កម្ពុជា​នាំចេញ​ស្វាយ​ទៅ​ចិន​នៅ​ខែមករា បាន​ជិត​៣០.០០០ តោន​

​ដោយៈ ជា សីហៈ​/​ភ្នំពេញៈ នៅក្នុង​ខែមករា ឆ្នាំ ២០២១ នេះ ការនាំចេញ​ផ្លែស្វាយ​ស្រស់​របស់​កម្ពុជា​ទៅកាន់​ទីផ្សារ​នៅ​ចិន​សម្រេចបាន​ជិត​៣០.០០០ តោន ។

​លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង នេសាទ បាន​ឲ្យ​ដឹងថា កម្ពុជា​នាំ​ស្វាយ​ទៅ​ចិន​ដោយមាន​មាន​វិញ្ញាបនបត្រ​ភូតគាម​អនាម័យ​បាន​ចំនួន​ប្រមាណ ១១.៦៣៨​តោន និង​គ្មាន​វិញ្ញាបនបត្រ​ភូតគាម​អនាម័យ​ចំនួន​ប្រមាណ​ជា ១៨.០០០​តោន ។

​គួររំលឹកថា ដំណាំ​ស្វាយ​នៅពេលនេះ​កំពុងតែ​ក្លាយជា​ផលិតផល​នាំចេញ​មួយ​ហើយ​របស់​កម្ពុជា ។

​កាលពី​ក្នុង​ឆ្នាំ​២០២០​កន្លងទៅ ការនាំចេញ​ផ្លែស្វាយ​ស្រស់​ទៅកាន់​ទីផ្សារ​ក្រៅប្រទេស​មាន​ចំនួន ៩៥៧.៦៨០​តោន ក្នុងនោះ​ចំនួន​១០៧.៦៨០​តោន បាន​នាំចេញ​ដោយមាន​វិញ្ញាបនបត្រ​ភូតគាម​អនាម័យ និង​ចំនួន​៨៥០.០០០​តោន បាន​នាំចេញ​ដោយ​គ្មាន​វិញ្ញាបនបត្រ​ភូតគាម​អនាម័យ​។

​បច្ចុប្បន្ន​នៅ​ទូទាំងប្រទេស​មាន​ផ្ទៃដី​ដាំ​ដុះ​ស្វាយ​សរុប​ចំនួន ១២៤.៣១៩​ហ​.​ត ផ្ទៃដី​ប្រមូល​ផល​មាន​ចំនួន ៩១.៣៩៨​ហ​.​ត ​ដោយ​ទទួល​ទិន្នផល​ជា​មធ្យម​ចំនួន​១៦​តោន​នៅក្នុង​ផ្ទៃដី​១ ហ​.​ត នៅក្នុង​មួយ​រដូវ ដែលមាន​បរិមាណ​ផល​សរុប​ចំនួន​១.៤៤៨.៦៧៧​តោន​៕​

ទីតាំងផ្សាយពាណិជ្ជកម្ម

- Advertisment -

Most Popular