ប្រែសម្រួល : កញ្ញាដាលីស ៖ សារព័ត៌មាន The Wall Street Journal (WSJ) បានអះអាងថា ក្រុមហ៊ុន Apple នឹងប្រើឧបករណ៍ចាប់សញ្ញាក្រយៅដៃនៅលើអេក្រង់អុបទិកនៅលើទូរស័ព្ទ iPhone 13 ។
អតីតបុគ្គលិកក្រុមហ៊ុន Apple ម្នាក់បានប្រាប់ WSJ ថាក្រុមហ៊ុនផលិតទូរស័ព្ទ iPhone នេះកំពុងបង្កើតឧបករណ៍ចាប់សញ្ញាអុបទិកសម្រាប់ការអានក្រយៅដៃនៅលើអេក្រង់ព្រោះវាអាចជឿទុកចិត្តបានជាងឧបករណ៍ចាប់សញ្ញាអ៊ុលត្រាសូនិករបស់ទូរស័ព្ទដទៃ។
ឧបករណ៍ចាប់សញ្ញាក្រយៅដៃអុបទិកត្រូវបានប្រើនៅលើទូរស័ព្ទ Android ជាច្រើនប្រភេទរួចមកហើយក្នុងរយៈពេលពីរឆ្នាំកន្លងមកនេះ ប៉ុន្តែវាងាយនឹងបញ្ឆោតបានណាស់ព្រោះពួកវាពឹងផ្អែកលើរូបភាព 2D (រូបថតក៏អាចដោះសោបាន)។ ម្យ៉ាងទៀត ប្រដាប់អានក្រយៅដៃអ៊ុលត្រាសូនិកគឺប្រើរលកសំឡេងតូចៗដើម្បីបង្កើតផែនទីក្រយៅដៃ 3D ដែលមានសុវត្ថិភាពជាងមុន។ពួកវាក៏មានប្រសិទ្ធភាពសម្រាប់ក្រយៅដៃសើមដែរ ប៉ុន្តែបច្ចេកវិជ្ជានេះមានតម្លៃថ្លៃ។យ៉ាងណាក៏ដោយអតីតបុគ្គលិក Apple រូបនោះបានប្រាប់ WSJ ថា Apple នឹងរក្សាស្តង់ដារសុវត្ថិភាពតឹងរ៉ឹងនៃប៊ូតុង Touch ID បច្ចុប្បន្ននៅលើឧបករណ៍ចាប់សញ្ញាក្រយៅដៃដដែល។
អ្នកវិភាគឈ្មោះ មីង ជីគូ បានរាយការណ៍កាលពីខែសីហាឆ្នាំ ២០១៩ ថា Apple នឹងបញ្ចេញ iPhone បែបនេះក្នុងឆ្នាំ ២០២១ ដែលមាន Face ID និង Touch ID នៅលើអេក្រង់។ លោកគូរំពឹងថា Apple នឹងប្រើអថេរនៃដំណោះស្រាយអ៊ុលត្រាសូនិករបស់ក្រុមហ៊ុន Qualcomm ដែលអនុញ្ញាតឱ្យអ្នកប្រើប្រាស់ដាក់ក្រយៅដៃលើផ្នែកធំនៃអេក្រង់ដើម្បីស្កែន។
សារព័ត៌មាន Bloomberg បានរាយការណ៍កាលពីខែកញ្ញាឆ្នាំ ២០១៩ ថា ក្រុមហ៊ុន Apple កំពុងសាកល្បងបច្ចេកវិជ្ជាស្កែនក្រយៅដៃលើអេក្រង់ដែលនឹងដំណើរការស្របគ្នាជាមួយ Face ID ។ កាលពីខែមុនសារព័ត៌មាន Bloomberg បានអះអាងថាអេក្រង់ Touch ID នឹងក្លាយជាការកែលម្អសំខាន់សម្រាប់ទូរស័ព្ទ iPhone នៅឆ្នាំនេះ។ Apple ត្រូវបានផ្តល់សិទ្ធិប៉ាតង់ជាច្រើនទាក់ទងនឹង Touch ID នៅក្រោមអេក្រង់ ដែលអាចត្រូវបានអនុវត្តលើ iPhone, iPad និង MacBook ៕
Apple អាចនឹងប្រើឧបករណ៍ចាប់សញ្ញាក្រយៅដៃនៅលើអេក្រង់អុបទិកនៅលើ iPhone 13
