អាជ្ញាធរ​ជាតិ​អប្សរា កាត់​ក្រី និង​ដកហូត​ដើមឈើ មាន​ហានិភ័យ​ខ្ពស់​នៅ​ខាងកើត​ប្រាសាទ តា​ព្រហ្ម​

​ដោយៈ បាយ័ន / សៀមរាបៈ អាជ្ញាធរ​ជាតិ​អប្សរា បានឱ្យដឹង នៅ​ថ្ងៃទី​១ ខែកុម្ភៈ នេះ​ថាៈ ដើម្បី​បង្ការ និង​បញ្ចៀស​គ្រោះថ្នាក់​ទុកជាមុន កុំ​ឲ្យ​ប៉ះពាល់​ដល់ អាយុជីវិត​របស់​ភ្ញៀវ ទេសចរ និង​យានយន្ត​គ្រប់​ប្រភេទ ក្រុម​ជំនាញ នាយកដ្ឋាន​គ្រប់គ្រង​ព្រៃឈើ ទេសភាព វប្បធម៌ និង​បរិស្ថាន នៃ​អាជ្ញាធរ​ជាតិ​អប្សរា ដោយ​សហការ​ជាមួយ ផ្នែក​ពាក់ព័ន្ធ កំពុង​អនុវត្ត​វិធានការ​បន្ទាន់ ចំពោះ​ដើមឈើ​ទាំងនោះ ដោយ​កាត់​ក្រី​មែក ចំនួន ១២ មែក រួមមាន ដើម​អង្កាញ់ ២​ដើម ដើមឈើ​ទាល ២​ដើម ដើម​ត្រ​សេក ១​ដើម ដើម​ពពេល​ខែ ១​ដើម និង​ដើម​ទ្រៀក ១​ដើម​។ ចំណែកឯ​ដើមឈើ​ងាប់ ដែល​ដកហូត​ចំនួន ៦​ដើម រួមមាន ដើមឈើ​ទាល ២​ដើម ដើម​ត្រ​សេក ២​ដើម និង​ដើម​អង្កាញ់​២​ដើម​។​

​ប្រភព​ដដែល បានបញ្ជាក់​ថាៈ ការចុះ​កាត់​ក្រី និង​ដកហូត​ដើមឈើ ដែលមាន​ហានិភ័យ ខ្ពស់ នៅ​ខាងកើត​ប្រាសាទតាព្រហ្ម​នេះ គឺ​បាន​ធ្វើឡើង ក្រោយពី​ក្រុម​អង្កេត​ដើមឈើ ហានិភ័យ បាន​ពិនិត្យឃើញ​មាន ដើមឈើ ចំនួន ១៣ ដើម មាន​ហានិភ័យ​ខ្ពស់​ដែល​ក្នុង នោះ មាន​៦​ដើម ងាប់​ទាំងស្រុង ស្ថានភាព​ដើមឈើ​ទាំងនោះ ដុះ​ទ្រេត​ជាប់​ផ្លូវ​ចូល ប្រាសាទ ដុះ​ជាប់​ផ្លូវ​ចូល​បន្ទប់ទឹក និង​ក្បែរ​តូប​លក់ដូរ ក្នុង​ចំណត​ខាងកើត​ប្រាសាទ តា​ព្រហ្ម​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular