Home ព័ត៌មានសំខាន់ៗ ឥទ្ធិពល​ខ្យល់...

ឥទ្ធិពល​ខ្យល់​ប្រ៊ី​ស នឹង​បង្កឱ្យមាន​ភ្លៀង​ធ្លាក់ ពីថ្ងៃ​ទី​៧-១០ កុម្ភៈ

ដោយៈ ប​.​ខុន / ភ្នំពេញៈ ប្រទេស​កម្ពុជា នៅ​បន្ត​ទទួលរង​ឥទ្ធិពល ដំណើរ​ខ្យល់​បក់​ឡើង​ចុះ ( Breeze) ដែល​អាច​នឹង​បង្កឱ្យមាន ភ្លៀង​ធ្លាក់ ពី​តិច​ទៅ​មធ្យម នៅ​តំបន់​មួយចំនួន ចាប់ពី​ថ្ងៃទី​៧ ដល់​ថ្ងៃទី​១០ ខែកុម្ភៈ ដោយ​ភ្លៀង ចាប់ផ្តើម​ចេញដំណើរ ពី​ខេត្ត​ព្រះសីហនុ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​៥ ខែកុម្ភៈ ឆ្នាំ​២០២១​ថាៈ ប្រទេស​កម្ពុជា ពេលនេះ នៅតែ​បន្ត​ទទួលរង​ឥទ្ធិពល ពី​បាតុភូត​ខ្យល់​ប្រ៊ី​ស ( Breeze ) គឺ​ដំណើ​វិល ចុះឡើង របស់​ខ្យល់ ដោយ​នៅពេល​ថ្ងៃ ទទួល​ឥទ្ធិពល ខ្យល់​បក់ ពី​ឈូង​សមុទ្រ​ថៃ តែ​នៅ​ពេលយប់ ទទួល​ឥទ្ធិពល ពី​ខ្យល់មូសុង​ឦសាន​វិញ​( Breeze) បាតុភូត​នេះ​វា នឹងធ្វើ​ឱ្យមាន​ភ្លៀង​ធ្លាក់ នៅលើ​ខេត្ត​ខ្លះ​។​

​អ្នកនាំពាក្យ​ក្រសួង​ជំនាញ​ខាងលើ បានបញ្ជាក់​ថាៈ ភ្លៀង នឹង​ផ្តើម​មាន​ធ្លាក់ ដោយ​ចេញ ដំណើរ ពី​ខេត្ត​ព្រះសីហនុ នៅ​ថ្ងៃទី​៧ ខែកុម្ភៈ រួច​រាលដាល តាម​តំបន់ឆ្នេរ ទៅ​កោះកុង ឡើងទៅ​វាលវែង និង​ភាគ​ពាយព្យ នៃ​ប្រទេស​កម្ពុជា មាន​កម្រិត ពី​តិច​ទៅ​មធ្យម តែ​ចាប់ពី​ថ្ងៃទី​៨ ដល់​ថ្ងៃទី​១០ ខែកុម្ភៈ ទៅ ទើប​ច្រើន​។​

​លោក ចាន់ យុ​ត្ថា បាន​និយាយ​ឱ្យដឹងថាៈ នៅ​តំបន់​ខ្ពង់រាប ភាគ​ខាងកើត ជាប់​ព្រំប្រទល់ វៀតណាម ដូចជា ខេត្តមណ្ឌលគិរី ក្រចេះ ក៏មាន​ភ្លៀង​ដែរ​។ ចំពោះ រាជធានី​ភ្នំពេញ បើ​មាន ក៏​មិន​ច្រើន​ដែរ នៅ​ថ្ងៃទី​៩ ខែកុម្ភៈ​។​

​ក្រសួង​ធនធានទឹក និង​ឧតុនិយម កាល​ថ្ងៃទី​២ ខែកុម្ភៈ ឆ្នាំ​២០២១ បាន​ជូន​ជូនដំណឹង ស្តីពី​ការ​ព្យាករ អាកាសធាតុ សម្រាប់​ពីថ្ងៃ​ទី​៣ ដល់ ៧ ខែកុម្ភៈ ឆ្នាំ ២០២១​ថា ព្រះរាជា ណា​ចក្រ​កម្ពុជា បន្ត​ទទួលរង​ឥទ្ធិពល ខ្យល់មូសុង​ឦសាន ក្នុង​កម្រិត​ពី​មធ្យម​ទៅ​ខ្លាំង និង​នៅ​អំឡុង ថ្ងៃទី​៨ ឬ ៩ ខែកុម្ភៈ ឆ្នាំ​២០២១ ទទួល ឥទ្ធិពល​ពី​កម្រិត សម្ពាធ​ទាប ខ្សោយ និង​ឥទ្ធិពល​ខ្យល់​ប្រ៊ី​ស​( BREEZE) បក់​មកពី​ឈូង​សមុទ្រ​ថៃ​។​

​ក្នុង​សេចក្តីជូនដំណឹង បានបញ្ជាក់​ថាៈ ស្ថានភាព​បែប​ខាងលើនេះ ធ្វើ​ឲ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព​អប្បបរមា ពី ១៩-២០ អង្សា សេ សីតុណ្ហភាព​អតិបរមា មាន​ពី ៣១-៣៤ អង្សា​សេ នៅ​ថ្ងៃទី​៨ ឬ ៩ ខែកុម្ភៈ សីតុណ្ហភាព អប្បបរមា មាន​ពី ២២-២៥ អង្សា​សេ និង​សីតុណ្ហភាព​អតិបរមា មាន ពី ២៨-៣១ អង្សា​សេ មាន​ភ្លៀង​ពី​ខ្សោយ​ទៅ​មធ្យម នៅលើ​ខេត្តតាកែវ ខេត្តកណ្តាល ខេត្តកំពង់ស្ពឺ ខេត្តព្រៃវែង ខេត្តពោធិសាត់ ខេត្តបាត់ដំបង និង​ខេត្ត​ប៉ៃលិន ។ នៅ​បណ្តា​ខេត្ត​ជាប់​ជួរ​ភ្នំ​ដងរែក និង ខ្ពង់រាប​ឦសាន មាន​សីតុណ្ហភាព​អប្ប បរមា​ពី​១៦-១៩ អង្សា​សេ សីតុណ្ហភាព​អតិបរមា មាន​ពី ៣១-៣៤​អង្សា​សេ​។ នៅ ថ្ងៃទី​៨-៩​ខែកុម្ភៈ​សីតុណ្ហភាព​អប្បបរមា មាន​ពី ២០-២៣ អង្សា​សេ និង​សីតុណ្ហភាព អតិបរមា មាន​ពី ២៨-៣១ អង្សា​សេ មាន​ភ្លៀង​ខ្សោយ នៅ​ខេត្ត​ត្បូងឃ្មុំ និង​ខេត្តកំពង់ចាម ។​

​សម្រាប់​តំបន់​មាត់សមុទ្រ មាន​សីតុណ្ហភាព​អប្បបរមា ពី ២០-២៣ អង្សា​សេ សីតុណ្ហភាព អតិបរមា មាន​ពី ២៨-៣១​អង្សា​សេ ។ នៅ​ថ្ងៃទី​៨ ឬ ៩ ខែកុម្ភៈ សីតុណ្ហភាព​អប្បបរមា មាន​ពី ២១-២៤ អង្សា​សេ និង​សីតុណ្ហភាព​អតិបរមា មាន​ពី ២៧-៣០ អង្សា​សេ មាន​ភ្លៀង​ពី​ខ្សោយ ទៅ​មធ្យម នៅ​ខេត្តកោះកុង ព្រះសីហនុ កំពត និង​ខេត្ត​កែប​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular