សហភាព​សហព័ន្ធ​កម្ពុជា​ប្រចាំ​ខេត្តសៀមរាប ជួយ​កសាង​ផ្ទះមួយ​ខ្នង ជូន​ដល់​គ្រួសារ​ដែល ភ្លើង​ឆះ​ផ្ទះ នៅ​ស្រុក​ស្វាយ​លើ​

ដោយៈ​បាយ័ន / សៀមរាប​: នៅ​ថ្ងៃទី​៤ ខែកុម្ភៈ ឆ្នាំ​២០២១ ក្រុម​សហភាព​សហព័ន្ធ​កម្ពុជា ប្រចាំខេត្ត​សៀមរាប ដឹកនាំ​ដោយ​លោក ជឿន វិចិត្រ បាន​ចុះ​ចែក​អំណោយ​រួម​នឹង កសាង​ផ្ទះ​ថ្មី មួយ​ខ្នង ជូន​ដល់​គ្រួសារ​ដែល​រង​ការឆេះ​ផ្ទះ​អស់ នៅ​ភូមិ​សែន​ជ័យ ឃុំ​កន្ទួត ស្រុក​ស្វាយ​លើ ខេត្តសៀមរាប​។​

​លោក ជឿន វិចិត្រ បាន​និយាយថាៈ ដោយ​ពិនិត្យឃើញ​ស្ថានភាព នៃ​គ្រួសារ​គាត់ លំបាក​ខ្លាំង ក្រុមការងារ បានសំរេច​សាងសង់​ផ្ទះ​ថ្មី ទំហំ ៥​ម៉ែត្រ គុណ​នឹង ៦ ម៉ែត្រ និង​បង្គន់​អនាម័យ​ថ្មី ជូន​គ្រួសារ​គាត់ ឱ្យ​រួចរាល់​យ៉ាងយូរ នៅ​សប្តាហ៍​ក្រោយ​ដោយ​ដាក់ ផ្ទះ​នោះ មាន​ឈ្មោះថា ផ្ទះ​សន្តិភាព​។ លោក​បាន​បន្តថាៈ គ្រួសារ​ដែល​រងគ្រោះ ដោយ​អគ្គិភ័យ​នេះ មាន​ប្តី​ឈ្មោះ គល់ ទិ​ត្យ អាយុ ៦៣ ឆ្នាំ ប្រពន្ធ​អាយុ ៥០​ឆ្នាំ​មានកូន បង្កើត ៣​នាក់ និង​កូនប្រសារ ២ នាក់​។ អំណោយ​ដែល​យកមក​ចែកជូន រួមមាន អង្ករ ៣០​គីឡូ ត្រីខ​១​យួ មី​១​កេះ ទឹក​ស៊ី​អី​វ​១​យួរ ទឹកត្រី​១​យួរ ទឹកខ្មេះ​១​ដប ស្ករស​១​គីឡូ អំបិល​១​មួយ​គីឡូ ប៊ីចេង​កន្លះ​គីឡូ ទឹក​សុទ្ធ​៥​យួរ ម៉ាស់​១​ប្រអប់ ភួយ​១ អាវ​រងា​១ និង​ថវិកា ៥00.000 រៀល​។​

​សូមបញ្ជាក់ថា កាល​ថ្ងៃទី​៣ ខែកុម្ភៈ ឆ្នាំ​២០២១ វេលា​ម៉ោង ២ រសៀល មាន​អគ្គិភ័យ​មួយ បានកើត​ឡើង ដោយ​ភ្លើង​ឆេះ​ព្រៃ ក្នុងភូមិ​សែន​ជ័យ ឃុំ​កន្ទួត ស្រុក​ស្វាយ​លើ​។ ដោយ ខ្លាច​រាល​ដល់ផ្ទះ គ្រួសារ​ឈ្មោះ គល់ ទិ​ត្យ បាន​ទៅ​ពន្លត់ ហើយក៏​មានការ​ហើរ រងើកភ្លើង មក​តាម​ខ្យល់ ធ្លាក់ចំ​ដំបូលផ្ទះ ដែល​ប្រក់​ស្បូវ ទើប​បណ្ដាលអោយ​ឆេះ​ទាំងស្រុង រួមទាំង សម្ភារៈ និង​ឯកសារ ដែលមាន​នៅក្នុង​ផ្ទះ ឆេះ​សម្ភារៈ​ទាំងអស់​តែ​មិន​ប៉ះពាល់​ដល់ មនុស្ស​ទេ​។​

​ទ្រព្យ​សម្ភារ​ដែ​លេ​ឆេះ រួមមានៈ ផ្ទះ​ទំហំ ទទឹង ៥​ម៉ែត្រ បណ្ដោយ ៨​ម៉ែត្រ (​ដំបូល និង​ជញ្ជាំង ប្រើ​ស្បូវ​) , គោរ​យន្ត​កន្ត្រៃ ១​គ្រឿង , ម៉ាស៊ីន​ចិញ្ច្រាំ​ដំឡូង ១​គ្រឿង​, ម៉ាស៊ីន បូមទឹក ១​គ្រឿង​, ម៉ាស៊ីន កាត់​ស្មៅ ២​គ្រឿង​, ម៉ាស៊ីន បាញ់ថ្នាំ ២​គ្រឿង​, ឈើ​មួយចំនួនធំ និង​សម្ភារៈប្រើប្រាស់​ផ្សេងទៀត​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular