Home កីឡា លោក​ម៉ូ​រី​ញ៉...

លោក​ម៉ូ​រី​ញ៉ូ​និយាយថា វា​មិន​ពិបាក​ជោគជ័យ​ទេ​ក្នុងនាម​ជា​អ្នក​ចាត់ការ​ទូទៅ​របស់ Chelsea

​ប្រែ​សម្រួល : កញ្ញា​ដា​លី​ស ៖ លោក ចូសេ ម៉ូ​រី​ញ៉ូ និយាយថា ប្រវត្តិសាស្ត្រ​បាន​បង្ហាញថា​វា​ងាយស្រួល​ក្នុង​ការទទួលបាន​ជោគជ័យ​ក្នុង​នាម​ជា​អ្នក​ចាត់ការ​ទូទៅ​របស់​ក្រុម​តោ​ខៀវ Chelsea​បើទោះបីជា​មាន​​ការទាមទារ​ខ្លាំង​ពី​ម្ចាស់​ក្លិប លោក រ៉ូ​មែន អា​ប្រា​ម៉ូ​វិក ក៏ដោយ​។​

​ម្ចាស់​ក្លិប​ជនជាតិ​រុស្ស៊ី ដែល​បាន​បណ្តេញ​លោក​ម៉ូ​រី​ញ៉ូ​ពីរដង​បើ​ទោះបីជា​លោក​បាន​នាំ​ពាន​មក​ទឹកដី Stamford Bridge ថ្មី​នេះ​បាន​បោះបង់ចោល​លោក ហ្វ្រែង ឡាំ​ផាត​ហើយ​ជំនួស​វិញ​ដោយ​អតីត​​គ្រូបង្វឹក Borussia Dortmund និង PSG លោក ថូ​ម៉ាស ធូ​ខល់​។​

​គ្រូបង្វឹក​ជនជាតិ​អាល្លឺម៉ង់​រូប​នេះ​ដឹង​ពីអ្វី​ដែល​គេ​រំពឹង​ពី​គាត់​នៅ​ទឹកដី Stamford Bridge ហើយ​នោះ​គឺ​ត្រូវ​នាំមក​នូវ​ពានរង្វាន់​ដូច​គ្រូបង្វឹក​មុនៗ​របស់​គាត់​ដែរ​។​

​លោក​អា​ប្រា​ម៉ូ​វិក​រង​ការរិះគន់​ចំពោះ​ឥរិយាបថ​ឥត​ត្រា​ប្រណី​របស់​គាត់​ក្នុង​ការបណ្តេញ​អ្នក​ចាត់ការ​ទូទៅ ប៉ុន្តែ​លោក​ម៉ូ​រី​ញ៉ូ​និយាយថា នោះ​ជា​តម្លៃ​ត្រូវ​សង​ចំពោះ​លក្ខខណ្ឌ​ជួយ​ក្លិប​ឱ្យ​ជោគជ័យ​។​

​លោក​ម៉ូ​រី​ញ៉ូ​និយាយ​នៅ​មុនពេល​ក្រុម​មាន់​ខ្នាយ​មាស​របស់​លោក​ជួប​ជាមួយ​ក្រុម​តោ​ខៀវ Chelsea នៅ​យប់​ថ្ងៃ​ព្រហស្បតិ៍​នេះ​ថា “​ខ្ញុំ​គិតថា​វា​មិន​ពិបាក​ទេ​ក្នុងការ​ធ្វើ​ជា​គ្រូបង្វឹក​នៅ Chelsea ព្រោះ​ខ្ញុំ​ជា​ម្ចាស់​ជើងឯក ៣ ដង (​កា​ឡូ​) អាន់​សេ​ឡូ​ទី​ជា​ម្ចាស់​ជើងឯក អង់​តូ​នីញ៉ូ កុងតេ​ជា​ម្ចាស់​ជើងឯក​។ វា​មិន​ពិបាក​ទេ ព្រោះ​យើង​ឈ្នះ​ជើងឯក​នៅ​ទីនោះ​”​។​

“​ខ្ញុំ​ជឿជាក់​ថា​Chelsea​តែងតែ​មាន​កីឡាករ​ឆ្នើមៗ​និង​ក្រុម​ល្អៗ​ហើយ​គ្រូបង្វឹក​ល្អ​ច្បាស់​ជា​រីករាយ​នឹង​ធ្វើការ​ជាមួយ​ក្លិប​និង​ជាមួយ​កីឡាករ​ដែល​ផ្តល់​ឱ្យ​អ្នក​នូវ​ឱកាស​ដ៏​ល្អ​ដើម្បី​ទទួលបាន​ជោគជ័យ​និង​ឈ្នះ​ពានរង្វាន់​”​។​

“​ខ្ញុំ​យល់​ពី​សំណួរ​របស់​អ្នក​ហើយ ជា​ការពិត គ្រូបង្វឹក​ត្រូវការ​ពេលវេលា​និង​ត្រូវការ​ស្ថិរភាព ហើយ​វា​ជា​រឿង​ល្អ​មួយ​ក្នុង​ការ​មាន​ស្ថិរភាព​។ ខ្ញុំ​មិន​និយាយថា ស្ថិរភាព​ជួយ​ឱ្យ​អ្នក​គេង​លក់​ស្រួល​នោះទេ ខ្ញុំ​និយាយថា​ស្ថិរភាព​ផ្តល់ឱ្យ​អ្នក​នូវ​វិធី​គិត​ផ្សេង ហើយ​អ្នក​មិន​ត្រឹមតែ​គិត​ពី​ថ្ងៃនេះ​ទេ អ្នក​ក៏​គិត​ពី​ថ្ងៃស្អែក អ្នក​ក៏​គិត​ពី​អនាគត​ដែរ​”​។​

“​នោះ​ជា​របៀប​ដែល​វា​កើត​ឡើង​។ វា​ជា​ក្លិប​របស់​លោក​អា​ប្រា​ម៉ូ​វិក ហើយ​អ្នក​ត្រូវតែ​យល់​ថា វា​អាស្រ័យ​លើ​គាត់​ក្នុង​ការសម្រេចចិត្ត​គ្រប់យ៉ាង​”​។​

“​ក្នុងករណី​របស់ខ្ញុំ ខ្ញុំ​ធ្លាប់​នៅ​ទីនោះ​២​សម័យកាល ហើយ​ខ្ញុំ​ជា​ម្ចាស់​ជើងឯក​ទាំង​២​សម័យកាល ហើយ​ខ្ញុំ​រីករាយ​ដែល​បាន​នៅ​ទីនោះ​កាលពី​មុន និង​មាន​ឱកាស​ឈ្នះ​ពាន​”៕

​លោក​ម៉ូ​រី​ញ៉ូ​ថា​គ្រូបង្វឹក​មិន​ពិបាក​ជោគជ័យ​ទេ​នៅ​ក្លិប Chelsea

ទីតាំងផ្សាយពាណិជ្ជកម្ម

- Advertisment -

Most Popular