត​របស់ខ្លួន ស្ថិត​ក្នុងភូមិ​សាមគ្គី​មានជ័យ សង្កាត់​-​ក្រុង​ប៉ោយប៉ែត ខេត្តបន្ទាយមានជ័យ​។

​មន្ត្រី​អាវុធហត្ថ​ក្រុង​ប៉ោយប៉ែត បានឱ្យដឹងថាៈ កូនប្រុស​រមិលគុណ​បង្ករ​ហិង្សា​លើ​ម្តាយបង្កើត​របស់ខ្លួន​នោះ ឈ្មោះ ភ័ណ និ​ត ហៅ ជ្រូក ភេទ​ប្រុស អាយុ​២២​ឆ្នាំ​។ ចំណែក​ជនរងគ្រោះ ឈ្មោះ ដាំ ម៉ៅ អាយុ​៥៣​ឆ្នាំ រស់នៅ​ក្នុងភូមិ​សាមគ្គី​មានជ័យ សង្កាត់​-​ក្រុង​ប៉ោយប៉ែត ខេត្តបន្ទាយមានជ័យ​។​

​ប្រព​ភ​ដដែល បានបញ្ជាក់​ថាៈ ក្រោយពី​ទទួលបាន​ពាក្យបណ្ដឹង របស់​ជនរងគ្រោះ ឈ្មោះ ដាំ ម៉ៅ នៅ​ថ្ងៃទី​២៩ ខែមករា ស្ដីពី​ករណី​ហិង្សា ក្នុង​គ្រួសារ របស់ខ្លួន​នោះ លោក​វរសេនីយ៍ត្រី នួន នី​ណា​រ៉ូ មេបញ្ជាការ មូលដ្ឋាន​អាវុធហត្ថ ក្រុង​ប៉ោយប៉ែត បាន​ចាត់​ឱ្យកម្លាំង ចុះ​ទៅដល់​កន្លែងកើតហេតុ ហើយ​ឃាត់ខ្លួន​ជនសង្ស័យ ឈ្មោះ ភ័ណ និ​ត ហៅ ជ្រូក យកមក​មូលដ្ឋាន​អាវុធហត្ថ​ក្រុង ដើម្បី​សួរនាំ​។​

​ជនសង្ស័យ បាន​រៀបរាប់ថាៈ កាលពី​វេលា​ម៉ោង ១០ និង ៣០​នាទី ថ្ងៃទី​២៩ មករា ក្រោយពេល​ហូបបាយ​រួច ខ្លួន​បាន​ប្រមូល​ខោអាវ​របស់ខ្លួន និង​ខោអាវ របស់​ប្អូន​ខ្លួន ដុតចោល ដោយ​គ្មាន​មូលហេតុ ។ នៅពេលនោះ ម្ដាយ​របស់ខ្លួន បាន​ស្ដីបន្ទោស និង​ជេរ មកលើ​ខ្លួន ទើប​ឱ្យ​ខ្លួន ផ្ទុះ​កំហឹង ហើយ​ខ្លួន ក៏​យក​គម្រប​ធុង​ទឹក គប់​ទៅលើ​ម្ដាយ​របស់ខ្លួន បណ្ដាលឱ្យ​រងរបួស លើ​ផ្ទៃមុខ ហើយ​ជាំភ្នែក ខាងឆ្វេង​ទៀតផង​។ មិន​ត្រឹមតែ​ប៉ុណ្ណោះ ខ្លួន​ក៏បាន​ស្ទុះ ទៅ​ច្របាច់ ក ម្ដាយ​ថែមទៀត​។

​ដោយ​ផ្អែកលើ​ចម្លើយសារភាព និង​យោងតាម​ពាក្យបណ្ដឹង ព្រមទាំង​មាន​ស្នាក​ស្នាម ជាំ​លើ​មុខ​ជនរងគ្រោះ ទើប​កម្លាំង​ការិយាល័យ បទល្មើស​ព្រហ្មទណ្ឌ អាវុធហត្ថ​ខេត្ត កសាង​សំណុំរឿង បញ្ជូន​ជនសង្ស័យ ទៅ​សាលាដំបូង​ខេត្ត ចាត់ការ​តាមច្បាប់ នៅ​ថ្ងៃទី​៣០ ខែមករា ដោយ​តុលាការ បានសម្រេច ឃុំខ្លួន​ហើយ​៕/V​

ទីតាំងផ្សាយពាណិជ្ជកម្ម

- Advertisment -

Most Popular