Home ព័ត៌មានសំខាន់ៗ កុំ​ច្រឡំ​! ក...

កុំ​ច្រឡំ​! កម្ពុជា​បូម​បាន​ប្រេង​មែន តែ​មិនទាន់​អាចជួយ​សេដ្ឋកិច្ច និង​ធ្វើ​ឲ្យ​តម្លៃ​ប្រេង ចុះថ្លៃ​ទេ​!

ដោយៈ ម៉េង​ឆៃ / ភ្នំពេញៈ ក្នុង​ពិធីបើកការដ្ឋាន​សាងសង់​រោងចក្រ​ប្រព្រឹត្តិកម្ម​ទឹកស្អាត​បាក់​ខែង​និង​សម្ពោធ​ដាក់​ឲ្យ​ដំណើរការ​រោងចក្រ ផលិត​ទឹកស្អាត ចំការមន រាជធានី​ភ្នំពេញ​កាលពី​ព្រឹក​ថ្ងៃទី​១ ខែកុម្ភៈ ឆ្នាំ​២០២១ សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បានប្រកាសថា ប្រេង​មិនទាន់​អាចជួយ​ដល់​សេដ្ឋកិច្ចកម្ពុជា​បានទេ​។ នោះ​គឺ​ចំណូល​បាន​ពី​ប្រេង មិន​ស្មើនឹង​ចំណូល​បាន​ពី​ការយកពន្ធ​ពី​ទិដ្ឋាការ​ទេសចរ ក្នុង​មួយឆ្នាំ​ផង​។​

សម្តេចតេជោហ៊ុនសែនកាលពីថ្ងៃទី២៩ខែធ្នូឆ្នាំ២០២០។ជាពេលដែលសម្តេចប្រកាសពីតំណកក់ប្រេងដំបូង(រូបថតឯកសារ)

​សម្តេច​តេ​ជោ ហ៊ុន សែន បានប្រកាស​ជូន​ជន​រួម​ម​ជាតិ​ពី​ដំណើរការ​បូម​យក​ប្រេង ក្នុង​ដែនសមុទ្រ​កម្ពុជា​។​នោះ​គឺ​កម្ពុជា​ចាប់ផ្ដើម​ទទួល បាន​តំណក់​ប្រេង​ដំបូង នៅ​ថ្ងៃទី​២៩ ខែធ្នូ ឆ្នាំ​២០២០ គាប់​ជួន​នឹង​ខួប​លើក​ទី​២២ នៃ​ថ្ងៃ​បញ្ចប់សង្គ្រាម​តាម​នយោបាយ​ឈ្នះ​ឈ្នះ ។​

​សម្តេច​តេ​ជោ​បន្ថែមថា អណ្ដូង​ទី​១ បាន​ដំណើរការ​រយៈពេល ៣៣ ថ្ងៃ​ហើយ គិត​មកដល់​ថ្ងៃទី​១ ខែកុម្ភៈ​នេះ​។ អណ្ដូង​ទី​ពីរ ទើប​ចាប់ផ្ដើម​ដំណើរការ​។ អណ្តូង​ទី​១ គឺ​ផលិត​បាន ១ ២៣៦ បារ៉ែល ក្នុង​មួយថ្ងៃ​។ ក្នុង​រយៈពេល ៣៣​ថ្ងៃ ផលិត​បាន ៤០ ៧៨៨ បារ៉ែល​។ អណ្តូង​ទី​៤ បានចាប់ផ្ដើម នៅ​ថ្ងៃទី​៣០ ខែមករា​។​សម្តេច បាន​បន្តថា អណ្តូង​ទី​១ បាន​ដំណើរការ ៣៣​ថ្ងៃ ហើយ​ឥឡូវ​អណ្តូង​ទី​២ កំពុង​ចាប់ដំណើរការ ហើយ​អណ្តូង​ទី​៣ ទី​៤ និង​ទី​៥ នឹង​បន្ត​ដំណើរការ​។ តាម​ការប៉ាន់ប្រមាណ​ថា យើង​នឹង​ទទួលបាន​មួយថ្ងៃ​ជាង ៧០០០ បារ៉ែល ទៅ ៧៥០០ បារ៉ែល តែប៉ុណ្ណោះ ក្នុង ១​ថ្ងៃ​។

​សម្តេច​តេ​ជោ ហ៊ុន សែន បាន​លើកឡើងថា បើ​តម្លៃ​ប្រេង​មួយ​បារ៉ែល​ជាង ៥០ ដុល្លារ យើង​ទទួលបាន​ជាង ៣០​លាន​ដុល្លារ​ប៉ុណ្ណោះ​ក្នុង​១​ឆ្នាំ​។ វា​មិន​ស្មើនឹង​ចំណូល​បានមកពី​ពន្ធ​លើ​ទិដ្ឋាការ​ទេសចរណ៍​បរទេស​មួយ​លាន​នាក់​ផង​។​

​សម្តេច​តេ​ជោ ហ៊ុន សែន បាន​បន្តថា “​ប៉ុន្មាន​ថ្ងៃនេះ មានការ​វិភាគ​អំពី​ផល ដែល​បាន​ប្រេង តើ​អាចជួយ​ទ្រទ្រង់​សេដ្ឋកិច្ចកម្ពុជា​ដែរ ឬទេ​? ខ្ញុំ​ចង់​បញ្ជាក់ថា ចំណូល​ដែល​បានមកពី​ធនធាន​ប្រេង មាន​ទំហំ​តូច​នៅឡើយ មិនអាច​ជួយ​ដល់​សេដ្ឋកិច្ចកម្ពុជា នៅឡើយ​ទេ​។ ចំណូល​ពី​ប្រេង​មិនទាន់​ជះ​វិសាលភាព​ដល់​សេដ្ឋកិច្ចកម្ពុជា​នោះទេ​”​។​

​ចំណែក​អ្នកជំនាញ លើកឡើងថា តំណក់​ប្រេង​ដំបូង ដែល​កម្ពុជា​ទទួលបាន​ពី​ការ​បូម​ប្រេង​នៅ​ប្លុក​A ក្នុង​ដែនសមុទ្រ​កម្ពុជា កាលពី​ថ្ងៃទី​២៩ ខែធ្នូ ឆ្នាំ​២០២០ គឺជា​ការទទួលបាន​តំណក់​ប្រេង​ឆៅ​។ ប្រេង​ឆៅ​ទាំងនោះ មិនអាច​យកទៅ​ប្រើប្រាស់​ភ្លាមៗ ដោយផ្ទាល់ ដូចជា ការយកទៅ​ចាក់​បញ្ចូល​យានជំនិះ ដូចជា ម៉ូតូ ឡាន និង​គ្រឿង​ម៉ាស៊ីន​ផ្សេងទៀត បាន​នោះទេ​។

​អ្នកជំនាញ បន្ថែមថា ដើម្បី​ទទួលបាន​ប្រេងឥន្ធនៈ ដូចជា ប្រេងសាំង ប្រេងម៉ាស៊ូត ឧស្ម័ន LPG ឬ​ហ្គាស គេ​ត្រូវយក​ប្រេង​ឆៅ ទៅ​ចម្រាញ់​។ ដោយហេតុថា កម្ពុជា​នៅ​មិនទាន់មាន​រោងចក្រ​ចម្រាញ់​ប្រេង​នៅឡើយ​។ ដូច្នេះ​កម្ពុជា​គ្មាន​ជម្រើស ក្រៅពី​លក់​ប្រេង​ឆៅ ដែល​បូម​បាន ទៅ​ចម្រាញ់​នៅ​ប្រទេស​ផ្សេង​ឡើយ​។

​មានន័យថា ទោះបីជា​កម្ពុជា​បូម​ប្រេង​បាន​ក៏ដោយ ក៏​កម្ពុជា​នៅតែ​ទិញ​ប្រេងឥន្ធនៈ​ពី​ប្រទេស​ដទៃ​ដដែល​។​ដូច្នេះ​តម្លៃ​ប្រេង ឥន្ធនៈ​នៅ​កម្ពុជា នៅតែ​បន្ត​ប្រែប្រួល ទៅតាម​តម្លៃ​ប្រេងឥន្ធនៈ​លើ​ទីផ្សារ​អន្តរជាតិ ដូច​ពេលបច្ចុប្បន្ន​ដដែល​។​

​ការលើកឡើង​របស់​ស​ម្តេច​តេ​ជោ​ហ៊ុនសែន​និង​ការពន្យល់​បកស្រាយ​រប​ស់​អ្នកជំនាញ​ខាងលើនេះ​តប​ទៅនឹង​ការយល់​ខុស​មួយចំនួនធំ​របស់​ប្រជាពលរដ្ឋ​ខ្មែរ​យើង ដែល​ដោយ​ច្រើន យល់ថា ការទទួលបាន​តំណក់​ប្រេង​ដំបូង​ពី​បាតសមុទ្រ​កម្ពុជា ដែល​សម្តេច​តេ​ជោ ហ៊ុន សែន បានប្រកាស កាលពី​ថ្ងៃទី​២៩ ខែធ្នូ ឆ្នាំ​២០២០ នឹងធ្វើ​ឲ្យ​តម្លៃ​ប្រេងសាំង នៅ​កម្ពុជា​យើង ចុះថ្លៃ​ជាង​សព្វថ្ងៃ​។​

​យ៉ាងណា​ក៏ដោយចុះ ចាប់តាំងពី​ដំណើរការ​រុករក​ប្រេង បានចាប់ផ្តើម តាំងពី​ក្រោយ​ការបោះឆ្នោត​ឆ្នាំ​១៩៩៣ នៅ​កម្ពុជា ហើយ​បន្ត​រហូតដល់​ដើម​ទសវត្សរ៍​ឆ្នាំ​២០០០ នៅពេល​មាន​ក្រុមហ៊ុន​ប្រេង​អន្តរជាតិ​កាន់តែច្រើន​ចូលមក​រុករក​ប្រេង​នៅ​ដែន សមុទ្រ​កម្ពុជា ក៏មាន​ការលើក​ឡើងជា​ច្រើន​ទៀត នូវ​ការព្រួយបារម្ភ​លើ​ការបែងចែក​ចំណូល​ពី​ប្រេង ដែល​គេ​ប្រសិទ្ធភាព​ថា ជា​មាស​ខ្មៅ របស់​កម្ពុជា​។​

​បទពិសោធន៍​ជាច្រើន ពិសេស​នៅ​ប្រទេស​នី​ហ្សេ​រី​យ៉ា ដែល​ទទួលបាន​ប្រេង ប៉ុន្តែ​មិនមែនជា​ពរជ័យ​ទេ បែរ​ក្លាយជា​បណ្តាសា​ប្រេង​។ ពោលគឺ​ដោយសារតែ​គ្រប់គ្រង​ចំណូល​ពី​ប្រេង មិនបាន​ល្អ នាំ​ឲ្យ​ប្រជា​ជននី​ហ្សេ​រី​យ៉ា នៅតែមាន​ជីវភាព​លំបាក ហើយ​ប្រទេសជាតិ ក៏​មិនមាន​រីកចម្រើន​អ្វី​ប្រសើរ​ជាង​ឡើយ​។​

​ដោយសារ​តែមាន​មេរៀន​ដូច្នេះ ទើប​ក្រុម​អង្គការ​សង្គម​ស៊ីវិល​ជាតិ និង​អន្តរជាតិ រួមទាំង​ប្រជាជន​កម្ពុជា​មួយចំនួន​ណា​នោះ បានបង្ហាញ​ក្តីបារម្ភ និង​លើក​ជា​មតិយោបល់​ជូន​រាជរដ្ឋាភិបាល​កម្ពុជា ពាក់ព័ន្ធ​នឹង​ចំណូល​ពី​ប្រេង​នេះឯង​។​

​ប៉ុន្តែ​យ៉ាងណាក៏ដោយ ជាថ្មី​ម្តងទៀត សម្តេច​តេ​ជោ​នាយករដ្ឋមន្ត្រី ហ៊ុន សែន បានប្រកាស​ម្តង​ហើយ​ម្តង​ទៀតថា កម្ពុជា នឹង​ទទួលបាន​ពរជ័យ​ជូន​ចំពោះ​ប្រជាជាតិ​កម្ពុជា ហើយ​ចំណូល​ពី​ប្រេង​នេះ នឹងត្រូវ​ប្រើប្រាស់​ជា​អាទិភាព​លើ​វិស័យ​អប់រំ និង​វិស័យ​សុខាភិបាល នៅ​កម្ពុជា​យើង​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular