Home ព័ត៌មានជាតិ សន្តិសុខ ​សំណុំរឿង​គំរ...

​សំណុំរឿង​គំរាមកំហែង ថា​នឹង​សម្លាប់​អ្នកកាសែត កោះសន្តិភាព ត្រូវបាន​តុលាការ កំណត់​ថ្ងៃ​ជំនុំ​ជំ​រះ​

​ដោយៈ គ្រញូង / បាត់ដំបងៈ តុលាការ​សាលាដំបូង​ខេត្ត បានសម្រេច​ថា នឹង​លើក​យកមក​សំណុំរឿង​គំរាមកំហែង ថា​នឹង​សម្លាប់​អ្នកកាសែត កោះសន្តិភាព មក​ជំនុំជម្រះ នៅ​ព្រឹក​ថ្ងៃទី​៩ ខែកុម្ភៈ ឆ្នាំ​២០២១ ខាងមុខ​នេះហើយ ក្រោយពី អ្នកកាសែត កោះសន្តិភាព ម្នាក់ នៅ​ខេត្តបាត់ដំបង បានដាក់​ពាក្យបណ្តឹង ទៅ​តុលាការ អស់​រយៈពេល ជាង​៣​ខែ​កន្លងមក​នោះ ។​

​យោងតាម​ដីកាកោះ របស់​អយ្យការ​អម​តុលាការខេត្ត​បាត់ដំបង ដែល​ចុះហត្ថលេខា ដោយ​លោក ប៉ង់ ចាន់​សុ​យុ​ទ្ធា​រ៉ា ព្រះរាជអាជ្ញារ​រង នៃ​អយ្យការ អម​តុលាការ ខេត្តបាត់ដំបង បានឱ្យដឹងថាៈ សាលាដំបូង​ខេត្តបាត់ដំបង នឹង​បើក​ការ​ជំនុំ​ជំ​រះ​ក្តី ពាក់ព័ន្ធ​សំណុំរឿង ករណី​គំរាម ថា​នឹង​សម្លាប់​អ្នកកាសែត កោះសន្តិភាព​ម្នាក់ នៅ​ខេត្តបាត់ដំបង នៅ​ម៉ោង ៨ ព្រឹក​ថ្ងៃទី​៩ ខែកុម្ភៈ ឆ្នាំ​២០២១ ខាងមុខ​នេះហើយ បន្ទាប់ពី​ទទួល​ពាក្យបណ្តឹង រយៈពេល​ជាង បី​ខែ កន្លងមក​។​

​ក្នុង​ដីកាកោះ​របស់​សាលាដំបូង​ខេត្ត ចុះ​នៅ​ថ្ងៃទី​២៧ ខែមករា ឆ្នាំ​២០២០ បានកំណត់​ការ​ជំនុំ​ជំ​រះ រឿងក្តី ដែលមាន​ដើមបណ្តឹង ឈ្មោះ ឆោម ពិសម័យ អាយុ ៥១​ឆ្នាំ នៅ​ភូមិ​សំរោង ឃុំ​ស្នឹង ស្រុក​បាណន់ ខេត្តបាត់ដំបង ជា​ភ្នាក់ងារ​កាសែត កោះសន្តិភាព ប្រចាំខេត្ត​បាត់ដំបង​។ លោក ឆោម ពិសម័យ បាន​ប្តឹង​ជន​ជាប់ ចោទ ឈ្មោះ កាយ ស៊ី​ល​ណា​រ៉ូ ក្នុងករណី​គំរាម ថា​នឹង​សម្លាប់ ប្រព្រឹត្ត​នៅ​ភូមិ​ចំការ​សំរោង​២ សង្កាត់​ចំការ​សំរោង ក្រុង​បាត់ដំបង កាលពី​ថ្ងៃទី​១ ខែវិច្ឆិកា ឆ្នាំ​២០២០ ។​

​មន្ត្រី​សាលាដំបូង​ខេត្ត បាន​បញ្ជាក់ថា ករណី​ខាងលើនេះ គឺជា​បទល្មើស​ដែលមាន​ចែង ផ្តន្ទាទោស តាម​មាត្រា ២៣៣ នៃ​ក្រមព្រហ្មទណ្ឌ បើសិន​រកឃើញ​កំហុស​ពិតប្រាកដ​។​

​ក្នុង​ដីកា​របស់​សាលាដំបូង ខេត្តបាត់ដំបង បាន​បញ្ជាក់ថា ក្នុងការ​ជំនុំ​ជំ​ម្រះ​ក្តី ខាងលើនេះ មាន​សមាសភាព​ចូលរួម ជំនុំជម្រះ​បី​រូប គឺ​លោក ចាប តុលា ចៅក្រម​សាលាដំបូង ជា​ចៅក្រម​ជំនុំជម្រះ​, លោក ប៉ង់ ចាន់​សុ​យុ​ទ្ធា​រ៉ា ព្រះរាជអាជ្ញារ​រង ជា​តំណាង​អយ្យការ និង​លោក ម៉ៅ វណ្ណា ជា​ក្រឡាបញ្ជី​សវនាការ​។​
​លោក ឆោម ពិសម័យ បាន​សម្តែង​នូវ​ការភ្ញាក់ផ្អើល​ផង រីករាយ​ផង ដែល​តុលាការខេត្ត បាន​ដំណើរការ​រឿងក្តី របស់លោក បាន​ឆាប់រហ័ស​។ លោក​សង្ឃឹមថា តុលាការ នឹង​ផ្តល់​យុត្តិធម៌ ជូន​លោក ក៍​ដូចជា​អ្នកសារព័ត៌មាន​ទូទៅ​ដែរ ដើម្បី​កុំអោយ​មានការ​គំរាមកំហែង មកលើ​អ្នកសារព័ត៌មាន ដូច្នេះ​ទៀត​។​

​សូម​រំលឹកថា លោក ឆោម ពិសម័យ ដំបូង​បានដាក់​ពាក្យបណ្តឹង ចូលទៅ​កាន់​ស្នងការដ្ឋាន​នគ​បាល ខេត្តបាត់ដំបង នៅ​ដើមខែ​វិច្ឆិកា ឆ្នាំ​២០២០ បន្ទាប់ពី​អ្នក កាសែត​រូបនេះ អះអាងថា ទទួលរង​នូវ​ការ​គំរាម​បាញ់សម្លាប់ តាមរយៈ​បណ្តាញ​សង្គម ពី​យុវជន​ម្នាក់ ឈ្មោះ កាយ ស៊ី​ល​ណា​រ៉ូ ជា​កូនលោក​អធិការ ក្រុង​បាត់ដំបង មួយរូប បន្ទាប់ពី​អ្នកកាសែត​រូបនេះ បាន​សរសេរ​អត្ថបទ​មួយ ទាក់ទង​នឹង​ឪពុក​របស់គេ ដែល​គំរាម​បាញ់សម្លាប់ ម្តាយ​របស់ខ្លួន ខណៈដែល​លោក​ព្យាយាម សុំ​ត្រូវរ៉ូវ​គ្នា​វិញ តែ​អតីត​ប្រពន្ធ មិន​ព្រម បន្ទាប់ពី​លែងលះ ដោយមាន​សាលក្រម ហើយ​ក្តី​។​

​តាម​ឃ្លី​ប​វីដេអូ យុវជន​រូបនោះ បាន​ដើរ​ចូលមក ខណៈដែល​ម្តាយ​របស់ខ្លួន កំពុង​ឡាយ​លក់​គ្រឿង​សង្ហា​រឹម ដោយ​ប្រើពាក្យ​ថា ចាំមើល​អា​អ្នកកាសែត​ហ្នឹង​ណា​! បើ​មិន​បាញ់​ក្បាល​ហ្អែ​ង ងាប់​ហ្អា​ស់ មិនមែន​អញ​អា​រ៉ូ​ទេ​! ហ្អែ​ង​ចាំមើល អោយ​អញ​ដឹង​ឈ្មោះ អា​អ្នកកាសែត​ហ្នឹង ហើយ​ហ្អែ​ង​ចាំមើល​! ។​
​លោក ឆោម ពិសម័យ បានបញ្ជាក់​ថាៈ ថ្វីត្បិតតែ​យុវជន​នោះ មិនបាន​សំដៅ​ឈ្មោះ រូបលោក ក៏ពិតមែន តែ​លោក​ជា​អ្នកសរសេរ អត្ថបទ​ទាក់ទង​ឪពុក​របស់គេ ។ លោក​ចាត់ទុកថា វា​ជាការ​គំរាមកំហែង សម្លាប់​ជីវិត ដូច្នេះ​លោក​ស្នើ​សុំអោយ​តុលាការ ចាត់ការ​តាមផ្លូវ​ច្បាប់ លើ​យុវជន​រូបនេះ និង​មាន​ទារ​សំណង​ជំងឺ​ចិត្ត ២០ លាន​រៀល​។​

​យើង​មិនទាន់​អាន​ទំនាក់ទំនង ចុងចោទ​ដើម្បី​ឆ្លើយបំភ្លឺ​ជុំវិញ សំណុំរឿង​ចោទប្រកាន់ ខាងលើ​បានទេ​។ សូមបញ្ជាក់ថា សំណុំរឿង​អ្នកកាសែត ខាងលើនេះ ក៏​កំពុងស្ថិត​ក្នុងការ​ឃ្លាំមើល ពី​ក្រសែភ្នែក​របស់ សមាគម​ការពារ​អ្នកកាសែត នៅ​កម្ពុជា អង្គការ​សង្គម​ស៊ីវិល និង​មាន​ថ្នាក់ដឹកនាំ​ខេត្ត​ផងដែរ ៕/V

​រូបថត​រះ​លោក​ឆោម ពិសម័យ​ភ្នាក់ងារ​កា​សែ​តោះ​សន្តិភាព​ដែល​ប្តឹង​ពីបទ​គំរាម​សម្លាប់​

ទីតាំងផ្សាយពាណិជ្ជកម្ម

- Advertisment -

Most Popular