Home ព័ត៌មានសំខាន់ៗ ប្រមុខ​យោធា​ម...

ប្រមុខ​យោធា​មី​យ៉ាន់​ម៉ា​និយាយថា រដ្ឋប្រហារ​ជា​ការជៀស​មិន​ផុត​

​ប្រែ​សម្រួលៈ​វាសនា​/​យ៉ាងហ្គោន​៖​ការបណ្តេញ​រដ្ឋាភិបាល​របស់​លោកស្រី អ៊ុង សាន ស៊ូ​ជី នៅ​មី​យ៉ាន់​ម៉ា​ជា​«​ការជៀស​មិន​ផុត​» នេះ​បើ​តាម​ការលើកឡើង​របស់​ប្រមុខ​យោធា​មី​យ៉ាន់​ម៉ា ឧត្តមសេនីយ៍ មីន អ៊ុង​​ហ្លាំង កាលពី​ថ្ងៃ​អង្គារ នៅពេល​រដ្ឋាភិបាល​អាម៉េរិក​ចាត់ទុក​ការដណ្តើម​អំណាច​នេះ​ជា រដ្ឋប្រហារ​មួយ​។​

ឧត្តមសេនីយ៍ មីន អ៊ុង ហ្លាំង បើក​កិច្ចប្រជុំ​គណៈរដ្ឋមន្ត្រី​លើក​ដំបូង​នៅ​ក្រុង​ណៃពី​ដោ​រ កាលពី​ថ្ងៃ​អង្គារ បន្ទាប់ពី​ធ្វើ​រដ្ឋប្រហារ​បាន​មួយថ្ងៃ​

​ទាហាន​ឈរជើង​នៅ​ផ្លូវបំបែក​មួយ​ក្នុង​ក្រុង​យ៉ាងហ្គោន​កាលពី​ថ្ងៃ​អង្គារ​

​យោធា​មី​យ៉ាន់​ម៉ា​ដ៏​មាន​ឥទ្ធិពល​កាលពី​ថ្ងៃ​ចន្ទ​បាន​ធ្វើអោយ​ពិភពលោក​ស្រឡាំងកាំង​នៅពេល​ខ្លួន​ឃាត់ខ្លួន​លោកស្រី ស៊ូ​ជី និង​មេដឹកនាំ​គណបក្ស​កាន់​អំណាច​ជាច្រើន​ទៀត​នៅ​មុន​ព្រឹក​ព្រហាម​មុន​សភា​​ជាប់ឆ្នោត​ថ្មី​បើកប្រជុំ​លើកដំបូង​របស់​ខ្លួន​តែ​ប៉ុន្មាន​ម៉ោង​។​

​ក្រោយ​រដ្ឋប្រហារ​ភ្លាម ឧត្តមសេនីយ៍ វីន អ៊ុង ហ្លាំង ត្រូវបាន​ផ្តល់​«​អំណាចនីតិប្រតិបត្តិ នីតិបញ្ញត្តិ​និង​យុត្តិធម៌​» ដោយ​បាន​ប្រែក្លាយ​មី​យ៉ាន់​ម៉ា​ទៅ​ជា​របប​យោធា​ជា​ស្វ័យប្រវត្តិ​ក្រោយពី​បាន​ស្ថិតនៅក្រោម​​រដ្ឋាភិបាល​ស៊ីវិល​បាន​១០​ឆ្នាំ​។​

​ក្នុងការ​ថ្លែង​ជា​សាធារណៈ​លើកដំបូង​របស់​លោក​ចាប់តាំងពី​យោធា​ចូល​កាន់កាប់​អំណាច ឧត្តមសេនីយ៍​រូបនេះ បាន​និយាយថា​ការ​ចូល​កាន់​អំណាច​របស់​យោធា​«​ស្របតាម​ច្បាប់​» បន្ទាប់​ពី​រដ្ឋាភិបាល​​ខកខាន​ក្នុង​ការឆ្លើយតប​នឹង​សារទុក្ខ​របស់​ក្រុម​យោធា អំពី​ការលួចបន្លំ​ក្នុង​ការបោះឆ្នោត​។​លោក​ថា «​បន្ទាប់​ពី​សំណើ​ជាច្រើន​ត្រូវ​បដិសេធ វិធី​នេះ​ជា​ការជៀស​មិន​ផុត​សំរាប់​ប្រទេស និង​វា​ជា​ហេតុផល​​ដែល​យើង​ជ្រើស​យក​វា​»​។​

​នៅ​ក្រុង​វ៉ាស៊ីនតោន ក្រសួងការបរទេស​អាម៉េរិ​ក បាន​និយាយថា ខ្លួន​បាន​វាយ​តំលៃ​ថា «​អ៊ុង សាន ស៊ូ​ជី មេដឹកនាំ​គណបក្ស​កាន់អំណាច​មី​យ៉ាន់​ម៉ា និង​លោក វីន មី​យ៉​នត៍ ប្រមុខ​រដ្ឋាភិបាល​ជាប់​ឆ្នោត ត្រូវ​​បាន​ទម្លាក់​នៅក្នុង​រដ្ឋប្រហារ​យោធា​មួយ​»​។​

​ការចាត់​ថ្នាក់​ថា​ជា​រដ្ឋប្រហារ​បែបនេះ​មានន័យថា អាម៉េរិក​មិន​អាច​ជួយ​រដ្ឋាភិបាល​មី​យ៉ាន់​ម៉ា ទោះជា​យ៉ាងណា​ផលប៉ះពាល់​ណាមួយ​គ្រាន់តែ​ជា​និមិត្តរូប ដោយសារ​តែ​ជំនួយ​អាម៉េរិក​ស្ទើរ​ទាំងអស់​ធ្លាក់​ទៅ​​អង្គការ​មិនមែន​រដ្ឋាភិបាល​។​ម្យ៉ាង​យោធា​មី​យ៉ាន់​ម៉ា បាន​ស្ថិតក្រោម​ទណ្ឌកម្ម​អាម៉េរិក​រួចជាស្រេច ដោយសារតែ​យុទ្ធនាការ​បង្ក្រាប​ពួក​អ៊ីស្លាម​រ៉ូ​ហ៊ីង​យ៉ា​នៅក្នុង​រដ្ឋ​រ៉ា​ឃី​ន​។​

​នៅក្នុង​រដ្ឋធានី ណៃពី​ដោ​រ គេ​ឃើញ​ទាហាន​ដាក់​កម្លាំង​យាម​នៅ​ក្រៅ​គេហដ្ឋាន​របស់​សមាជិក​សភា​នៅពេល​សមាជិក​សភា​បក្ស​កាន់​អំណាច​ម្នាក់​បាន​និយា​ថា វា​ជា​«​ជំរំ​ឃុំឃាំង​ឥត​ជញ្ជាំង​» តែ​នៅពេល​​យប់​មកដល់ អ្នកនយោបាយ​ខ្លះ​បាន​និយាយថា ពួកគេ​អាច​ធ្វើ​ដំណើរ​ចេញ​ចូល​ដោយ​សេរី​។​

​សេចក្តីថ្លែងការណ៍​មួយ​បង្ហោះ​ក្នុង​ទំព័រ​ហ្វេ​សប៊ុក​របស់​គណបក្ស​សម្ពន្ធ​ជាតិ​សំរាប់​លទ្ធិប្រជាធិបតេយ្យ បាន​អំពាវនាវ​អោយ​ដោះលែង​ស៊ូ​ជី ព្រមទាំង​ប្រធានាធិបតី វីន មី​យីនត៍ និង​សមាជិក​បក្ស​ដែល​ត្រូវ​​ចាប់ខ្លួន​។​វា​ក៏​ទាមទារ​អោយ​យោធា​ទទួលស្គាល់ លទ្ធផល​នៃ​ការបោះឆ្នោត​កាលពី​ខែវិច្ឆិកា​ឆ្នាំ ២០២០​ផងដែរ​៕

​គណបក្ស​សម្ពន្ធជាតិ​សំរាប់​លទ្ធិប្រជាធិបតេយ្យ បាន​អំពាវនាវ​អោយ​ដោះលែង​ស៊ូ​ជី ព្រមទាំង​ប្រធានាធិបតី វីន មី​យីនត៍ និង​សមាជិក​បក្ស​ដែល​ត្រូវ​ចាប់ខ្លួន​

 

 

 

ទីតាំងផ្សាយពាណិជ្ជកម្ម

- Advertisment -

Most Popular