ដោយៈ ដេប៉ូ / ភ្នំពេញៈ រដ្ឋមន្ត្រី​ក្រសួងបរិស្ថាន លោក សាយ សំ​អាល់ បានបង្ហាញ​ការ ស្វាគមន៍ ចំពោះ​បំណង​របស់​អង្គការ SNV និង​ចង់ឱ្យ​អង្គ​ការជួយ​ការពារ​ព្រៃឈើ​ឲ្យ បានល្អ ជាពិសេស​ការជួយ​លើកកម្ពស់ ជីវភាព​សហគមន៍ តាមរយៈ​ការដាំ​ពូជឈើ ដែល​បម្រើអោយ​វិស័យ ឧស្សាហកម្ម ដូចជា ពពួក​ដើម​អាកាស្យា ជាដើម​ដែល​អាច ប្រើប្រាស់ ជា​អុស​ក៏បាន ជំនួស​អោយ​ការប្រើប្រាស់ ព្រៃ​ធម្មជាតិ គឺជា​ព្រៃដាំ​។​

​ការលើកឡើង​របស់លោក រដ្ឋមន្ត្រី​ក្រសួងបរិស្ថាន បែបនេះ ធ្វើឡើង ក្នុងជំនួប​ពិភាក្សា ការងារ ជាមួយ​អង្គការ SNV ដែលមាន​បំណង​សហការ ជាមួយ​ក្រសួងបរិស្ថាន​លើ​ផ្នែក ការប្រែប្រួល​អាកាសធាតុ Climate Change Adaptation and Mitigation គឺ​ការ​បន្សាំ និង​ការកាត់បន្ថយ​ឥទ្ធិពល នៃ​ការប្រែប្រួល​អាកាសធាតុ​។​

​លោក សាយ សំ​អាល់ រដ្ឋមន្ត្រី​ក្រសួងបរិស្ថាន ក្នុង​ពិធី​នេះដែរ ក៏បាន​ស្វាគមន៍ ដល់​អង្គការ SNV ដែល​បានលើកឡើង ពី​គម្រោង​គ្រប់គ្រង​ទឹក (water management) ក្នុង​បរិបទ ដែល​យើង​ប្រឈម​នឹង​ការប្រែប្រួល​អាកាសធាតុ ដែល​គម្រោង​នេះ គឺ​ធ្វើយ៉ាងណា គ្រប់គ្រង​ទឹក​ឱ្យបាន​ល្អ ធ្វើឱ្យមាន​កន្លែង​ស្តុក​ទឹក សម្រាប់​សហគមន៍ ក្នុងការ​ប្រើប្រាស់ ដាំ​ដំណាំ និង​បរិភោគ ចំណែក​ចំណុច​មួយទៀត គឺ Green Energy ដែលជា​គម្រោង ដាំ​ដើមឈើ​ឡើងវិញ ដែល​យក​ផល​ពី ការដាំ​ដើមឈើ យកមក​ជំនួស​ការដែល​យក ព្រៃ​ធម្មជាតិ យកមកប្រើ​ប្រាស់​ផង និង​ចូលរួម​កាត់បន្ថយ ឧស្ម័ន​ផ្ទះ​កញ្ចក់​ផង​៕/V​-PC