ដោយៈ បូកគោ / កំពតៈ ជាការកំណត់ទិសដៅ ដើម្បីអនុវត្តបន្ត ចាប់ពីឆ្នាំ២០២១ ប្រធានគណៈកម្មាធិការ កាកបាទក្រហមកម្ពុជា សាខាខេត្តកំពត បានជំរុញដល់ក្រុម ការងារថ្នាក់ខេត្ត និងក្រុងស្រុក ត្រូវបន្តខិតខំបង្កើន និងពង្រឹងយន្តការដឹកនាំ គ្រប់គ្រងសកម្មភាពការងារ ឱ្យកាន់តែប្រសើរ ហើយមានប្រសិទ្ធភាព បន្ថែមទៀត។
នាកិច្ចប្រជុំបូកសរុបលទ្ធផលការងារ ឆ្នាំ២០២០ នៅរសៀល ថ្ងៃទី១ ខែកុម្ភៈ ឆ្នាំ២០២១ លោក ជាវ តាយ ប្រធានគណៈកម្មាធិការ កាកបាទក្រហមកម្ពុជា សាខាខេត្តកំពត បានមានប្រសាសន៍ថាៈ តាមការកត់សម្គាល់ លទ្ធផលការងាររបស់សាខាកាកបាទ ក្រហមខេត្ត និងអនុសាខាក្រុងស្រុក ក្នុងឆ្នាំ២០២០ កន្លងទៅ មានលក្ខណៈល្អប្រសើរ។ រាល់សកម្មភាព ការងារមនុស្សធម៌ បានឆ្លើយតប ទាន់ពេលវេលា ហើយចំគោលដៅ ចំពោះពលរដ្ឋងាយរងគ្រោះ និងជនរងគ្រោះ នៅគ្រប់មូលដ្ឋានទាំងអស់។
លោកប្រធានគណៈកម្មាធិការ បានបញ្ជាក់ថាៈ ទោះស្ថិតក្នុងក្តីមោទកៈបែបនោះក្តី ថ្នាក់ដឹកនាំ និងសមាជិក សមាជិកា សាខាកាកបាទក្រហមខេត្ត ក៏ដូចជាអនុសាខា ក្រុងស្រុក ព្រមទាំងមន្ត្រីពាក់ព័ន្ធទាំងអស់ ត្រូវបន្តយកចិត្តទុកដាក់ចូលរួមឱ្យបាន សកម្មបន្ថែមទៀត ស្របតាមគោលការណ៍គ្រឹះទាំង ៧ របស់កាកបាទក្រហម កម្ពុជា សម្រាប់បេសកកម្មការងារ មនុស្សធម៌នេះ។ ពិសេសត្រូវយកចិត្តទុកដាក់ ក្នុងការកៀរគរ និងគ្រប់គ្រងចំណូលចំណាយ ឱ្យបានច្បាស់លាស់។ លើសពីនោះ ក៏ត្រូវប្រើប្រាស់ធនធាន ឱ្យបានចំគោលដៅ ក្នុងការជួយសង្គ្រោះ និងសម្រាលទុក្ខលំបាករបស់ប្រជាពលរដ្ឋ ខ្វះខាត ឬជួបប្រទះគ្រោះធម្មជាតិ ក៏ដូចជា ឧបទ្ទវហេតុផ្សេងៗ នៅទូទាំងខេត្តកំពត៕/V-PC
