នាយក​មូលនិធិ​ជនពិការ​៖ ឧបករណ៍​គណនា​ថ្លៃដើម សេវា​ស្តារ​លទ្ធភាព​ពលកម្ម​ជា​ឧបករណ៍​សំខាន់​

ដោយ​: មេសា / ភ្នំពេញ​: លោក ស៊ឹម សុធន នាយក​មូលនិធិ​ជនពិការ បានលើកឡើង​អំពី​សារសំខាន់ នៃ ឧបករណ៍​គណនា​ថ្លៃដើម នៃ​សេវា​ស្តារ​លទ្ធភាព​ពលកម្ម​កាយសម្បទា ថា “​ឧបករណ៍​គណនា​ថ្លៃដើម​សម្រាប់​សេវា​ស្តារ​លទ្ធភាព​ពលកម្ម ជា​ឧបករណ៍​សំខាន់​មួយ ព្រោះ​បច្ចុប្បន្ន​ប្រទេស​កម្ពុជា​កំពុងមាន​ការរីកចំរើន​ផ្នែក​សេដ្ឋកិច្ច ដូចនេះ​ការផ្តល់សេវា​លទ្ធភាព​ពលកម្ម​នឹងត្រូវ​មានការ​បង់ថ្លៃ ដើម្បី ទ្រទ្រង់​ដំណើរការ​សកម្មភាពរ​បស់​មជ្ឈមណ្ឌល​ស្តារ​លទ្ធភាព​ពលកម្ម​កាយសម្បទា ចំពោះ​ជនពិការ​ដែលមាន​លទ្ធភាព និង ជីវភាព​សមរម្យ​។ ចំពោះ​ជនពិការ​ក្រីក្រ ដែលមាន​ប័ណ្ណ​សមធម៌ ឬ​ឯកសារ​បញ្ជាក់​ភាពក្រីក្រ នឹង​ទទួលបាន​សេវា​ស្តារ​លទ្ធភាព​ពលកម្ម​ដោយ​ឥតគិតថ្លៃ​“​។

លោក ស៊ឹម សុធន នាយក​មូលនិធិ​ជនពិការ ថ្លែង​នៅក្នុង​សិក្ខាសាលា​ពិគ្រោះ​យោបល់​ស្តីពី​ឧបករណ៍​គណនា​ថ្លៃដើម នៃ សេវា​ស្តារ​លទ្ធភាព​ពលកម្ម​កាយសម្បទា

​លោក ស៊ឹម សុធន ថ្លែង​យ៉ាង​ដូច្នេះ នៅក្នុង​សិក្ខាសាលា​ពិគ្រោះ​យោបល់​ស្តីពី​ឧបករណ៍​គណនា​ថ្លៃដើម នៃ សេវា​ស្តារ​លទ្ធភាព​ពលកម្ម​កាយសម្បទា នា​ថ្ងៃនេះ​ទី ៥ ខែ កុម្ភៈ ឆ្នាំ ២០២១ នេះ នៅឯ​សណ្ឋាគារ សាន់វ៉េ ក្នុង​រាជធានី ភ្នំពេញ ចូលរួម​ដោយ តំណាង​ស្ថាប័ន​ដែល​ធ្វើការ​លើ​វិស័យ​ស្តារ​លទ្ធភាព​ពលកម្ម​ថ្នាក់ជាតិ និង អន្តរជាតិ ដូចជា​តំណាង​អង្គការ ICRC អង្គការ EXCEED អង្ក​ការ VIC អង្គការ HI កម្មវិធី ACCESS និង តំណង​មណ្ឌល​ស្តារ​លទ្ធភាព​ពលកម្ម​កាយសម្បទា​ចំនួន​ទាំង​១១​។​

​សិក្ខាសាលា​នេះ មាន​គោលបំណង​ប្រមូល​ធាតុ​ចូល​បន្ថែម ដើម្បី ឯកភាពគ្នា​លើ​ការបង្កើត​ទម្រង់ និង​ឧបករណ៍​គណនា​ថ្លៃដើម ឱ្យទៅជា​ជា​ស្តង់ដារ​រួម​សម្រាប់​មណ្ឌល​ស្តារ​លទ្ធភាព​ពលកម្ម​ទាំងអស់ និង ចែករំលែក​បទពិសោធ​ន៍ នៃ ការប្រើប្រាស់​ឧបករណ៍​គណនា​ថ្លៃដើម ដែល​កំពុង​អនុវត្ត​ដោយ​មជ្ឈមណ្ឌល​ស្តារ​លទ្ធភាព​ពលកម្ម​កាយសម្បទា​ខេត្ត កំពង់ចាម​។

​លោក ស៊ឹម សុធន នាយក​មូលនិធិ​ជនពិការ បាន​មានប្រសាសន៍ថា ដោយឡែក កាលពី​ឆ្នាំ ២០២០ កន្លងទៅ ដោយសារ​បញ្ហា​ជាស​កល នៃ ជំងឺ​កូ​វីដ​១៩ មូលនិធិ​ជនពិការ តាមរយៈ​មជ្ឈមណ្ឌល​ម​ណ្ឌ​ល​ស្តា​រទាំង ១១ កន្លែង បានផ្តល់​សេវា​ជូន​ជនពិការ​ចំនួន ១៦ ៦០១ នាក់ ស្មើ​ប្រមាណ​នឹង ៦០ ភាគរយ ធៀប​នឹង​ផែនការ​។ មូលនិធិ​ជនពិការ​ក៏បាន​សាងសង់​ផ្ទះ​ជូន​ជនពិការ​ក្រីក្រ​ចំនួន ៩ ខ្នង​ផ្ទះ បានផ្តល់​ជា​កញ្ចប់​អំណោយ​សប្បុរសធម៌​ដល់​ជនពិការ​ចំនួន ៣៦៨ គ្រួសារ និង បាន​បើក​ផ្តល់ប្រាក់​របប​គោលនយោបាយ​ពិនិត្យ​ថែទាំ​សុខភាព​ជូន​ជនពិការ​ក្រីក្រ​ចំនួន ១ ៦៥៥​នាក់​៕

ទីតាំងផ្សាយពាណិជ្ជកម្ម

- Advertisment -

Most Popular