​ដោយៈ គ​ន្ធា / ភ្នំពេញៈ កម្មវិធីសិក្សា​គណនេយ្យ​ករ​ជំនាញ​កម្ពុជា ត្រូវបាន​ដាក់ឱ្យ​ដំណើរការ​ជា​ផ្លូវការ នៅ​ថ្ងៃទី​១០ ខែកុម្ភៈ ឆ្នាំ​២០២១ នេះ ក្រោម​អធិបតីភាព របស់លោក ងី តា​យី រដ្ឋលេខាធិការ ក្រសួង​សេដ្ឋកិច្ច និង​ហិរញ្ញវត្ថុ ប្រធាន​ក្រុមប្រឹក្សា​ជាតិ​គណនេយ្យ និង​ជា​ប្រធាន​គណៈកម្មាធិការ​គ្រប់គ្រង កម្មវិធីសិក្សា គណនេយ្យករ ជំនាញ​កម្ពុជា (​គ​.​ក​.​គ​.​ក​.) ។​

​នៅក្នុង​ពិធី​នេះ លោក ងី តា​យី បានលើកឡើង អំពី​គោលបំណង នៃ​ការបង្កើត​កម្មវិធីសិក្សា គណនេយ្យករ​ជំនាញ​កម្ពុជា គឺ​អភិវឌ្ឍន៍​ធនធានមនុស្ស ជា​អ្នក​វិជ្ជាជីវៈ គណនេយ្យ កម្មវិធីសិក្សា​គណនេយ្យ​ករ​ជំនាញ​កម្ពុជា និង​សវនកម្ម ឆ្លើយតប​ទៅនឹង​កំណើនសេដ្ឋកិច្ច និង​ការតម្រូវ​របស់ ច្បាប់​គណនេយ្យ និង​សវនកម្ម ក្នុង​ក្របខ័ណ្ឌ នៃ​ការអនុវត្ត​កាតព្វកិច្ច​គណនេយ្យ និង​សវនកម្ម​។ កម្មវិធី​នេះ ក៏​រួមចំណែក​ផងដែរ ក្នុងការ​គាំទ្រ​នូវ​យុទ្ធសាស្ត្រ​ចតុកោណ​របស់ រាជរដ្ឋាភិបាល​កម្ពុជា ដែល​បាន​រំលេច​នូវ ទិសដៅ​ចម្បង ៤ គីៈ កំណើន​ការងារ សមធម៌ និង​ប្រសិទ្ធភាព ក្នុងការ​សម្រេចបាន នូវ​កំណើនសេដ្ឋកិច្ច ប្រកបដោយ​ចីរភាព រួមទាំង​កិច្ចអភិវឌ្ឍន៍ សង្គមកិច្ច​មួយ​ដ៏​រឹងមាំ និង​ជា​និរន្ត​ន៍ ដែល​ធានា​កម្រិតជីវភាព និង​សុខដុមភាព របស់​ប្រជាជន ឱ្យ​កាន់តែ​ប្រសើរឡើង ជា​លំដាប់​។​

​លោក ងី តា​យី ក៏បាន​លើកឡើង​ផងដែរ អំពី​ដំណើរការ នៃ​ការរៀបចំ កម្មវិធីសិក្សា​គណនេយ្យ​ករ​ជំនាញ​កម្ពុជា ដោយ​សង្កត់ធ្ងន់​លើ​ស្ថាប័ន ដែល​ចូលរួម ដោយផ្ទាល់ រួមមាន ក្រុមប្រឹក្សា​ជាតិ​គណនេយ្យ និង​វិទ្យាស្ថាន​គណនេយ្យករ​ជំនាញ និង​សវន​ករ​កម្ពុជា និង​ត្រូវបាន​ត្រួតពិនិត្យ និង​ផ្តល់​ការគាំទ្រ ដោយ សមាគម​គណនេយ្យករ​ជំនាញ​ជាន់ខ្ពស់ (ACCA) និង​វិទ្យាស្ថាន​គណនេយ្យករ​ជាន់ខ្ពស់ ចក្រភព​អង់គ្លេស និង វែ​ល​។ កម្មវិធីសិក្សា​គណនេយ្យ​ករ​ជំនាញ​កម្ពុជា ត្រូវបាន​វាយតម្លៃថា បាន​អនុលោម​តាម ការតម្រូវ​របស់​ស្តង់ដា​អប់រំ​អន្តរជាតិ សម្រាប់​គណនេយ្យករ (IES)​របស់​សហព័ន្ធ​គណនេយ្យករ​អន្តរជាតិ (IFAC) ព្រមទាំង​ត្រូវបាន​ទទួលស្គាល់ ក្នុង​ក្របខណ្ឌ​អាស៊ាន (ASEAN MRA) ។​

​លោក ប៊ូ ថា​រិ​ន អគ្គលេខាធិការ នៃ​អគ្គលេខាធិការដ្ឋាន ក្រុមប្រឹក្សា​ជាតិ​គណនេយ្យ បានស្នើ​សុំ​ឲ្យ​អ្នកពាក់ព័ន្ធ​ទាំងអស់ រួមទាំង អ្នកសិក្សា ត្រូវ​រួមគ្នា គាំទ្រ​កម្មវិធី​មួយ​នេះ ឲ្យ​មាន​ភាពជោគជ័យ និង​មាន​និរន្តរភាព ក្នុង​ក្របខណ្ឌ នៃ​ការធានាបាន​នូវ គុណភាព និង​ក្រមសីលធម៌​វិជ្ជាជីវៈ​។​

​នៅក្នុង​ពិធី​ប្រកាស​ដាក់ឱ្យ​ដំណើរការ​ជា​ផ្លូវការ នូវ​កម្មវិធីសិក្សា គណនេយ្យករ​ជំនាញ​កម្ពុជា​នេះ ក៏មាន​ការចូលរួម ពី​សមាជិក សមាជិកា គណៈកម្មាធិការ គ្រប់គ្រង​កម្មវិធីសិក្សា គណនេយ្យករ ជំនាញ​កម្ពុជា (​គ​.​ក​.​គ​.​ក​) អនុគណៈកម្មាធិការ គ្រប់គ្រង​ការប្រឡង និង​អនុគណៈកម្មាធិការ ទទួលស្គាល់​គុណភាព អប់រំ និង​បណ្តុះបណ្តាល ព្រមទាំង តំណាង​ក្រសួង​ស្ថាប័ន វិស័យ​ឯកជន គ្រឹះស្ថានសិក្សា ស្ថាប័ន​ស្រាវជ្រាវ និង​ដៃគូ​អភិវឌ្ឍន៍​នានា មាន​ចំនួន​ប្រមាណ ១៩០ នាក់​៕/V​