Home ព័ត៌មានអន្តរជាតិ អូស្ត្រាលី ទា...

អូស្ត្រាលី ទាមទារ​អោយ​យោធា​មី​យ៉ាន់​ម៉ា​ដោះលែង មេដឹកនាំ​ជាប់ឆ្នោត​ជាបន្ទាន់​

​ប្រែ​សម្រួលៈ​វាសនា​/​ស៊ីដ​នី​៖ អូស្ត្រាលី កាលពី​ថ្ងៃ​ចន្ទ​ទី​០១​កុម្ភៈ​បាន​ទាមទារ​អោយ​យោធា​មី​យ៉ាន់​ម៉ា​ដោះលែង​មេដឹកនាំ អ៊ុង សាន ស៊ូ​ជី និង​ឥស្សរជន​ជាប់ឆ្នោត​ដទៃទៀត ដោយ​បាន​ព្រមាន​ថា យោធា​​ប្រទេស​មួយ​នេះ​កំពុង​«​ព្យាយាម​ដណ្តើម​អំណាច​សាជាថ្មី​»​។​

​រដ្ឋមន្ត្រីការបរទេស ម៉ា​រី​ស ផេន បាន​និយាយ​នៅក្នុង​សេចក្តីថ្លែងការណ៍​មួយ​ថា «​យើង​អំពាវនាវ​អោយ​យោធា​គោរព​នីតិរដ្ឋ ដោះស្រាយ​ជម្លោះ​តាម​យន្តការ​ស្របច្បាប់ និង​ដោះលែង​មេដឹកនាំ​ស៊ីវិល​ទាំង​​អស់ រួមទាំង​អ្នក​ដទៃ​ទៀត​ដែល​ត្រូវបាន​ចាប់​ឃុំខ្លួន​ដោយ​ខុសច្បាប់​»​។​

​ផេន បាន​និយាយថា «​យើង​គាំទ្រ​ការប្រជុំ​សភាជាតិ​ដោយ​សន្តិវិធី ស្រប​តាម​លទ្ធផល​នៃ​ការបោះឆ្នោត​សកល​កាលពី​ខែ​វិច្ឆិកា​ឆ្នាំ​២០២០»​។​

​មេដឹកនាំ​តាម​ការជាក់ស្តែង អ៊ុង សាន ស៊ូ​ជី និង​ប្រធានាធិបតី វីន មី​យីន​ត៍ត្រូវបាន​ចាប់ខ្លួ​ន​កាលពី​ដើម​ថ្ងៃ​ចន្ទ ក្នុង​អ្វីដែល​ទំនង​ជា​រដ្ឋប្រហារ​យោធា​មួយ បន្ទាប់​ពី​គណៈកម្មាធិការ​រៀបចំ​កា​រ​បោះឆ្នោត​​ជាតិ​បដិសេធ​ការទាមទារ​របស់​ក្រុម​យោធា​អោយ​ស៊ើបអង្កេត​ការចោទប្រកាន់ថា​មាន​ភាពមិនប្រក្រតី​ជា​ទូទៅ​ក្នុង​ការបោះឆ្នោតជាតិ​កាលពី​ខែ​វិច្ឆិកា​ដែល​គណបក្ស​របស់​លោ​ស្រី​ស៊ូ​ជី​បាន​ឈ្នះ​ក្នុង​សម្លេង​ភាគច្រើន​លើសលប់​។​

​ការបោះឆ្នោត​កាលពី​ខែវិច្ឆិកា​ឆ្នាំ​២០២០ ជា​ការបោះឆ្នោត​តាម​បែប​ប្រជាធិបតេយ្យ​លើក​ទី​២​ចាប់តាំងពី​ប្រទេស​អាស៊ី​អាគ្នេយ៍​មួយ​នេះ​ងើប​ចេញ​ពី​ការ​គ្រប់​គ្រប​យោធា​អស់​៤៩​ឆ្នាំ កាលពី​ឆ្នាំ​២០១១​។​

​ក្នុងពេល​ជាមួយគ្នា ជប៉ុន បាន​និយាយថា ខ្លួន​មិន​មាន​ផែនការ​នាំ​ពលរដ្ឋ​ជប៉ុន​ចេញពី​មី​យ៉ាន់​ម៉ា​ទេ តែ​បន្ត​តាមដាន​សភាពការណ៍​នេះ​។​ជប៉ុន​មាន​ពលរដ្ឋរ​បស់​ខ្លួន​ប្រមាណ​៣.៥០០​នាក់​នៅ​មី​យ៉ាន់​ម៉ា​៕

​អូស្ត្រាលី ព្រមាន​ថា​យោធា​មី​យ៉ាន់​ម៉ា​ទំនង​ជា​កំពុង​ព្យាយាម​ដណ្តើម​អំណាច​ជាថ្មី និង​ទាមទារ​អោយ​ដោះលែង​មេដឹកនាំ​ជាប់ឆ្នោត រួមមាន​លោកស្រី​អ៊ុង សាន ស៊ូ​ជី និង​ប្រធានាធិបតី វីន មី​យីន​ត៍ផង​

ទីតាំងផ្សាយពាណិជ្ជកម្ម

- Advertisment -

Most Popular