ចាប់​ត្រី​រួមគ្នា ត្រៀម​ឡើង​មាឃ របស់​អ្នកស្រុក​អង្គរ នៅតែ​បន្ត​ទំនៀម យ៉ាង​ខ្ជាប់ខ្ជួន​

​ដោយៈ អង្គរតូច / សៀមរាបៈ នៅក្នុង​តំបន់​រមណីយដ្ឋាន​អង្គរ ប្រមូលផ្តុំ​ទៅដោយ បេតិកភណ្ឌ​រស់ ដែល​សម្បូរ ទាំង​មរតក​អរូបី និង​រូបី​ជាច្រើន ហើយ​ត្រូវបាន អ្នកស្រុក​អង្គរ បន្ត​ប្រតិបត្តិ យ៉ាង​ខ្ជាប់ខ្ជួន រហូតមកដល់​បច្ចុប្បន្ន​។​

​ជា​រៀងរាល់ឆ្នាំ ច្រើន​ជំនាន់​មនុស្ស​មកហើយ ឱ្យតែ​ដល់​ខែមាឃ អ្នកស្រុក​ភូមិ​បង្កោង ឃុំ​អំពិល ស្រុក​ប្រាសាទបាគង នៃ​ខេត្តសៀមរាប មិនដែល​ខកខាន ប្រារព្ធ​ពិធី​ចាប់​ត្រី​រួម ជា​លក្ខណៈ​សហគមន៍ ដើម្បី​ត្រៀម​រៀបចំ ពិធី​ឡើង​មាឃ តាម​ទំនៀមទម្លាប់ ពី​បុរាណ​នោះឡើយ​។​

ចាប់​ត្រី​រួមគ្នា ត្រៀម​ឡើង​មាឃ របស់​អ្នកស្រុក​អង្គរ នៅតែ​បន្ត​ទំនៀម យ៉ាង​ខ្ជាប់ខ្ជួន​

​ការចាប់​ត្រី​រួមគ្នា ធ្វើឡើង​នៅ​ត្រពាំង​បឹង ដែលជា​ត្រពាំង​បុរាណ មានទឹក​ខួប​ប្រាំង ខួប​វស្សា អ្នកស្រុក បាន​អភិរក្ស​ទុក ការពារ​មិន​អនុញ្ញាត ឱ្យ​នរណាម្នាក់ ចូលមក​នេសាទ​ផ្តេសផ្តាស ខុសពី​ខែមាឃ​នេះឡើយ​។ លុះត្រាតែ​មានការ​សម្រេច​គ្នា ពី​គណៈកម្មការ​រៀបចំ​បុណ្យ​ជាមុន ហើយ​កំណត់​ថ្ងៃ​នេសាទ​រួម ទើប​អ្នកភូមិ អាច​ទៅរក​ចាប់បាន​។ ប៉ុន្តែ​ត្រូវតែ​ប្រើ​ឧបករណ៍ នេសាទ​បុរាណ រួមមាន សំណាញ់ អង្រុត ឈ្នាង ជាដើម​។​

​លោក ពេជ្រ ឃិន មេភូមិ​ភូមិ​បង្កោង នៅ​ព្រឹក​ថ្ងៃទី​៦ ខែកុម្ភៈ ឆ្នាំ​២០២១​នេះ បាន​មានប្រសាសន៍ថាៈ ត្រី​ដែល​ចាប់បាន​នោះ មួយផ្នែក​សម្រាប់ធ្វើ​ម្ហូប លក្ខណៈ​គ្រួសារ រៀងៗ​ខ្លួន មួយផ្នែក​ទៀត សម្រាប់ធ្វើ​ទឹក​នំ​បញ្ចុក និង​ធ្វើ​ម្ហូបអាហារ​រួម សម្រាប់​ពិធី​ឡើង​មាឃ ឬ​បុណ្យ​ឡើងអ្នកតា តាម​ទំនៀម​បុរាណ​។​

ចាប់​ត្រី​រួមគ្នា ត្រៀម​ឡើង​មាឃ របស់​អ្នកស្រុក​អង្គរ នៅតែ​បន្ត​ទំនៀម យ៉ាង​ខ្ជាប់ខ្ជួន​

​លោក​មេភូមិ បានឱ្យដឹង​ទៀតថាៈ ឆ្នាំនេះ សម្បូរ​ត្រី​។ ប៉ុន្តែ​ដោយសារ​ឆ្នាំនេះ មាន​ភ្លៀង​ធ្លាក់​ចុងឆ្នាំ​ច្រើន ទឹក​បឹង​មិនសូវ​ស្រក ការចាប់​ត្រី ក៏បាន​តិច​។ ហេតុដូច្នេះ បានជា​ត្រូវ​ពន្យារ ការចាប់​ត្រី ពីថ្ងៃ ៣​កើត ខែមាឃ ដែល​ធ្លាប់ធ្វើ​រាល់​ឆ្នាំ មក​ថ្ងៃ ៩​រោច ខែមាឃ​វិញ​។ ទោះបី ពិធី​នេះ មិនបាន​ប្រារព្ធ ក្នុង​ថ្ងៃ​ណាមួយ ច្បាស់លាស់ តែ​មិនឱ្យ​ហួស ពី​ខែមាឃ​នេះឡើយ​។​

​ប្រជាជន ក្នុង​ភូមិប​ង្គោ​ង យុវជន​ឈ្មោះ យឿន តារា ដែល​ក្រោក​មក​ចាំ​ចាប់​ត្រី តាំងពី​ព្រលឹម​ស្រាងៗ បាន​សម្តែង​ចិត្ត​សប្បាយរីករាយ ដែល​បានមក​ចាប់​ត្រី​រួមគ្នា និង​បង្ហាញ​ការ​សាមគ្គី របស់​ប្រជាពលរដ្ឋ នៅក្នុង​ភូមិ ពិសេស​រក្សាបាន​នូវ ទំនៀមទម្លាប់ ដែលមាន​តាំង ពី​យូរលង់​មកហើយ​។ ក្នុងនាម​ជា យុវជន រូបគេ ចង់ឱ្យ​ទំនៀម​នេះ នៅតែ​បន្ត សម្រាប់​ឱ្យ​កូនចៅ​ជំនាន់​ក្រោយ ស្គាល់​រហូត​តទៅ​។​

ចាប់​ត្រី​រួមគ្នា ត្រៀម​ឡើង​មាឃ របស់​អ្នកស្រុក​អង្គរ នៅតែ​បន្ត​ទំនៀម យ៉ាង​ខ្ជាប់ខ្ជួន​

​ជាមួយគ្នា​នោះ មន្ត្រី​អាជ្ញាធរ​ជាតិ​អប្សរា ក៍បាន​លើកឡើងថាៈ ការ​ប្រារព្ធ​ពិធីបុណ្យ​ឡើង​មាឃ ឬ​ឡើងអ្នកតា​នេះ ជា​ផ្នែក​មួយ នៃ​បេតិកភណ្ឌ​អរូបី​។ ក្រៅពី​បង្ហាញឱ្យឃើញ តម្លៃ​វប្បធម៌ ការថែរក្សា​មរតក​វប្បធម៌ ក៏បាន​ឆ្លុះបញ្ចាំង​ពី សាមគ្គីភាព និង​ភាពរស់រវើក នៅតាម​សហគមន៍ និង​ដើម្បី​អបអរ ដល់​ទិន្នផល ទទួលបាន ក្រោយពី​បាន​ប្រមូល​ផល​ស្រូវ រួចរាល់​ហើយ​។ ចំពោះ ពិធី​នេះ ក៏​មានការ​ប្រារព្ធ ប្រហាក់ប្រហែលគ្នា នៅតាម​ស្រុក និង​ខេត្ត​មួយចំនួនទៀត ទូទាំងប្រទេស​កម្ពុជា ផងដែរ​៕/V​

ចាប់​ត្រី​រួមគ្នា ត្រៀម​ឡើង​មាឃ របស់​អ្នកស្រុក​អង្គរ នៅតែ​បន្ត​ទំនៀម យ៉ាង​ខ្ជាប់ខ្ជួន​

ចាប់​ត្រី​រួមគ្នា ត្រៀម​ឡើង​មាឃ របស់​អ្នកស្រុក​អង្គរ នៅតែ​បន្ត​ទំនៀម យ៉ាង​ខ្ជាប់ខ្ជួន​

ចាប់​ត្រី​រួមគ្នា ត្រៀម​ឡើង​មាឃ របស់​អ្នកស្រុក​អង្គរ នៅតែ​បន្ត​ទំនៀម យ៉ាង​ខ្ជាប់ខ្ជួន​

ចាប់​ត្រី​រួមគ្នា ត្រៀម​ឡើង​មាឃ របស់​អ្នកស្រុក​អង្គរ នៅតែ​បន្ត​ទំនៀម យ៉ាង​ខ្ជាប់ខ្ជួន​

ទីតាំងផ្សាយពាណិជ្ជកម្ម

- Advertisment -

Most Popular