ក្រសួងបរិស្ថាន​គ្រោង​នឹង​រៀបចំ​កម្មវិធី​បោះជំរំ​ស្រឡាញ់​ព្រៃ​ឡង់​

​ដោយ​:​ដេប៉ូ​/​ភ្នំពេញ​: លោក នេត្រ ភក្ត្រា រដ្ឋលេខាធិការ​ក្រសួងបរិស្ថាន​បាន​បញ្ជាក់ថា​ក្រសួង​នឹង​រៀបចំ «​កម្មវិធី​បោះជំរំ​» ក្នុង​ដែនជម្រកសត្វព្រៃ «​ព្រៃ​ឡង់​» ក្នុងភូមិ​សាស្ត្រ​ខេត្តក្រចេះ រយៈពេល​២​ថ្ងៃ​ពោល គឺ​ចាប់ពី​ថ្ងៃទី​១៤ ដល់​១៥ ខែកុម្ភៈ ឆ្នាំ​២០២១​។​

​បើតាម​ការឱ្យ​ដឹង​រប​ស់លោក នេត្រ​ភក្ត្រា បាន​បញ្ជាក់ថា កម្មវិធី​បោះជំរំ​ស្រឡាញ់​ព្រៃ​ឡង់​នេះ ក្រោម​ប្រធាន​បទ «​យើង​ស្រឡាញ់​ព្រៃ​ឡង់​» ហើយ​កម្មវិធី​នេះ នឹង​បើកទូលាយ​ឱ្យមាន​ការចូលរួម​ពី​សំណាក់​ក្រសួង ស្ថាប័ន ដៃគូ​អភិវឌ្ឍន៍ សមាគម និង​អង្គការ​មិនមែន​រដ្ឋាភិបាល​បណ្តាញ​សហគមន៍​ថ្នាក់​តំបន់ និង​ប្រជា​សហគមន៍​មូលដ្ឋាន ដែល​តាម​ការ​ប៉ាន់ ស្មាន​នឹងមាន​អ្នកចូលរួម​ប្រមាណ​៣០០​នាក់​។

​លោក​រដ្ឋលេខាធិការ​បា​ន​មានប្រសាសន៍​ដែរ​ថា​ក្នុង​ឆ្នាំ​២០២១ នេះ​គឺជា​លើក​ទី​២ ហើយ ដែល​ក្រសួងបរិស្ថាន​បាន​ដឹកនាំ​កម្មវិធី​បោះជំរំ​នេះ​។ កម្មវិធី​បោះជំរំ​នេះ​មាន​គោលបំណង​ដើម្បី ១) សម្តែង​នូវ​ក្តី​ស្រឡាញ់​ចំពោះ​ធន​ធានធម្មជាតិ ជីវៈចម្រុះ និង​បរិស្ថាន​នៅ​ដែនជម្រកសត្វព្រៃ​ព្រៃ​ឡង់ ក៏ដូចជា​នៅក្នុង​ប្រទេស​កម្ពុជា​ទាំងមូល​។ ២)​ផ្សព្វផ្សាយ​ការយល់ដឹង​និង​ចែករំលែក​បទពិសោធ​ក្នុងការ​គ្រប់គ្រង​ធនធានធម្មជាតិ​។ ៣) បំផុសគំនិត​និង​ស្មារតី​ដល់ ប្រជាជន​ជាពិសេស​ក្នុង​ស្រទាប់​យុវវ័យ​ឱ្យ​ស្រឡាញ់ និង​ចូលរួម​អភិរក្ស​ធនធានធម្មជាតិ​។ ៤) បង្កើន​ការប្រាស្រ័យ​ទាក់ទង​របស់​ប្រជាជន​គ្រប់​មជ្ឈដ្ឋាន​ដើម្បី​រួមគ្នា​ការពារ និង​អភិរក្ស​ធនធានធម្មជាតិ​ជីវៈចម្រុះ និង​បរិស្ថាន​។​


​ ​
​ជាមួយគ្នានេះ​លោក នេត្រ ភក្ត្រា​បានលើកឡើង​ថា ព្រៃ​ឡង់​ត្រូវបាន​រាជរដ្ឋាភិបាល​បង្កើត ឡើង​តាំងពី​ឆ្នាំ ២០១៦ ហើយ​ស្ថិតក្រោម ការគ្រប់គ្រង អភិរក្ស​របស់​ក្រសួងបរិស្ថាន​។ ព្រៃ ឡង់ មាន ផ្ទៃដី សរុប ជាង ៤៣ ម៉ឺន ហិកតា និង មាន ភូមិសាស្ត្រ ខេត្ត ចំនួន ៤ គឺ ស្ទឹងត្រែង ព្រះវិហារ កំពង់ធំ និង​ក្រចេះ​។ កាលពី​ឆ្នាំ ២០១៩ ក្រសួងបរិស្ថាន​បានប្រកាស​ទទួលស្គាល់ តំបន់ការពារធម្មជាតិ ចំនួន ១៩ ដែលមាន​សិទ្ធិ​ស្របច្បាប់​ចូលរួម​សកម្មភាព​ការពារ និង​អភិរក្ស​ធនធានធម្មជាតិ នៅក្នុង ដែនជម្រកសត្វព្រៃ​ដ៏​មាន​សារៈសំខាន់​។

​លោក​រដ្ឋលេខាធិការ​បា​ន​បន្ថែមថា ”​ខ្ញុំ​សូម​គូសបញ្ជាក់​សាជាថ្មី​នូវ​កិច្ចខិតខំ​ប្រឹងប្រែង​រប​ស់រាជ​រដ្ឋាភិបាល​កម្ពុ​ជា របស់​មន្ត្រី​ឧ​ទ្យា​នុ​រក្ស​នៃ​ក្រសួង បរិស្ថាន និង​សហគមន៍​តំបន់ការពារធម្មជាតិ​ក្នុង​ការងារ​គ្រប់គ្រង និង​អភិរក្ស​ធនធានធម្មជាតិ និង​ជីវៈចម្រុះ​នៅក្នុង​ដែនជម្រកសត្វព្រៃ​ព្រៃ​ឡង់​។ កិច្ចខិតខំ​ប្រឹងប្រែង​លើ​ការអនុវត្ត​ច្បាប់ និង​ការអប់រំ​ផ្សព្វផ្សាយ បានធ្វើឱ្យ​កម្រិត​បទល្មើស​ទ្រង់ទ្រាយ​ធំ​លែងកើត​មាន ហើយ​មន្ត្រី​មាន​សមត្ថកិច្ច​បន្ត​បង្ក្រាប និង​ទប់ស្កាត់​បទល្មើស​តូចៗ ដែល​នៅ​កើតមាន​បន្ថែមទៀត​”​។​

​បើតាម​លោក​រដ្ឋលេខាធិការ​ក្រសួងបរិស្ថាន​បានឱ្យដឹង​ដែរ​ថា ក្នុងការ​អនុវត្ត​ច្បាប់ ដើម្បី​ទប់ស្កាត់ និង​បង្ក្រាប​បទល្មើស​ធនធាន​ធម្មជាតិ​នៅ​ឆ្នាំ​២០២០ កន្លងទៅនេះ មន្ត្រី​ឧ​ទ្យា​នុ​រក្ស​នៃ​ក្រសួងបរិស្ថាន និង​សហគមន៍ តំបន់ការពារធម្មជាតិ​ដោយមាន​ការគាំទ្រ​ពី​គម្រោង​ព្រៃ​ឡង់​បៃតង​របស់ USAID ផង បាន​ចុះ​ល្បាត​ចំនួន​១៧២៨​លើក បង្ក្រាប​បទល្មើស​បាន​ចំនួន​១០១៩​ករណី ក្នុង​នោះបាន​បញ្ជូន​សំណុំរឿង​ទៅ​តុលាការ​ចំនួន​៤៧​ករណី រឹបអូស​រ៉​ណារ​យន្ត​បាន​ចំនួន​៤៨១​គ្រឿង គោយន្ត​កន្ត្រៃ​ចំនួន​១១៦​គ្រឿង រឹបអូស​ម៉ូតូ​ចំនួន​៤៧​គ្រឿង ដោះ​អន្ទាក់​ចេញពី​តំបន់​ព្រៃ​ឡង់​បាន​ចំនួន​២៦៣០​អន្ទាក់ ដកហូត​កាំភ្លើង​កែច្នៃ​ចំនួន​១១៧​ដើម ដកហូត​ឈើ​បាន​ចំនួន​២៧៥​ម៉ែត្រគូប ពិន័យ​អន្តរការណ៍​ចំនួន​៦៩​ករណី និង​ធ្វើ​កិច្ចសន្យា​និង​អប់រំ​ចំនួន​៣៧៩​ករណី​៕


ទីតាំងផ្សាយពាណិជ្ជកម្ម

- Advertisment -

Most Popular