ក្រសួងពាណិជ្ជកម្ម​គ្រោង​ចុះបញ្ជី​ផលិតផល​ខ្មែរ​បន្ថែមទៀត​នាពេលខាងមុខ

ដោយ​: ពៅ​និមល​/​ភ្នំពេញ​: ក្នុង​គោលបំណង​ដើម្បី​បញ្ចៀស​ការ​ក្លែងបន្លំ និង​សម្គាល់ ទំនិញ​នៅតាម​តំបន់ នៅពេល​ខាងមុខ​ឆាប់ៗ​នេះ រដ្ឋាភិបាល​កម្ពុជា បាន​កំពុង​សិក្សា និង​សម្របសម្រួល​ចុះបញ្ជី​ម៉ាក​សមូហភាព​លើ​ផលិត​ខ្មែរ​ប្រមាណ​ជិត ១០​មុខ​បន្ថែមទៀត​។ នេះ​បើតាម​លើកឡើង​របស់​មន្ត្រីជាន់ខ្ពស់​នៃ​ក្រសួងពាណិជ្ជកម្ម​។​

​មានប្រសាសន៍ប្រាប់​រស្មី​កម្ពុជា កាលពី​សប្តាហ៍​កន្លងទៅ​នេះ លោក ប៉ែន សុ​វិជាតិ អនុរដ្ឋលេខាធិការ ក្រសួងពាណិជ្ជកម្ម បានឱ្យដឹងថា ក្រោម​ការផ្តួចផ្តើម​រប​ស់លោក​រដ្ឋមន្ត្រី ប៉ាន សូរ​ស័ក្តិ ក្រសួង​កំពុង​សិក្សា និង​សម្របសម្រួល​ចុះបញ្ជី​ម៉ាក សមូហភាព​លើ​ផលិត ខ្មែរ​៥​មុខ រួមមាន​៖ អំបុក​កំពង់ធំ , នំ​ប​ញ្ជុ​ក​សៀមរាប​, ចម្លាក់​ប្រាក់​ស្ពាន់ ឃុំ​កំពង់​លួង កោះ​ចិន ខេត្តកណ្តាល​, ស្មូន​ឆ្នាំងដី ខេត្តកំពង់ឆ្នាំង និង​ពង​ទា​កូន​ស្រែ រនោង ខេត្តតាកែវ​។ ក្រៅពី​ម៉ាក​សមូហភាព​នេះ ក្រសួង​ក៏​គ្រោង​ចុះបញ្ជី​ម៉ាក​សម្គាល់​ភូមិសាស្ត្រ​ទំនិញ​លើ ទឹកឃ្មុំ​មណ្ឌលគិរី , អំបិល និង​ផ្កាអំបិល​កំពត​ផងដែរ​។ លោក​បាន​រៀបរាប់ថា សម្រាប់ អំបុក​កំពង់ធំ​៖ គ្រោង​រៀបចំ​បង្កើត​មហាសន្និបាត​កំណើត​ដំបូង ដើម្បី ពិនិត្យ និង​អនុម័ត សេចក្តីព្រាង​បទបញ្ជា​រួម​គ្រប់គ្រង​ការប្រើប្រាស់​ម៉ាក​សមូហភាព និង​បទបញ្ជាផ្ទៃក្នុង ក្រុម​អ្នក​ផលិត​អំបុក​កំពង់ធំ​” និង​បោះឆ្នោត​ជ្រើសរើស​ក្រុមប្រឹក្សាភិបាល និង​គណៈ កម្ម​ការប្រតិបត្តិ​គ្រប់គ្រង​នា​សប្តាហ៍​ទី​៣​នៃ​ខែមីនា ឆ្នាំ​២០២១​។ បន្ទាប់មក “​ក្រុម​អ្នក ផលិត​អំបុក​កំពង់ធំ​” នឹងធ្វើ​ការដាក់​ពាក្យស្នើសុំ​ចុះបញ្ជី នៅ​នាយកដ្ឋាន​កម្មសិទ្ធិបញ្ញា នៃ​ក្រសួងពាណិជ្ជកម្ម​ជា​ផ្លូវការ ដើម្បី​ចុះបញ្ជី​ទទួលស្គាល់​និង​ការពារ ម៉ាក​សមូហភាព អំបុក​កំពង់ធំ​។ នំ​បញ្ចុក​សៀមរាប (​ព្រះ​ដាក់​)៖ គ្រោង​នឹង​រៀបចំ​សិក្ខាសាលា​ពិគ្រោះ យោបល់​ស្តីពី ការប្រមូល​ព័ត៌មាន​បឋម​ទាក់ទង​នឹង​ការផលិត និង​លក់​នំ​បញ្ចុក​សៀមរាប ដើម្បី​កសាង​កេរ្តិ៍ឈ្មោះ​ម៉ាក​សមូហភាព “​នំ​បញ្ចុក​សៀមរាប​” នា​សប្តាហ៍​ទី​៤ នៃ​ខែមីនា ឆ្នាំ​២០២១ ខាងមុខ​។ បន្ទាប់មក ក្រសួង​នឹង​បន្ត​សេចក្តីព្រាង​បទបញ្ជា​រួម​គ្រប់គ្រង​ការ ប្រើប្រាស់​ម៉ាក​សមូហភាព និង​បទបញ្ជាផ្ទៃក្នុង​របស់​ក្រុម​អ្នក​ផលិត​នំ​បញ្ចុក​សៀមរាប​។ ចម្លាក់​ប្រាក់​ស្ពាន់ (​កំពង់​លួង កោះ​ចិន​) ខេត្តកណ្តាល​៖ បានរៀបចំ​សិក្ខាសាលា ពិគ្រោះ​យោបល់​ស្តីពី ការកសាង​កេរ្តិ៍ឈ្មោះ​ម៉ាក​សមូហភាព “​ចម្លាក់​ប្រាក់​-​ស្ពាន់​កម្ពុជា​” ក្នុង​ឃុំ​កំពង់​លួង និង​កោះ​ចិន ខេត្តកណ្តាល​កាលពី​ថ្ងៃទី​២០ ខែមករា ឆ្នាំ​២០២១​។ ក្រុមការងារ​ក្រសួង រួមជាមួយ​នាយកដ្ឋាន​គោលនយោបាយ​ពាណិជ្ជកម្ម និង​នាយកដ្ឋាន ឯកទេស​សូន​រូប នៃ​ក្រសួង​វប្បធម៌ និង​វិចិត្រសិល្បៈ បានរៀបចំ​បង្កើតឱ្យមាន​គណៈ ក​ម្មា​ធិ​ការ​បណ្តោះអាសន្ន ដើម្បី​រៀបចំ​សេចក្តីព្រាង​បទបញ្ជា​រួម​គ្រប់គ្រង​ការប្រើប្រាស់ ម៉ាក​សមូហភាព និង​បទបញ្ជាផ្ទៃក្នុង​។​

​លោក​អនុរដ្ឋលេខាធិការ រៀបរាប់​បន្តទៀតថា សម្រាប់​ពង​ទា​កូន​តាកែវ គឺ បានរៀបចំ​សិក្ខា សាលា​ពិគ្រោះ​យោបល់ ស្តីពី​លទ្ធភាព​ក្នុងការ​ចុះបញ្ជី​ម៉ាក​សមូហភាព “​ពង​ទា​កូន ស្រែ​រនោង​” ក្នុង​ឃុំ​ស្រែ​រនោង ស្រុក​ត្រាំកក់ ខេត្តតាកែវ កាលពី​ថ្ងៃទី​២៨ ខែកញ្ញា ឆ្នាំ​២០២០​។ នាយកដ្ឋាន​បាន​នឹង​កំពុង​រៀបចំ​ចងក្រង​សេចក្តីព្រាង​បទបញ្ជា​រួម​គ្រប់គ្រង​ការ ប្រើប្រាស់​ម៉ាក​សមូហភាព និង​បទបញ្ជាផ្ទៃក្នុង​។ អង្ករ​ព្រះវិហា គឺ​បាន រៀបចំ​សិក្ខាសាលា ស្តីពី​ស្តង់ដារ​ស្រូវ​អង្ករ​ព្រះវិហា ក្រោម​ក្របខ័ណ្ឌ​កម្មវិធី​ផ្សព្វផ្សាយ​បច្ចេកទេស​កសិកម្ម​ថ្មី ដែល​ធន់​ទៅនឹង​ការប្រែប្រួល​អាកាសធាតុ (ASPIRE) ដោយ​អនុវត្ត​ដោយ​អង្គការ​អ្នក ក្សេ​ត​សាស្ត្រ​និង​ពេទ្យសត្វ​គ្មាន​ព្រំដែន ។​

​លោក ប៉ែន សុ វិជាតិ បានបញ្ជាក់​ទៀតថា ដោយ​ទ្បែ​ក មាន​ម៉ាក​សម្គាល់​ភូមិសាស្ត្រ ទំនិញ​ចំនួន​២​ទៀត រួមមាន​៖ ទឹកឃ្មុំ​ព្រៃ​មណ្ឌល​គី​រី ដែល​ពេលនេះ អង្គការ WWF និង​អង្គការ CIRD បានស្នើ​សុំឱ្យ​មាន​កិច្ចសហការ​ពី​នាយកដ្ឋាន​កម្មសិទ្ធិបញ្ញា នៃ​ក្រសួង ពាណិជ្ជកម្ម ដើម្បី​រៀបចំ​ពិធី​សម្ពោធ​ដាក់​ឲ្យ​ប្រើប្រាស់​ម៉ាក​សម្គាល់​ភូមិសាស្ត្រ​ទឹកឃ្មុំ ព្រៃ​មណ្ឌល់គិរី និង​គោរព​ស្នើសុំ​លោក​រដ្ឋមន្ត្រី​ពាណិជ្ជកម្ម​ផ្តល់​ជា​កិត្តិយស​ចូលរួម ក្នុង​ពិធី​សម្ពោធ និង​ប្រគល់​វិញ្ញាបនបត្រ​ចុះបញ្ជី​ម៉ាក​សម្គាល់​ភូមិសាស្ត្រ​ទឹកឃ្មុំ ព្រៃ​មណ្ឌលគិរី និង​រៀបចំ​ឱ្យមាន​សិក្ខាសាលា ស្តីពី​ទស្សនៈទាន និង​អត្ថ​ប្រ​យា​ជន៍​ម៉ាក សម្គាល់​ភូមិសាស្ត្រ​ទំនិញ ដើម្បី​ផ្សព្វផ្សាយ​ទៅ​អ្នក​ពាក់​ព​ន្ធ័ ដូចជា​៖​ពាណិជ្ជករ ក្រុមហ៊ុន និង​អ្នកប្រើប្រាស់​ទឹកឃ្មុំ​ព្រៃ​មណ្ឌលគិរី ព្រមទាំង​រៀបចំ​ទស្សនៈកិច្ច​ទៅកាន់​តំបន់​ប្រមូល ទឹកឃ្មុំ​ព្រៃ​មណ្ឌលគិរី ដែល​គ្រោង​ប្រព្រឹត្ត​នៅ​ដើមខែ​មីនា​ខាងមុខ​។ ហើយ​អំបិល​និង​ផ្កា អំបិល​កំពត ជា​គម្រោង​អនុវត្ត​ដោយ​សហការ​រួមគ្នា​ជាមួយ​អង្គការ​កម្មសិទ្ធិ​បញ្ញា ពិភពលោក​(WIPO) និង​ទីភ្នាក់ងារ​សម្រាប់​អភិវឌ្ឍន៍​កម្ពុជា​(AFD)៕​/PC

ទីតាំងផ្សាយពាណិជ្ជកម្ម

- Advertisment -

Most Popular