Home ព័ត៌មានសំខាន់ៗ សម្តេច​តេ​ជោ ...

សម្តេច​តេ​ជោ ហ៊ុន សែន យល់ព្រម​ឲ្យ​កងកម្លាំង​នគរបាល​វរ​សេនា​តូច​ការពារ​ព្រំដែន​គោក​-​ទឹក ជាង ៥​ពាន់​នាក់ ចាក់​វ៉ាក់សាំង​ការពារ​ជំងឺ​កូ​វីដ​-១៩

​ដោយៈ មុនី​រ័ត្ន​/​ភ្នំពេញៈ សម្តេច​តេ​ជោ​នាយករដ្ឋមន្ត្រី ហ៊ុន សែន បាន​យល់ព្រម​ឲ្យ​កងកម្លាំង​នគរបាល​វរ​សេនា​តូច​ការពារ​ព្រំដែន​គោក​-​ទឹក ជាង ៥​ពាន់​នាក់ ចាក់​វ៉ាក់សាំង​ការពារ​ជំងឺ​កូ​វីដ​-១៩ ជាមួយនឹង​កង យោធពល​ខេមរភូមិន្ទ​។ ការយល់ព្រម​នេះ បានធ្វើ​ឡើង​តាម​សំណើ​របស់​នាយ​ឧ​ត្ត​ម​សេនីយ៍ សន្តិ​បណ្ឌិត នេ​ត សាវឿន អគ្គស្នងការ​នគរបាល​ជាតិ ដែល​បាន​ស្នើសុំ​ការអនុញ្ញាត​ពីស​ម្តេច​តេ​ជោ ហ៊ុន សែន កាលពី​ថ្ងៃទី​៤ ខែកុម្ភៈ ឆ្នាំ​២០២១​។​

នាយ​ឧ​ត្ត​ម​សេនីយ៍ សន្តិ​បណ្ឌិត នេ​ត សាវឿន បាន​ជម្រាបជូន​សម្តេច​តេ​ជោ ហ៊ុន សែន ថា អនុវត្តតាម​អនុ​សាសន៍​ដ៏​ខ្ពង់ខ្ពស់​របស់​សម្តេច​តេ​ជោ ដែល​ផ្តល់​អាទិភាព​ដល់​កងកម្លាំង​ជួរមុខ​ដើម្បី​ទទួលបាន​នូវ​វ៉ាក់សាំង​ការពារ Covid-19 នោះ អគ្គស្នងការដ្ឋាន​នគ​របាល​ជាតិ​បាន​ពិចារណា និង​គោរព​ស្នើសុំ​សម្តេច​តេ​ជោ មេត្តា​អនុញ្ញាត​ដ៏​ខ្ពង់ខ្ពស់ ផ្តល់​ការចាក់​វ៉ាក់សាំង​ការពារ Covid-19 ដល់​កងកម្លាំង​នគរបាល​វរ​សេនា​តូច​ការពារ​ព្រំដែន​​គោក​-​ទឹក ដែលមាន​ចំនួន​សរុប ៥.២២៨​នាក់ ក្នុងពេល ជាមួយគ្នា​នឹង​ការចាក់​វ៉ាក់សាំង​ដល់​កង​យោធ​ពល​ខេមរភូមិន្ទ​។ តាងនាម​កងកម្លាំង​នគរបាលជាតិ ជាពិសេស​កងកម្លាំង​នគរបាល​វរ​សេនា​តូច​ការពារ​ព្រំដែន​-​ទឹក សូម​គោរព​ថ្លែងអំណរគុណ​យ៉ាង​ជ្រាលជ្រៅ​បំផុត​ចំពោះ សម្តេច​តេ​ជោ ដែល​តែងតែ​យក​ចិត្តទុកដាក់​ដោះ​ស្រាយ​ការលំបាក រួមទាំង​សុខមាលភាព​របស់​កង​កម្លាំង​នគរបាលជាតិ​នៅ​ជួរមុខ​។​

ចំពោះ​ការស្នើ​នេះ សម្តេច​តេ​ជោ ហ៊ុន សែន បាន​សរសេរ​ចារ​លើ​លិខិត​ស្នើសុំ​របស់​អគ្គស្នងកា​រ​នគរបាលជាតិ​ថា “​យល់ព្រម ជូន​សម្តេច​ពិជ័យ​សេនា ទៀ បាញ់ រៀបចំ​ចាក់​ជូន​ជាមួយ​កងទ័ព​ក្នុងពេល​ជាមួយគ្នា​”​។​

គួរ​បញ្ជាក់ថា វ៉ាក់សាំង​ដែលជា​ជំនួយ​របស់​ចិន នឹង​ដឹក​តាម​យន្តហោះ​ពិសេស​នឹង​មកដល់​កម្ពុជា​នៅ​ថ្ងៃទី​០៧ ខែកុម្ភៈ ឆ្នាំ​២០២១​។ សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា​សម្រេច​ចាក់​វ៉ាក់សាំង​នៅ​ថ្ងៃទី​១០ ខែកុម្ភៈ ឆ្នាំ​២០២១ នា​មន្ទីរពេទ្យ​កាល់ម៉ែត​។​

សម្តេច​តេ​ជោ ហ៊ុន សែន បាន​បញ្ជាក់ថា វ៉ាក់សាំង​ដែលជា​ជំនួយ​របស់​សាធារណរដ្ឋ​ប្រជាមានិត​ចិន​តាមរយៈ​ក្រសួងការពារជាតិ​ចិន​មកកាន់​ក្រសួងការពារជាតិ​កម្ពុ​ជា​នឹង​ដឹក​មកដល់​កម្ពុជា​ចំនួន​៦០​ម៉ឺន​ដូ​ស​នៅ​ល្ងាច​ថ្ងៃអាទិត្យ​ទី​៧ ខែកុម្ភៈ ឆ្នាំ​២០២១ ដែលជា​ដំណាក់កាល​ដំបូង​នៃ​ជំនួយ​ចំនួន​១​លាន​ដូ​ស​។​

​សម្តេច​ត​ជោ​នាយករដ្ឋមន្ត្រី​បញ្ជាក់ទៀតថា “​ម៉ោង​៨​និង​៣០​នាទី​ថ្ងៃទី​១០ កុម្ភៈ ២០២១ ដំណើរ​ការចាក់​វ៉ាក់សាំង​នឹង​ចាប់ផ្តើម​ជា​ផ្លូវការ​នៅ​មន្ទីរពេទ្យ​កាល់ម៉ែ​ត្រ​ដែល​ខ្លួន​ខ្ញុំ​នឹង​ទទួល​មុនគេ​ជាមួយ​មន្ត្រីជាន់ខ្ពស់​ផ្សេងទៀត លើកលែងតែ សម្តេច​ពិជ័យ​សេនា ទៀ បាញ់ ដែល​គាត់​បាន​ចាក់​វ៉ាក់សាំង​នេះ​រួចហើយ​។ ការចាក់​វ៉ាក់សាំង​នេះ​នឹងមាន​ការផ្សាយ​ផ្ទាល់​និង​បន្ទាប់ពី​ចាក់​រួច​ខ្ញុំ​នឹងធ្វើ​សន្និសីទ​សារព័ត៌​មាននៅ​មន្ទីរពេទ្យ​កាល់ម៉ែ​ត្រ​តែម្តង​។​”

សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ​បាន​មានប្រសាសន៍​នៅក្នុង​ពិធី​សំណេះសំណាល​ក្រុមគ្រូពេទ្យ​ចាក់​វ៉ាក់សាំង​ការពារ​ជំងឺ​កូ​វីដ​-១៩ នៅ​មន្ទីរពេទ្យ​ព្រះ​កេតុមាលា កាលពី​ថ្ងៃទី​៣ ខែកុម្ភៈ ថា រដ្ឋាភិបាល កងទ័ព និង​ប្រជាជន​ចិន បាន​បញ្ជូន​ក្រុមគ្រូពេទ្យ​ជំនាញ​វេជ្ជសាស្ត្រ​ចំនួន ៤​រូប បានមក​ជួយ​បង្ហាត់បង្រៀន​ជំនាញការ​ដឹកជញ្ជូន​វ៉ាក់សាំង ការ​រក្សាទុក​វ៉ាក់សាំង និង​ការចាក់​ការពារ​វីរុស​កូ​វីដ​-១៩ ដែល​ក្រុមគ្រូពេទ្យ​កម្ពុជា​ពុំទាន់​ទទួលបាន​បទពិសោធន៍​ក្នុងការ​ប្រើប្រាស់​។ ជាមួយគ្នា​ភាគី​ចិន​បានសម្រេច​ផ្តល់​ជាបន្ទាន់​នូវ​ជំនួយ​វ៉ាក់សាំង​ចាក់​ការពារ​វីរុស​កូ​វីដ​១៩ ដំណាក់កាល​ទី​១ ចំនួន ៦​សែន​ដូ​ស ក្នុងនោះ​ចំនួន ៣​សែន​ដូ​ស​ជូន​ដល់​កង​ខេមរភូមិន្ទ និង​បន្ត​ផ្តល់ជំនួយ​វ៉ាក់សាំង​ដល់​ប្រទេស​កម្ពុជា​ដើម្បី​គាំទ្រ​កម្ពុជា​យ៉ាង​ពេញទំហឹង​ឲ្យ​យកឈ្នះ​ជំងឺ​កូ​វីដ​១៩ ឲ្យ​បាន​ឆាប់​តាម​ដែល​អាចធ្វើ​ទៅបាន​៕​

ទីតាំងផ្សាយពាណិជ្ជកម្ម

- Advertisment -

Most Popular