Home ព័ត៌មានសំខាន់ៗ មាតុភូមិនិវត្...

មាតុភូមិនិវត្តន៍​កង​យោធា​មួក​ខៀវ​កម្ពុជា​ពី​លី​បង់​

​ដោយៈ​យោធិន​/​ភ្នំពេញៈកង​យោធា​មួក​ខៀវ​កម្ពុជា​ចំនួន​១៨៤​នាក់ (​នារី​២៤​នាក់​) ក្នុង​កងឯកភាព​អនុ​សេនា​ធំ​វិស្វកម្ម​ពហុ​ជំនាញ​លេខ​៣៩៦ បាន​និវត្ត​មកដល់​មាតុប្រទេស​វិញ​ដោយ​សុវត្ថិភាព​នាពេល​រំលង​អ​ធ្រា​តនៃ​ថ្ងៃទី​១​ឈានចូល​ថ្ងៃទី​២ ខែកុម្ភៈ ឆ្នាំ​២០២១ បន្ទាប់ពី​បានបញ្ចប់​បេសកកម្ម​អង្គការសហប្រជាជាតិ​ដោយ​ជោគជ័យ​រយៈពេល​មួយឆ្នាំ​ក្នុង​តំបន់​បេសកកម្ម​នៅ​សាធារណរដ្ឋ​លី​បង់​។​

​នាយ​ឧ​ត្ត​ម​សេនីយ៍​សែម សុវណ្ណនី​អនុប្រធាន​គណៈកម្មាធិកា​រ​ជាតិ​និង​ជា​អគ្គ​នាយ​មជ្ឈមណ្ឌល​ជាតិ​រក្សា​សន្តិភាព ព្រមទាំង​នាយទាហានជាន់ខ្ពស់​មជ្ឈមណ្ឌល​ជាតិ​រក្សា​សន្តិភាព​ជាច្រើនរូប​បានផ្តល់​កិច្ច​ស្វាគមន៍​យ៉ាង​កក់ក្តៅ​ដល់​ដំណើរ​មកដល់​របស់​ក​ង​យោធា​មួក​ខៀវ​ខាងលើនេះ​នៅ​ព្រលានយន្តហោះ​អន្តរជាតិ​ភ្នំពេញ។​

ជាមួយ​ប្រសាសន៍​ពាំនាំ​នូវ​ការសាកសួរ​សុខទុក្ខ​ពីស​ម្តេច​តេ​ជោ​ហ៊ុនសែន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​និង​សម្តេច​កិត្តិ​ព្រឹទ្ធ​បណ្ឌិត ប៊ុនរ៉ានី​ហ៊ុនសែន​ប្រធាន​កាកបាទក្រហមកម្ពុជា សម្តេច​ពិជ័យ​សេនា​ទៀ​បាញ់​ឧបនាយករដ្ឋមន្ត្រី​រដ្ឋ​មន្ត្រី​ក្រសួងការពារជាតិ​និង​លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការ​បរទេស​​និង​សហប្រតិបត្តិការ​អន្តរជាតិ​និង​ជា​ប្រធាន​គណៈកម្មាធិការ​ជាតិ នាយ​ឧ​ត្ត​ម​សេនីយ៍​សែម​សុវណ្ណនី​អនុប្រធាន​គណៈកម្មាធិកា​រ​ជាតិ បាន​ក្រើន​រំ​ឮ​ក​ដល់​កង​យោធា​មួក​ខៀវ​កម្ពុជា​ត្រូវយក​ចិត្ត​គោរព​ឲ្យ​បាន​ខ្ជាប់ខ្ជួន​នូវ​វិធាន​របស់​ក្រសួងសុខាភិបាល​ដើម្បី​ជៀស​ផុតពី​រោគ​កូ​វីដ​-១៩ សំដៅ​ធានាបាន​សុខភាព​ល្អប្រសើរ​ផ្ទាល់ខ្លួន ក្រុមគ្រួសារ​និង​សង្គមជាតិ​។​

ជាមួយគ្នានេះដែរ​កង​យោធា​មួក​ខៀវ​ត្រូវបាន​ក្រុមគ្រូពេទ្យ​ប្រចាំ​មជ្ឈមណ្ឌល​ជាតិ​រក្សា​សន្តិភាព​និង​ក្រុមគ្រូពេទ្យ​ក្រសួងសុខាភិបាល​ធ្វើ​ការយក​វត្ថុ​សំណាក​ដើម្បី​ធ្វើតេស្ត​រោគ​កូ​វីដ​-១៩ មុនពេល​ដែល​កង​យោធា​មួក​ខៀវ​ខាងលើនេះ​បន្តដំណើរ​នា​រាត្រី​ដដែល​នេះ​តាម​ក្បួន​រថយន្ត​ឆ្ពោះទៅកាន់​វិទ្យាស្ថាន​រក្សា​សន្តិភាព​ឧដុង្គ ជាទី​ដែល​ត្រូវ​ស្នាក់អាស្រ័យ​ធ្វើ​ច​ត្តា​ឡី​ស័ក​រយៈពេល​១៤​ថ្ងៃ​៕

ទីតាំងផ្សាយពាណិជ្ជកម្ម

- Advertisment -

Most Popular