ដោយៈ ប.ខុន / ភ្នំពេញៈ ប្រជាពលរដ្ឋ ប្រមាណជា ៣០ នាក់ ដែលបានអះអាងថា ជាតំណាងឱ្យប្រជាជន រស់នៅឃុំរការកោង២ ឃុំស្វាយអំពារ ឃុំព្រែកដំបង ស្រុក មុខកំពូល ខេត្តកណ្តាល បានលើគ្នាមកដល់ទីស្តីការក្រសួងធនធានទឹកនិងឧតុនិយមជាថ្មី ដើម្បីសុំឱ្យក្រសួងនេះ បញ្ជាក់ពីសកម្មភាព ជីកស្តារមេទឹក ដែលកំពុងអនុវត្ត ដោយក្រសួងធនធានទឹក និងឧតុនិយម មានប៉ះពាល់ដីឯកជន របស់ប្រជាពលរដ្ឋ កំពុងរស់នៅ និងអាស្រ័យផល នៅព្រឹកថ្ងៃទី៥ ខែកុម្ភៈ ឆ្នាំ២០២១។
មន្ត្រីក្រសួងធនធានទឹក និងឧតុនិយម ដែលមិនមែនជា អ្នកនាំពាក្យរបស់ក្រសួងនេះ បានប្រាប់ឱ្យរស្មីកម្ពុជាដឹង នៅថ្ងៃទី៥ ខែកុម្ភៈ នេះថាៈ ប្រជាពលរដ្ឋ ដែលបានមកតវ៉ា ដល់ក្រសួង ត្រូវបានទទួលស្វាគមន៍ ដោយមន្ត្រីកាន់គម្រោង ស្តារអូរ បឹងបួរធម្មជាតិ ទាំង ២២ កន្លែង នៅក្នុងស្រុកមុខកំពូល ខេត្តកណ្តាល។
ប្រភពខាងលើ បាននិយាយថាៈ តំបន់ដែលប្រជាពលរដ្ឋ នាំគ្នាមកធ្វើការតវ៉ានេះ គម្រោងរបស់ក្រសួង ក្រោមក្របខណ្ឌគម្រោង សាច់ប្រាក់ពលកម្ម សម្រាប់អភិវឌ្ឍន៍ ហេដ្ឋារចនាសម្ព័ន្ធជនបទ និងការគាំទ្រកសិករ មិនទាន់បានអនុវត្ត ដល់នៅឡើយទេ តែពួកគាត់ មានការព្រួយបារម្ភ ខ្លាចប៉ះពាល់ និងបាត់បង់ ដីធ្លី ដែលពួកគាត់ កំពុងរស់នៅ និងអាស្រ័យផល ទើបលើកគ្នា មកដល់ក្រសួងជាលើកទី២ ដើម្បីសុំការបញ្ជាក់ អំពីគម្រោងនេះ មានប៉ះពាល់ដីរបស់ពួកគាត់ ឬអត់។
នៅក្នុងឱកាសខាងលើនេះ មន្ត្រីកាន់គម្រោងរបស់ ក្រសួងធនធានទឹក និងឧតុនិយម និងតំណាងប្រជាពលរដ្ឋ បានឯកភាពគ្នា ចុះទៅពិនិត្យដល់ទីតាំងជាក់ ស្តែង នៅរសៀលថ្ងៃទី៥ ខែកុម្ភៈ ឆ្នាំ២០២១ ដើម្បីធ្វើការដោះស្រាយ ជាក់ស្តែង។
គួររំលឹកឱ្យដឹងថា ប្រជាពលរដ្ឋ បានលើកគ្នា មកក្រសួងធនធានទឹក និងឧតុនិយម គឺជាលើកទី២ បន្ទាប់ពីលើកទី១ កាលពីក្នុងខែធ្នូ មិនឃើញមានលទ្ធផល ឆ្លើយតប ហើយការអនុវត្តគម្រោង មួយចំនួន បានចាប់ផ្តើមធ្វើ ដោយគ្រឿងចក្រ នៅតាមបឹងសំខាន់ៗមួយចំនួន ដោយកន្លែងខ្លះ មានការតវ៉ាកន្លែងខ្លះ គ្មានការតវ៉ា តែជាទូទៅ ដីទាំងនោះ ត្រូវបានគេកាន់កាប់អស់ ទៅហើយ ដោយអ្នកមានអំណាច និងអ្នកមានទ្រព្យធនស្តុកស្តម្ភ។
ប្រជាពលរដ្ឋ បានលើកគ្នា មកក្រសួងធនធានទឹក និងឧតុនិយម ដើម្បីសុំអន្តរាគមន៍ ជួយទប់ស្កាត់ ការជីកដីផ្លូវស្ការ និងសុំប័ណ្ណកម្មសិទ្ធិ លើដីលំនៅដ្ឋាន និងកសិកម្ម ដែលមានទីតាំង នៅចំណុចផ្លូវឆ្ការ ឃុំរការកោង២ ឃុំស្វាយអំពារ និងឃុំព្រែកដំបង ស្រុកមុខកំពូល ខេត្តកណ្តាលនេះ បន្ទាប់ពីក្រសួងធនធានទឹក និងឧតុនិយម លើកប៉ាណូគម្រោងស្តារអូរ បឹងបួរ ធម្មជាតិ ចំនួន ២២ កន្លែង ក្នុងស្រុកមុខកំពូល ខេត្តកណ្តាល ក្រោមក្របខណ្ឌគម្រោង សាច់ប្រាក់ពលកម្ម សម្រាប់អភិវឌ្ឍន៍ ហេដ្ឋារចនាសម្ព័ន្ធជនបទ និងការគាំទ្រកសិករ ដែលកំពុងអនុវត្ត នៅតាមបឹង មួយចំនួនរួចមក។
ក្រសួងធនធានទឹក និងឧតុនិយម កាលពីថ្ងៃទី១១ ខែកញ្ញា ឆ្នាំ២០២០ បានជម្រាបទៅប្រធានមន្ទីរធនធានទឹក និងឧតុនិយម ខេត្តកណ្តាល អំពីការស្តារបឹងបួរ អូរធម្មជាតិ ចំនួន ២២ កន្លែង ស្ថិតនៅស្រុកខេត្តកណ្តាល ដោយនៅក្នុងលិខិតលេខ១៤៧៨ធទឧ បានសរសេរថា ដើម្បីឱ្យក្រសួងធនធានទឹក និងឧតុនិយម ធ្វើការអនុវត្តផែនការ ការងាររយៈពេលវែង លើវិស័យធារាសាស្ត្រ ទទួលបានជោគជ័យ ប្រកបដោយប្រសិទ្ធភាពខ្ពស់ និងមាននិរន្តរភាពនោះ ក្រសួងធនធានទឹក និងឧតុនិយម នឹងធ្វើការស្តារបឹងបួរ អូរធម្មជាតិ ចំនួន ២២ កន្លែង ក្រោមក្របខណ្ឌគម្រោង សាច់ប្រាក់ពលកម្ម សម្រាប់អភិវឌ្ឍន៍ ហេដ្ឋារចនាសម្ព័ន្ធជនបទ និង ការគាំទ្រកសិករ សម្រាប់ការកំណត់ ព្រំប្រទល់បឹងបួរ អូរធម្មជាតិ ដើម្បីរក្សាទុក ជាទ្រព្យសម្បត្តិរបស់រដ្ឋ ដែលស្ថិតនៅស្រុកមុខកំពូល ខេត្តកណ្តាល។
ដូចនេះ ដើម្បីឱ្យការងារស្តារឡើងវិញ នូវបណ្តាអនុគម្រោង ខាងលើ ប្រព្រឹត្តទៅបានល្អ និងទទួលបានជោគជ័យ សូមលោកប្រធាន ចាត់វិធានការ ជាមួយនឹងអាជ្ញាធរ ដែនដី ដែលពាក់ព័ន្ធ គ្រប់លំដាប់ថ្នាក់ ក្នុងការអនុវត្តគម្រោង ខាងលើ រួមមាន លោកអភិបាលស្រុក មេឃុំ ប្រធានភូមិ ដើម្បីធ្វើការសហការ ជាមួយនឹងផ្នែកគ្រប់គ្រងគម្រោង របស់ក្រសួង ក្នុងការអនុវត្តសកម្មភាពការងារ ស្តារបឹងបួរ អូរធម្មជាតិ ឱ្យសម្រេច បានល្អប្រសើរ ប្រកបដោយប្រសិទ្ធភាពខ្ពស់ និងមាននិរន្តរភាព៕/V.mara
