Home ព័ត៌មានជាតិ សង្គម  រដ្ឋមន្រ្តីក...

 រដ្ឋមន្រ្តីក្រសួងបរិស្ថាន៖ជីវិតរីករាយផ្សារភ្ជាប់ជាមួយទេសចរណ៍ធម្មជាតិ

ដោយ:ដេប៉ូ/ភ្នំពេញ:នៅក្នុងពិធីប្រគល់ជ័យលាភីការប្រកួតប្រជែងវដេអូស្តីពីបរិស្ថាន ក្រោមប្រធានបទ “សម្រស់ស្រុកយើង”លោក សាយ សំអាល់ រដ្ឋមន្រ្តី ក្រសួងបរិស្ថាន បានលើកឡើងថា នៅពេលប្រទេសកំពុងមានសុខសន្តិភាពពេញលេញ ជាឱកាសនៃការអភិវឌ្ឍទេសចរណ៍ផ្សារភ្ជាប់នឹងធម្មជាតិរបស់ប្រជាជនកម្ពុជា។

ថ្លែងនៅក្នុងពិធីដែលបានរៀបចំឡើងកាលពីថ្ងៃទី២ ខែ កុម្ភៈឆ្នាំ ២០២១ នាទីស្តីការក្រសួងបរិស្ថាន លោក រដ្ឋមន្រ្តី បានមានប្រសាសន៍ថា នៅពេលកម្ពុជាមានសុខសន្តិភាពហើយ គឺបំផុស ឱ្យប្រជាពលរដ្ឋ បានយល់អំពីសក្តានុពល តម្លៃ និងសម្រស់នៃធនធានធម្មជាតិរបស់កម្ពុជា និងមានឱកាសរីករាយផ្សារភ្ជាប់នឹងធម្មជាតិ។

ជាមួយគ្នានេះលោក សាយសំអាល់បានឱ្យដឹងបន្ថែមថា “ការជំរុញលើកកម្ពស់សកម្មភាពទេសចរណ៍ផ្សារភ្ជប់ជាមួយធម្មជាតិ រួមចំណែក សំខាន់ក្នុងកិច្ចការពារអភិរក្សធនធានធម្មជាតិឱ្យកាន់តែ រឹងមាំ”។

ពាក់ព័ន្ធក្នុងរឿងនេះលោករដ្ឋមន្រ្តី បានវាយតម្លៃខ្ពស់ចំពោះការលះបង់របស់យុវជនទាំងអស់ដែលបានបង្ហាញពីទឹកចិត្តស្រឡាញ់ទឹកដី ស្រឡាញ់សន្តិភាព និងបានចូលរួមផ្សព្វផ្សាយបរិស្ថាន តាមរយៈការថតរូប និងផលិតវីដេអូស្អាតៗពីធម្មជាតិដ៏ស្រស់បំព្រងរបស់កម្ពុជាទៅកាន់ពិភពលោក។

លោក រដ្ឋមន្រ្តី បានគូសបញ្ជាក់ដែរថា ចាប់តាំងពី លោក ត្រូវបានរាជរដ្ឋាភិបាលតែងតាំងជារដ្ឋមន្រ្តីក្រសួងសបរិស្ថានមក គឺនៅឆ្នាំ២០១៣ មានកិច្ចការជាច្រើនដែលត្រូវធ្វើ ក្នុងនោះការលើកកម្ពស់ឱ្យមានការចូលរួមពីសាធារណជន គឺជារឿងចាំបាច់មួយក្នុងបុព្វហេតុការពារ និងអភិរក្សធនធានធម្មជាតិ។

នាឱកាសនោះដែរ លោក សាយ សំអាល់ បានលើកទឹកចិត្តឱ្យក្រុមអ្នកទទួលបានជ័យលាភីនាពេលនេះ បន្តខិតខំចូលរួមផ្សព្វ ផ្សាយបន្ថែមទៀត អំពីសម្រស់ធម្មជាតិស្រុកយើង ដើម្បីជួយលើកកម្ពស់លើវិស័យទេសចរណ៍ផ្សារភ្ជាប់នឹងធម្មជាតិ។

ជាមួយគ្នានេះ ការអភិវឌ្ឍទេសចរណ៍ធម្មជាតិ មិនត្រឹមតែរួមចំណែកលើកកម្ពស់ជីវភាពរបស់ប្រជាសហគមន៍ និងការអភិវឌ្ឍសេដ្ឋកិច្ចមូលដ្ឋាន ប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ដល់កិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព។

ដោយឡែកលោក ជួប ប៉ារីស៍ អគ្គនាយកនៃអគ្គនាយដ្ឋានចំណេះដឹង និងព័ត៌មានបរិស្ថានបាន វាយតម្លៃខ្ពស់ចំពោះក្រុមបេក្ខជន ដែលបានផលិតវីដេអូដែលមានគុណភាពល្អ បង្ហាញនូវតំបន់នានាដែលមានសក្តានុពលទេសចរណ៍ និងសម្រស់ស្រស់ល្អឯកនៃធម្មជាតិនៅប្រទេសកម្ពុជា។

លោក បានបន្តថា ក្រសួងបរិស្ថានបានរៀបចំការប្រកួតវិឌេអូស្តីពីបរិស្ថាន ក្នុងគោលបំណងលើកកម្ពស់ការផ្សព្វផ្សាយដល់សាធារណជន អំពីសក្តានុពល និងសម្រស់ដ៏ស្រស់ត្រកាលនៃធម្មជាតិនៅប្រទេសកម្ពុជា ដើម្បីផ្លាស់ប្តូរផ្នត់គំនិតជាវិជ្ជមានចំពោះបរិស្ថាន និងលើកកម្ពស់ជីវភាពរបស់សហគមន៍មូលដ្ឋាន។

គួរបញ្ជាក់ថា ក្រសួងបរិស្ថាន បានរៀបចំ ការប្រកួតវីដេអូខ្លីស្តីពីបរិស្ថានឆ្នាំ២០២០ ក្រោមប្រធានបទ «សម្រស់ស្រុកយើង» ចាប់ពីខែកញ្ញា ដល់ខែធ្នូ ឆ្នាំ២០២០។ វីដេអូជាច្រើនរឿងទាក់ទងនឹងជីវិត និងធម្មជាតិបានចូលរួមប្រកួត។

ចុងក្រោយ ក្រសួងបរិស្ថានរកឃើញអ្នកទទួលបានជ័យលាភីឆ្នើម មានចំនួន ១១ក្រុម រួមមាន៖ ១)ក្រុមយុវនិនេត្យ ២)ក្រុម លោក សារី ប៉ោស៊ីង ៣)ក្រុម United Media ៤)ក្រុម The Cevents ៥)ក្រុម Youth AGE ៦)ក្រុម 2 GO ADVANTURE ៧)ក្រុម The Shutter ៨)ក្រុម រត់ចោលស្រុក ៩)ក្រុម កញ្ញា តាន់ ងួននីនី ១០)ក្រុម កញ្ញា ជូ លីនី និង១១)ក្រុម លោក សួរ ប៊ុនម៉ារ៉ាឌី។

ក្រុមដែលទទួលជ័យលាភីលេខ១ គឺក្រុមយុវនិនេត្យ ផលិតវីដេអូរឿង «សុបិន្ត» ក្រុមដែលទទួលបានជ័យលាភីលេខ២ គឺក្រុម លោក សារី ប៉ោស៊ីង ផលិតវីដេអូស្តីពី «ឋានសួគ៌ក្រោមមេឃ» និងក្រុមដែលទទួលបានជ័យលាភីលេខ៣ គឺក្រុម The United Media ផលិតវីដេអូស្តីពី «I AM CAMBODIA»៕

ទីតាំងផ្សាយពាណិជ្ជកម្ម

- Advertisment -

Most Popular