Home ព័ត៌មានអន្តរជាតិ រដ្ឋប្រហារ​នៅ...

រដ្ឋប្រហារ​នៅ​មី​យ៉ាន់​ម៉ា​នាំមក​នូវ​ការខាតបង់​យ៉ាង​ធំធេង​ដល់​ថៃ​

​ប្រែ​សម្រួល : កញ្ញា​ដា​លី​ស ៖ ថៃ​ត្រូវបាន​គេ​ប៉ាន់ប្រមាណ​ថា​នឹង​បាត់បង់ ៥០ លាន​បាត​ក្នុង​មួយថ្ងៃ​ពី​ការដឹកជញ្ជូន​ទំនិញ​និង​ការត្រួតពិនិត្យ​សន្តិសុខ​យ៉ាង​តឹងរ៉ឹង​ពី​សំណាក់​រដ្ឋបាល​យោធា​មី​យ៉ាន់​ម៉ា​។​

​យោង​តាម​លោក អា​ត ពី​សាន​វ៉ា​និច នាយក​មជ្ឈមណ្ឌល​សិក្សា​ពាណិជ្ជកម្ម​អន្តរជាតិ​នៅ​សាកលវិទ្យាល័យ​សភាពាណិជ្ជកម្ម​ថៃ​បាន​ឱ្យដឹងថា ផលប៉ះពាល់​អាច​នឹង​មាន​ដល់​ជាង ១,៥ ទៅ ២​ពាន់​លាន​​បាត​ក្នុង​មួយខែ ប្រសិនបើ​ការត្រួតពិនិត្យ​សន្តិសុខ​រឹត​រ៉ឹង​នៅតែ​បន្ត​។​

​លោក​អាត​និយាយថា “​យើង​រំពឹងថា​វិបត្តិ​នយោបាយ​នៅ​មី​យ៉ាន់​ម៉ា​នឹង​វិល​មក​រក​ភាពប្រក្រតី​វិញ​នៅ​ខែ​ទី​២​។ យ៉ាងណា​ក៏ដោយ​យើង​ចាំបាច់​ត្រូវ​តាមដាន​ជំហរ​នយោបាយ​របស់​ស​ហ​រដ្ឋ​អាម៉េរិក អឺរ៉ុប ​ជប៉ុន​និង​បណ្តា​ប្រទេស​សម្ព័ន្ធមិត្ត​និង​សកម្មភាព​ឬ​ទណ្ឌកម្មសេដ្ឋកិច្ច​របស់​ពួកគេ​បន្ទាប់​ពី​រដ្ឋប្រហារ​នៅ​មី​យ៉ាន់​ម៉ា​”​។​

​លោក​អាត​និយាយថា ការខាតបង់​ចំពោះ​ថៃ​ពឹងផ្អែក​លើ​កម្រិត​នៃ​ទណ្ឌកម្មសេដ្ឋកិច្ច​ប្រឆាំងនឹង​មី​យ៉ាន់​ម៉ា ដែល​នឹង​ជះ​ឥទ្ធិពល​ទាំង​អំណាច​ទិញ​និង​ការវិនិយោគ​នៅក្នុង​ប្រទេស​ជិតខាង​នេះ​។​

​ជាមួយ​នឹង​អំណាច​ទិញ​ទាប មី​យ៉ាន់​ម៉ា ដែល​កំពុង​រង​ការ​វាយ​សំពង​យ៉ាងខ្លាំង​ពី​កូវី​ដ​១៩ ទំនងជា​នឹង​នាំចូល​ទំនិញ​តិចតួច​ពី​ថៃ​។​

​យោង​តាម​លោក​អាត វិនិយោគិន​បរទេស​ត្រូវ​គេ​រំពឹងថា​នឹង​ចំណាយពេល ២ ទៅ ៣ ខែ​ដើម្បី​វាយតម្លៃ​ផលប៉ះពាល់​ហើយ​រង់ចាំ​មើល​ថា​តើ​របប​យោធា​គ្រប់គ្រង​ស្ថានការណ៍​យ៉ាងដូចម្តេច​។​

​លោក​អាត​និយាយថា “​ស្ថានភាព​បច្ចុប្បន្ន​បង្ហា​ញ​យ៉ាងច្បាស់​ថា ភាពមិនប្រាកដប្រជា​ផ្នែក​នយោបាយ​នៅតែ​មាន​ខ្ពស់​នៅ​មី​យ៉ាន់​ម៉ា​។ ទោះបីជា​មាន​ការបោះឆ្នោត​ក្នុង​ឆ្នាំ ២០១៥ និង​ឆ្នាំ ២០២០ ហើយ​ប្រទេស​នេះ​កំពុង​ងាក​ទៅ​រក​លទ្ធិប្រជាធិបតេយ្យ​ក៏ដោយ ក៏​ភាពមិនប្រាកដប្រជា​ផ្នែក​នយោបាយ​នឹង​ក្លាយ​ជា​កត្តា​សំខាន់​សម្រាប់​វិនិយោគិន​ក្នុង​ការសម្រេចចិត្ត​លើ​ការវិនិយោគ​។ បញ្ហា​នេះ​នឹង​ជះ​ឥទ្ធិពល​ដល់​សេដ្ឋកិច្ច​ពាណិជ្ជកម្ម​និង​ការវិនិយោគ​នៅក្នុង​ប្រទេស​មី​យ៉ាន់​ម៉ា​ដែល​ប្រាក់ចំណូល​របស់​មនុស្ស​ម្នាក់ៗ​នៅ​មាន​ទាប​ជាង​គេ​បំផុត​ក្នុងចំណោម​ប្រទេស CLMV”​។​

​លោក​អាត​និយាយ​ថា​គម្រោង​វិនិយោគ​ទូទៅ​នៅក្នុង​ប្រទេស​មី​យ៉ាន់​ម៉ា​ត្រូវគេ​រំពឹងថា​នឹង​ត្រូវ​បង្ក​ក ហើយ​រាល់​ការចរចា​ពាណិជ្ជកម្ម​អន្តរជាតិ​នឹង​ត្រូវ​ពិនិត្យឡើងវិញ​៕

ក្រោយធ្វើរដ្ឋប្រហារ យោធាមីយ៉ាន់ម៉ារឹតបន្តងសន្តិសុខ

ទីតាំងផ្សាយពាណិជ្ជកម្ម

- Advertisment -

Most Popular