ដោយៈ ទេពមង្គល / ភ្នំពេញៈ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន នឹងអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើក ការដ្ឋានសាងសង់ រោងចក្រប្រព្រឹត្តកម្ម ទឹកស្អាតបាក់ខែង និងប្រកាសសម្ពោធ ដាក់ឲ្យដំណើរការ ជាផ្លូវការ រោងចក្រប្រព្រឹត្តកម្មទឹកស្អាត ចំការមន ស្ថិតនៅភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ នៅព្រឹកថ្ងៃទី១ ខែកុម្ភៈ ឆ្នាំ២០២១ ស្អែកនេះ ។
សម្តេចតេជោ ហ៊ុន សែន នឹងអញ្ជើញបើកការដ្ឋានសាងសង់ រោងចក្រប្រព្រឹត្តកម្ម ទឹកស្អាតបាក់ខែង និងសម្ពោធរោងចក្រ ប្រព្រឹត្តកម្មទឹកស្អាត ចំការមន ( រូបថតឯកសារ )
សូមបញ្ជាក់ថាៈ គម្រោងសាងសង់ រោងចក្រផលិតទឹកស្អាត ថ្មីមួយទៀត ស្ថិតនៅសង្កាត់បាក់ខែង ចំណាយ ទឹកប្រាក់ ប្រមាណជាង ២២០ លានដុល្លារអាមេរិក។
បើតាមសេចក្តីប្រកាសរបស់ រដ្ឋាករទឹកស្វយ័ត រាជធានីភ្នំពេញ បានបង្ហាញថាៈ គម្រោងសាងសង់ រោងចក្រ ប្រព្រឹត្តកម្មទឹកស្អាត បាក់ខែង មានសមត្ថភាពផលិត ១៩៥.០០០ ម៉ែត្រគូប ក្នុងមួយថ្ងៃ ស្ថិតក្នុងសង្កាត់ បាក់ខែង ចាប់ផ្តើមសាងសង់ នៅខែមេសា ឆ្នាំ២០១៩។ រោងចក្រប្រព្រឹត្តកម្មទឹកស្អាត បាក់ខែង ត្រូវបានសាងសង់ឡើង បន្ទាប់ពីការសាងសង់ រោងចក្រប្រព្រឹត្តកម្មទឹកស្អាត និរោធ ជំហានទី២ បានសម្ពោធដាក់ឲ្យប្រើប្រាស់ កាលពីដើមខែមេសា ឆ្នាំ២០១៧ ។ គម្រោងសាងសង់ រោងចក្រប្រព្រឹត្តកម្មទឹកស្អាតបាក់ខែង ស្ថិតក្រោម សហហិរញ្ញប្បទាន ដោយទីភ្នាក់ងារអភិវឌ្ឍន៍បារាំង ធនាគារវិនិយោគអឺរ៉ុប និងរដ្ឋាករទឹកស្វយ័ត រាជធានីភ្នំពេញ។
សម្តេចតេជោ ហ៊ុន សែន នឹងអញ្ជើញបើកការដ្ឋានសាងសង់ រោងចក្រប្រព្រឹត្តកម្ម ទឹកស្អាតបាក់ខែង និងសម្ពោធរោងចក្រ ប្រព្រឹត្តកម្មទឹកស្អាត ចំការមន ( រូបថតឯកសារ )
ដំណាក់កាលដំបូង នៃការសាងសង់ នឹងសាងសង់រោងចក្រ និងបំពង់បង្ហូរ ក្នុងតម្លៃ ១៥៥ លានដុល្លារ។ដំណាក់កាលទី២ នឹងបង្កើនសមត្ថភាព ផលិតទឹកស្អាត នៅរោងចក្រប្រព្រឹត្តកម្មទឹកស្អាត បាក់ខែង ទ្វេដង ក្នុងតម្លៃ ៤៥ លានដុល្លារ ដែលធ្វើឱ្យរោងចក្រនេះ ផលិតទឹកស្អាត បាន ៣៩០.០០០ ម៉ែត្រគូប ក្នុងមួយថ្ងៃ។
ក្រុមហ៊ុន vinci បានចុះហត្ថលេខា លើកិច្ចព្រមព្រៀងសាងសង់ សម្រាប់ដំណាក់កាលទី១ នៅឆ្នាំ២០១៩ និងកិច្ចព្រមព្រៀងទី២ សម្រាប់ដំណាក់កាលទី២ នៅឆ្នាំ២០២០។ ការស្ថាបនាដំណាក់កាលទី១ នឹងត្រូវបញ្ចប់នៅចុងឆ្នាំ២០២២ ខណៈដែលដំណាក់កាលទី២ គ្រោងនឹងបញ្ចប់ ក្នុងឆ្នាំ២០២៣។
សម្តេចតេជោ ហ៊ុន សែន នឹងអញ្ជើញបើកការដ្ឋានសាងសង់ រោងចក្រប្រព្រឹត្តកម្ម ទឹកស្អាតបាក់ខែង និងសម្ពោធរោងចក្រ ប្រព្រឹត្តកម្មទឹកស្អាត ចំការមន ( រូបថតឯកសារ )
រោងចក្រប្រព្រឹត្តកម្មទឹកស្អាត បាក់ខែង នឹងក្លាយជាទីតាំងផលិត ទឹកស្អាតធំជាងគេ នៅក្នុងរាជធានីភ្នំពេញ ហើយនៅពេលការសាងសង់ ត្រូវបានបញ្ចប់ យើងនឹងអាចផ្គត់ផ្គង់ ទឹកស្អាតបានប្រមាណជា ១ លានម៉ែត្រ គូប ក្នុងមួយថ្ងៃ។
រដ្ឋាករទឹកស្វយ័តរាជធានីភ្នំពេញ បានបញ្ជាក់ឲ្យដឹងថាៈ រាជធានីភ្នំពេញ សព្វថ្ងៃ មានរោងចក្រផលិតទឹកស្អាត ចំនួន ៤ ដែលផលិតបាន ចំនួន ៦៥០.០០០ ម៉ែត្រគូប ក្នុងមួយថ្ងៃ ៕/V
សម្តេចតេជោ ហ៊ុន សែន នឹងអញ្ជើញបើកការដ្ឋានសាងសង់ រោងចក្រប្រព្រឹត្តកម្ម ទឹកស្អាតបាក់ខែង និងសម្ពោធរោងចក្រ ប្រព្រឹត្តកម្មទឹកស្អាត ចំការមន ( រូបថតឯកសារ )
