Home ព័ត៌មានអន្តរជាតិ យោធា​មី​យ៉ាន់...

យោធា​មី​យ៉ាន់​បង្កើន​ការចាប់ខ្លួន នៅពេល​មនុស្ស​រាប់រយ​នាក់​ធ្វើ​បាតុកម្ម​នៅ​សកល​វិទ្យាល័យ​

​ប្រែ​សម្រួលៈ​វាសនា​/​យ៉ាងហ្គោន​៖​សិស្ស​និង​គ្រូបង្រៀន​រាប់រយ​នាក់​នៅ​សកល​វិទ្យាល័យ​មួយ​នៅ​មី​យ៉ាន់​ម៉ា កាលពី​ថ្ងៃ​សុក្រ​បាន​ធ្វើ​ការប្រឆាំង​តវ៉ា នៅពេល​យោធា​ពង្រីក​សំណាញ់​ចាប់​មន្ត្រី​ដែល​ត្រូវ​បណ្តេញ​​ចេញ​ពី​អំណាច​នៅក្នុង​រដ្ឋប្រហារ​មួយ​ដែល​បង្ក​ការ​ថ្កោលទោស​ជា​អន្តរជាតិ និង​ការ​គំរាម​ដាក់ទណ្ឌកម្ម​។​

​ការជួបជុំ​តវ៉ា​បាន​កើត​ឡើង​បន្ទាប់ពី​ការចាប់ខ្លួន​លោក វីន អេច​ទីន ជំនួយការ​ជិតស្និទ្ធ​របស់​មេដឹកនាំ​ស៊ីវិល​អ៊ុង សាន ស៊ូ​ជី ដែល​ត្រូវបាន​ឃាត់ខ្លួន​កាលពី​ថ្ងៃ​ចន្ទ ជាមួយ​ប្រធានាធិបតី វីន មី​យីនត៍​។​

​សិស្ស​និស្សិត​ប្រមាណ​២០០​នាក់ នៅ​សកល​វិទ្យាល័យ​ដា​ហ្គុន​នៅក្រុង​យ៉ាង​ហ្គោន​បានធ្វើការ​ជួប​ជុំមួយ ដោយ​ពួកគេ​លើ​ម្រាមដៃ​៣ ដូចគ្នា​នឹង​ការតវ៉ា​ទាមទារ​លទ្ធិប្រជាធិបតេយ្យ​នៅ​ថៃ និង​បាន​ច្រៀង​បទ​​ចំរៀង​បដិវត្តន៍​ពេញនិយម​មួយ​។​

​សាស្ត្រាចារ្យ វីន វីន ម៉​រ បាន​ប្រាប់​សារព័ត៌មាន​បរទេស​មួយ​ថា «​ក្នុងនាម​ជា​ពលរដ្ឋ​ម្នាក់ ខ្ញុំ​មិន​អាច​ទទួលយក​រដ្ឋប្រហា​រ​យោធា​នេះ​បាន​ទាល់តែសោះ​។​យើង​ត្រូវតែ​ប្រឆាំង​ភាព​ផ្តាច់ការ​នេះ​»​។​

​ដោយ​ដើរ​ដង្ហែរ​ជុំវិញ​សកល​វិទ្យាល័យ ពួក​និស្សិត​បាន​ស្រែកថា​«​ជយោ អ្នក​ម្តាយ​ស៊ូ​ជី​» និង​បាន​កាន់​ទង់​ពណ៌​ក្រហម ដែល​ជា​ពណ៌​របស់​គណ​បក្ស​សម្ពន្ធជាតិ​សំរាប់​លទ្ធិប្រជាធិបតេយ្យ​របស់​លោកស្រី​ស៊ូ​ជី​។​

​និស្សិត​ម្នាក់​ឈ្មោះ មីន ស៊ីធូ បាន​និយាយថា​«​យើង​នឹង​មិន​អនុញ្ញាត​អោយ​ជំនាន់​របស់​យើង​រងគ្រោះ​ពី​ភាព​ផ្តាច់ការ​យោធា​ដូច្នេះ​ទេ​»​។​

​ក្នុងពេល​ជាមួយគ្នា និយោជិត​មកពី​ក្រសួង​រដ្ឋាភិបាល​ជាច្រើន​នៅ​ក្នុងណៃ​ពី​ដោរ ក៏​បាន​ថត​បង្ហោះ​រូប​របស់​ពួកគេ​ពាក់​បូ​ពណ៌​ក្រហម​និង​លើ​សញ្ញា​និម្មិត​រូប​ប្រជាធិបតេយ្យ​។​

​មុន​បាតុកម្ម​នៅ​សកល​វិទ្យាល័យ​នេះ​ប៉ុន្មាន​ម៉ោង លោក​វីន អេច​ទីន ជំនួយការ​ជិតដិត​របស់​លោកស្រី​ស៊ូ​ជី ត្រូវបាន​ចាប់ខ្លួន​។​

​គ្រូបង្រៀន​មួយក្រុម​នៅ​សកល​វិទ្យាល័យ យ៉ាងហ្គោន កាលពី​ថ្ងៃ​សុក្រ​ក៏​បាន​ធ្វើ​កូដកម្ម​ជា​ផ្នែក​នៃ​យុទ្ធនាការ​មិន​គោរព​ច្បាប់​ស៊ីវិល​ប្រឆាំង​នឹង​រដ្ឋប្រហារ​ផងដែរ​។​

​យោងតាម​អង្គការ​ឃ្លាំមើល​អ្នកទោស​នយោបាយ​មួយ មន្ត្រី​រដ្ឋាភិបាល​និង​សមាជិក​សភា​មី​យ៉ាន់​ម៉ា ជាង​១៣០​នាក់​ហើយ​ត្រូវបាន​ចាប់ខ្លួន​ក្រោយ​រដ្ឋប្រហារ​៕

​ពួក​និស្សិត​សកល​វិទ្យាល័យ​នៅ​ក្រុង​យ៉ាងហ្គោន​ដើរ​ស្រែក​ប្រឆាំង​នឹង​រដ្ឋប្រហា​រ​យោធា​កាលពី​ថ្ងៃ​សុក្រ​

ទីតាំងផ្សាយពាណិជ្ជកម្ម

- Advertisment -

Most Popular