Home ព័ត៌មានអន្តរជាតិ ចិន​សុំអោយ​អា...

ចិន​សុំអោយ​អាម៉េរិក​អនុវត្ត​គោល​នយោបាយ​បែប​ស្ថាបនា​និង​វិជ្ជមាន​ចំពោះ​ចិន​

​ប្រែ​សម្រួលៈ​វាសនា​/​ប៉េកាំង​(​ស៊ីន​ហួរ​)៖​ចិន​សង្ឃឹម​ថា​អាម៉េរិក​នឹង​សម្លឹងមើល​ចិន​និង​ទំនាក់ទំនង​ចិន​-​អាម៉េរិក ក្នុង​ផ្លូវ​ផ្អែក​លើ​ការ​ពិត​និង​មាន​ហេតុផល អនុវត្ត​គោលនយោបាយ​ចិន​បែប​ស្ថាបនា​និង​​វិជ្ជមាន សម្របសម្រួល​ជាមួយ​ចិន ផ្តោត​លើ​កិច្ច​សហការ​គ្នា និង​គ្រប់គ្រង​ការខ្វែងគំនិត​គ្នា​ដើម្បី​ជំរុញ​ការអភិវឌ្ឍ​ទំនាក់ទំនង​ទ្វេភាគី​ប្រកបដោយ​សុខភាព​និង​ចីរភាព​,​នេះ​បើ​តាម​អ្វី​ដែល​អ្នកនាំពាក្យ​​ក្រសួង​ការបទេស​ចិន​បាន​និយាយ​កាលពី​ថ្ងៃ​សុក្រ​។​

អ្នកនាំពាក្យ​​ក្រសួង​ការបទេស​ចិន​លោក វ៉ាង វេន​ប៊ិន

​អ្នកនាំពាក្យ​លោក វ៉ាង វេន​ប៊ិន បាន​និយាយ​ដូច្នេះ នៅពេល​ត្រូវ​បាន​គេ​សួរ​អំពី​សុន្ទរកថា​របស់​លោក ចូ បៃ​ដិន កាលពី​ពេល​ថ្មីៗ ដែល​ប្រធានាធិបតី​អាម៉េរិក​រូបនេះ​បាន​ហៅ​ចិន​ថា​ជា​«​គូប្រជែង​គីឡូ​​ធ្ងន់​បំផុត​»​របស់​ប្រទេស​លោក​។​

​ដោយ​សង្កត់ធ្ងន់​អំពី​តួនាទី​របស់​ចិន​នៅក្នុង​ការស្ថាបនា​សន្តិភាព​ពិភពលោក ជា​អ្នកចូលរួម​ចំពោះ​ការអភិវឌ្ឍ​សកល​និង​ជា​អ្នក​ការពារ​សណ្តាប់ធ្នាប់​អន្តរជាតិ លោក​វ៉ាង បាន​និយាយថា ការអភិវឌ្ឍ​​របស់​ចិន​នឹង​កាន់តែ​ពង្រឹង​សន្តិភាព ហើយ​ចិន​តាំងចិត្ត​ចំពោះ​ការបង្កើត​ទំនាក់ទំនង​មិត្តភាព​និង​បែប​សហការ​ជាមួយ​បណ្តា​ប្រទេស​នៅ​ជុំវិញ​ពិភពលោក​។​

​លោក​បាន​បន្តថា ក្នុងនាម​ជា​មហាអំណាច​ពិភពលោក ចិន​និង​អាម៉េរិក​ចែករំលែក​ផលប្រយោជន៍​រួម​និង​រែក​ពន្ធ​ការទទួលខុសត្រូវ​ពិសេស​និង​សំខាន់​នៅក្នុង​ការការពារ​សន្តិ​ភាព​និង​ស្ថិរភាព​ពិភពលោក​ ព្រមទាំង​ជំរុញ​វិបុលភាព​និង​ការអភិវឌ្ឍ​សកល​។​ដូច​ទំនាក់ទំនង​រវាង​ប្រទេស​ដទៃ​ទៀត​ដែរ ចិន​និង​អាម៉េរិក​មុខ​ជា​មានការ​ខ្វែងគំនិត​គ្នា​ខ្លះ​តែ​ផលប្រយោជន៍​រួម​វា​ហួស​និង​លុប​លើ​ការខ្វែងគំនិត​គ្នា​។​​តាមរយៈ​កិច្ចសហការ​គ្នា​ចិន​និង​អាម៉េរិក​អាច​សំរេច​បាន​បញ្ហា​ធំៗ​ជាច្រើន ដែល​ផ្តល់​ប្រយោជន៍​ដល់​ប្រទេស​ទាំង​ពីរ និង​ពិភពលោក​។​

​តែ​នៅពេល​ក្រោយមក​បន្តិច​ថ្ងៃ​ដដែល រដ្ឋមន្ត្រីការបរទេស​អាម៉េរិក​ថ្មី​លោក អ៊ែន​ថូ​នី ប្លិន​គិន បាន​គាបសង្កត់​ចិន​រឿង​ការប្រព្រឹត្តិ​របស់​រដ្ឋាភិបាល​ក្រុង​ប៉េកាំង​លើ​ជនជាតិភាគតិច​អ៊ុយ​ហ្គួ​រ​នៅ​តំបន់​ស៊ីន​​ជាំ​ង ជនជាតិ​ទី​បេតិ៍ បញ្ហា​ហុងកុង រួម​ទាំង​ច្រក​សមុទ្រ​តៃវ៉ាន់​។​

​លោក​ប្លិន​គិ​ន​បាន​សរសេរ​បង្ហោះ​ថា «​ខ្ញុំ​បាន​បញ្ជាក់​ច្បាស់​ថា​អាម៉េរិក​នឹង​ការពារ​ផលប្រយោជន៍​ជាតិ​យើង ងើបឈរ​ឡើង​ដើម្បី​តំលៃ​ប្រជាធិបតេយ្យ​របស់​យើង និង​អោយ​រដ្ឋាភិបាល​ទទួលខុស​ត្រូវ​ចំ​ពោះ​​ការរំលោភ​ប្រព័ន្ធ​អន្តរជាតិ​» នៅក្នុង​និយាយ​ទូរស័ព្ទ​ជាមួយ​មន្ត្រី​ការទូត​ជាន់ខ្ពស់​ចិន​លោក យ៉ាង យី​ជី ។​

​សេចក្តីថ្លែងការណ៍​របស់​ក្រសួង​ការបរទេ​ស​មួយ​បាន​និយាយថា​ក្នុង​ការហៅ​ទូរស័ព្ទ​កាលពី​ថ្ងៃ​សុក្រ លោក​ប្លិន​គិន​បាន​ប្រាប់​លោក​យ៉ាងថា អាម៉េរិក​«​នឹង​បន្ត​គាំទ្រ​សិទ្ធិមនុស្ស និង​តំលៃ​ប្រជាធិបតេយ្យ រួម​មាន​ស៊ីន​ជាំ​ង ទីបេ​តិ៍​និង​ហុងកុង​។​លោក​រដ្ឋមន្ត្រី ក៏​គាបសង្កត់​ចិន​អោយ​ចូលរួម​ក្នុង​សហគមន៍​អន្តរជាតិ​ក្នុងការ​ថ្កោល​រដ្ឋប្រហារ​យោធា​នៅ​មី​យ៉ាន់​ម៉ា​ផងដែរ​»​។​

​ទោះជា​យ៉ាងណា កាលពីដើម​ខែ កាលពី​ថ្ងៃ​០២​កុម្ភៈ​អ្នកការទូត​កំពូល​របស់​ចិន​លោក យ៉ាង យី​ជិ បាន​អំពាវនាវ​អោយ​ចិន​និង​អាម៉េរិក​ស្តារ​ទំនាក់ទំនង​របស់​គេ​ឡើង​វិញ​តែ​លោក​ក៏​បាន​ព្រមាន​ទុក​ថា «​ការ​​ជ្រៀតជ្រែក​ចូល​កិច្ចការ​ផ្ទៃក្នុង​របស់​ចិន​រួមមាន​បញ្ហា​ស៊ីន​ជាំ​ង ទី​បេតិ៍ ហុងកុង តៃវ៉ាន់ និង​បញ្ហា​សមុទ្រ​ចិន​ខាងត្បូង គឺជា​«​បន្ទាត់​ក្រហម​មួយ​ដែល​មិន​ត្រូវ​ឆ្លងកាត់​»​។​

​លោក​យ៉ាង​បាន​និយាយថា រដ្ឋាភិបាល​ក្រុង​វ៉ាស៊ីនតោន ត្រូវតែ​ឈប់​ជ្រៀតជ្រែក​ចូល​ក្នុង​បញ្ហា​ដែល​ចិន​គិតថា​ជា​កិច្ចការ​ផ្ទៃក្នុង​របស់​ខ្លួន​៕

ទីតាំងផ្សាយពាណិជ្ជកម្ម

Previous articleព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជណាចក្រ​កម្ពុជា បានចេញ​ព្រះរាជក្រឹត្យ តែងតាំង​លោក ឃួ​ង ស្រេង ឋានន្តរស័ក្ដិ ឧត្តមមន្ត្រី ថ្នាក់លេខ១ ជា​អភិបាល រាជធានី​ភ្នំពេញ សម្រាប់​អាណត្តិ​ទី​២ ក្នុង​ដែន​សមត្ថកិច្ច​ដដែល​
Next article​ចិន​សង្ឃឹម​ថា​អាម៉េរិក​នឹង​សម្លឹងមើល​ចិន​និង​ទំនាក់ទំនង​ចិន​-​អាម៉េរិក ក្នុង​ផ្លូវ​ផ្អែក​លើ​ការ​ពិត​និង​មាន​ហេតុផល អនុវត្ត​គោលនយោបាយ​ចិន​បែប​ស្ថាបនា​និង​​វិជ្ជមាន សម្របសម្រួល​ជាមួយ​ចិន ផ្តោត​លើ​កិច្ច​សហការ​គ្នា និង​គ្រប់គ្រង​ការខ្វែងគំនិត​គ្នា​ដើម្បី​ជំរុញ​ការអភិវឌ្ឍ​ទំនាក់ទំនង​ទ្វេភាគី​ប្រកបដោយ​សុខភាព​និង​ចីរភាព​,​នេះ​បើ​តាម​អ្វី​ដែល​អ្នកនាំពាក្យ​​ក្រសួង​ការបទេស​ចិន​បាន​និយាយ​កាលពី​ថ្ងៃ​សុក្រ​។​
- Advertisment -

Most Popular