Home ព័ត៌មានសំខាន់ៗ គណបក្ស NLD​ទា...

គណបក្ស NLD​ទាមទារ​ឱ្យ​ដោះលែង​លោក​ស្រី​ស៊ូ​ជី ខណៈ​អ​.​ស​.​ប​គ្រោង​នឹង​ជួប​ប្រជុំ​ដើម្បី​ដោះស្រាយ​បញ្ហា​នៅ​មី​យ៉ាន់​ម៉ា​

ប្រែ​សម្រួល : កញ្ញា​ដា​លី​ស ៖​គណបក្ស​របស់​លោកស្រី​អ៊ុង​ ​សាន​ ​ស៊ូ​ជី​ ​មេដឹកនាំ​ជាប់ឃុំ​ក្នុងប្រទេស​មី​យ៉ាន់​ម៉ា​នៅ​ថ្ងៃ​អង្គារ​នេះ​បាន​អំពាវនាវ​ឱ្យ​ដោះលែង​លោក​ស្រី​ពី​ការឃុំខ្លួន​ជា​បន្ទាន់​និង​ឱ្យ​របប​​យោធា​ទទួលស្គាល់​ជ័យជម្នះ​របស់​លោកស្រី​នៅក្នុង​ការបោះឆ្នោត​ខែ​វិច្ឆិកា ពោលគឺ​មួយថ្ងៃ​បន្ទាប់​ពី​រដ្ឋប្រហារ​យោធា​បាន​បង្ក​ឱ្យ​មាន​កំហឹង​ទូទាំង​ពិភពលោក​។​

​វត្តមានប៉ូលិសនិងទាហានមីយ៉ា់ន់ម៉ានៅតាមផ្លូវនិងទីក្រុង ក្រោយរដ្ឋប្រហារ

សហរដ្ឋ​អាម៉េរិក​បាន​គំរាម​ដាក់ទណ្ឌកម្ម​ឡើងវិញ​ចំពោះ​ឧត្តមសេនីយ៍មី​យ៉ាន់​ម៉ា​បន្ទាប់ពី​ពួកគេ​បាន​ដណ្តើម​អំណា​ច​និង​ចាប់ខ្លួន​លោក​ស្រី​ស៊ូ​ជី​និង​សម្ព័ន្ធមិត្ត​រាប់សិប​នាក់​របស់​លោកស្រី​នៅ​ក្នុងការ​​ឆ្មក់​ចាប់ខ្លួន​ទាំង​ព្រលឹម​ថ្ងៃ​ចន្ទ​។​

​កន្លែង​ស្នាក់នៅ​របស់​ជ័យលាភី​ពានរង្វាន់​ណូបែល​សន្តិភាព​រូប​នេះ​នៅ​មិនទាន់​ដឹង​នៅ​ជាង ២៤ ម៉ោង​មក​នេះ បន្ទាប់​ពី​ការចាប់ខ្លួន​លោក​ស្រី​ហើយ​ការប្រាស្រ័យ​ទាក់ទង​តែមួយគត់​របស់​លោកស្រី​កើត​​ឡើង​ជា​ទម្រង់​នៃ​សេចក្តីថ្លែងការណ៍ ដែល​ត្រូវ​បាន​សរសេរ​ទុកជា​មុន​បង្ការ​ក្រែង​មាន​រដ្ឋប្រហារ ដោយ​អំពាវនាវ​ឱ្យមាន​ការតវ៉ា​ប្រឆាំង​នឹង​របប​ផ្តាច់ការ​យោធា​។​

​ពួក​អ្នកការទូត​និយាយថា ក្រុមប្រឹក្សាសន្តិសុខ​អ​.​ស​.​ប​គ្រោង​នឹង​ជួប​ប្រជុំ​នៅ​ថ្ងៃ​អង្គារ​នេះ​ចំពេល​មាន​ការអំពាវនាវ​ឱ្យ​មាន​ការឆ្លើយតប​ជា​សកល​យ៉ាង​ខ្លាំងក្លា​ចំពោះ​ការ​រឹបអូស​យក​អំណាច​ចុង​​ក្រោយ​របស់​យោធា​នៅក្នុង​ប្រទេស​មួយ ដែល​ញាំញី​ដោយ​ការគ្រប់គ្រង​របស់​កង​ទ័ព​រាប់​ទសវត្សរ៍​។​

​រដ្ឋប្រហារ​នេះ​ធ្វើឡើង​បន្ទាប់​ពី​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ (NLD) របស់​លោកស្រី​ស៊ូ​ជី​ទទួលបាន​ជោគជ័យ​ភ្លូកទឹកភ្លូកដី​នៅក្នុង​ការបោះឆ្នោត​នៅ​ថ្ងៃទី ៨ ខែវិច្ឆិកា ជា​លទ្ធផល​ដែល​​យោធា​បដិសេធ​មិន​ទទួលយក ដោយ​សម្អាង​លើ​ការចោទប្រកាន់​អំពី​ការ​ក្លែងបន្លំ​ដោយ​គ្មាន​ភស្តុតាង​។​

​កងទ័ព​បាន​ប្រគល់​អំណាច​ដល់​នាយ​ឧត្តមសេនីយ៍មីន អ៊ុង​ហ្លាំង​និងដាក់​ប្រទេស​ក្នុងស្ថានភាព​អាសន្នមួយ​ឆ្នាំ​ដោយ​បំផ្លាញ​អស់​នូវ​សង្ឃឹមថា​ប្រទេស​ក្រីក្រ​នេះ​នឹង​ស្ថិតនៅ​លើ​មាគ៌ា​ឆ្ពោះទៅ​រក​លទ្ធិ​ប្រ​​ជា​ធិបតេយ្យ​ដែល​មាន​ស្ថិរភាព​។​

​គណៈកម្មាធិការ​ប្រតិបត្តិ​របស់​គណបក្ស NLD បានទាមទារ​ឱ្យ​ដោះលែង​អ្នក​ជាប់​ឃុំ​ទាំងអស់ “​ឱ្យបាន​ឆាប់​បំផុត​”​។​

​នៅក្នុង​សារ​បង្ហោះ​នៅលើ​ទំព័រ​ហ្វេ​សប៊ុក​របស់​មន្ត្រី​ជាន់ខ្ពស់គ​ណ​បក្ស លោក មេ វីន មីន គណៈកម្មាធិការ​នេះ​ក៏​បាន​អំពាវនាវ​ឱ្យ​យោធា​ទទួលស្គាល់​លទ្ធផល​នៃ​ការបោះឆ្នោត​និង​អនុញ្ញាត​ឱ្យ​សមាជិក​សភា​ថ្មី ដែល​នឹង​ត្រូវ​ជួបប្រជុំ​លើកដំបូង​នៅ​ថ្ងៃ​ចន្ទ​ម្សិលមិញ បាន​ចូល​អង្គុយ​នៅ​អាសនៈ​៕

​អ្នកគាំទ្រ​គណបក្ស NLD របស់​លោកស្រី​ស៊ូ​ជី​នៅ​ជប៉ុន​កាលពី​ថ្ងៃ​ចន្ទ​បាន​ធ្វើ​បាតុកម្ម​ទាមទារ​ឱ្យ​ដោះលែង​អ្នក​ជាប់​ឃុំ​ទាំងអស់ “​ឱ្យបាន​ឆាប់​បំផុត​”

ទីតាំងផ្សាយពាណិជ្ជកម្ម

- Advertisment -

Most Popular