​ដោយៈ​សុផល​/ភ្នំពេញ:ប្រសិនបើ​យើង​សួរ​មនុស្ស​មួយចំនួន​ពី​ការគិត​របស់​ពួកគេ ទាក់ទង​នឹង​ការរំលោភបំពាន​ផ្លូវភេទ​កុមារ​និង​ជនរងគ្រោះ ចម្លើយ​ស្វ័យប្រវត្តិ​គឺ​ប្រាកដជា ជនរងគ្រោះ​ដោយ​ការរំលោភបំពាន​គឺជា​កុមារី​។

​អង្គការ​មួយចំនួន​ដែល​ធ្វើការ​វិស័យ​ការរំលោភបំពាន​ផ្លូវភេទ​លើ​កុមារ​នៅ​ប្រទេស​កម្ពុជា ផ្តោតលើ​ភាព​ងាយ​រងគ្រោះ​របស់​កុមារី​ជា​អាទិភាព​មុនគេ​។​នេះ មិនមែន​តែ​នៅក្នុង​ប្រទេស​កម្ពុជា​ទេ ប៉ុន្តែ​នៅ​ទូទាំង​ពិភពលោក​។ ប៉ុន្តែ​នៅ​ពីក្រោយ​ធាតុពិត​ទាំងនេះ យើង​នៅតែ​មិនទាន់​ដឹង​ពី​តួលេខ​និង​ភាពជាក់ស្តែង​នៃ​ការរំលោភបំពាន​ផ្លូវភេទ​កុមារា​នៅឡើយ​ទេ​។​

​យោងតាម​អង្គការ​ជំហាន​ដំបូង បានឱ្យដឹងថា​៖​ផ្អែក​តាម​តថភាព​ជាក់ស្តែង គេ​ស​ង្គេ​ត​ឃើញថា កុមារា​ទទួលរង​ការរំលោភបំពាន​ផ្លូវភេទ​ដូច​កុមារី​ដែរ (​យ៉ាងហោចណាស់ ៥%​នៃ​កុមារ​នៅក្នុង​ប្រទេស​កម្ពុជា​)​ប៉ុន្តែ​សម្រាប់​ហេតុផល​ជាច្រើន​ករណី​កុមារ​នេះ​ស្ទើរតែ​មិន​ត្រូវបាន​រាយការណ៍​(៦%​នៃ​ករណី​រំលោភបំពាន​ផ្លូវភេទ​កុមារា​ត្រូវបាន​រាយការណ៍​) បើ​ប្រៀបធៀប​ទៅនឹង​ការរំលោភបំពាន​ផ្លូវភេទ​កុមារី (៤០% ត្រូវបាន​រាយការណ៍​តាម​ការស្រាវជ្រាវ​របស់ UNICEF ឆ្នាំ ២០១២ និង ២០១៤) ។​

អង្គការ​ជំហាន​ដំបូង​កម្ពុជា​កំពុងធ្វើការ​នៅតាម​មូលដ្ឋាន​លើ​បញ្ហា​នេះ ដើម្បី​ស្វែងរក​យុត្តិធម៌​ឲ្យ​កុមារ​ចំពោះ​បញ្ហា​ដែល​កប់​ទុក គ្មាន​គេ​និយាយ គ្មាន​អ្នកណា​ដឹង និង​គ្មាន​អ្នក​ស្តាប់ ប៉ុន្តែ​វា​បានធ្វើ​ឲ្យ​កុមារ​ជាច្រើន​ឈឺចាប់​និង​រងរបួស​ផ្លូវចិត្ត ជាពិសេស​ចំពោះ​កុមារា​តែម្តង​។

​ភាពជា​បុរស និង​ហេតុអ្វី​បានជា​កុមារា​មិនត្រូវ​បានការ​ពារ​
​មាន​កត្តា​ចម្បងៗ​ជាច្រើន​ដែល​ពន្យល់​ពី មូល​ហេតុដែល​កុមារា​មិន​ទទួលបាន​ការការពារ​ដូច​កុមារី​។ តាមរយៈ​ការសិក្សា​ស៊ីជម្រៅ​នានា អង្គការ​ជំហាន​ដំបូង​កម្ពុជា​បាន​នឹង​កំពុង​ខិតខំ​ប្រឹងប្រែង​យ៉ាងខ្លាំង ដើម្បី​ស្វែងយល់​ពី​បញ្ហា​ទាំងនេះ​។ ឫសគល់​នៃ​បញ្ហា​នេះ​គឺ បណ្តាលមកពី​កង្វះ​ចំណេះដឹង​អំពី​ការរំលោភបំពាន​ផ្លូវភេទ​នៅក្នុង​ប្រទេស ការអប់រំ​ផ្លូវភេទ​នៅមានកម្រិត​ស្តួចស្តើង អ្នកផ្តល់​សេវា​មាន​ជំនាញ​មិន​គ្រប់គ្រាន់ និង​ខ្វះ​សេវា​ជាក់លាក់​សម្រាប់​គាំទ្រ​ដល់​កុមារា​។ ការស្រាវជ្រាវ​ចុងក្រោយ​ស្តីពី “​ការថែទាំ​កុមារា​” បាន​នាំមក​នូវ​របកគំហើញ​ដ៏​គួរឱ្យ​ចាប់អារម្មណ៍​មួយចំនួន​អំពី​ការ​ពិពណ៌នា​ភាពជា​បុរស​នៅក្នុង​សង្គម​កម្ពុជា​។

​និន្នាការ​ភាពជា​បុរស​ទាំងនេះ គឺជា​ផ្នត់គំនិត​ដ៏​រឹងមាំ​ដែល​កើតចេញពី​ទំនាក់ទំនង​យេនឌ័រ​នៅក្នុង​សង្គម​កម្ពុជា​។ តើ​មាន​និន្នាការ​អ្វីខ្លះ​? ជាទូទៅ គេ​ច្រើន​គិតថា បុរស​ត្រូវតែ​ទទួលខុសត្រូវ​ផ្នែក​ហិរញ្ញវត្ថុ​របស់​គ្រួសារ​របស់​ពួកគេ​។ គេ​ក៏​ទទួលយក និង​ទទួលស្គាល់​ផងដែរ​ថា បុរស​ត្រូវតែ​ខ្លាំង (​ជាង​ស្ត្រី​) ដូច្នេះហើយ មិនគួរ​បង្ហាញ​ភាពទន់ខ្សោយ​/​ភាព​ងាយ​រងគ្រោះ​ឲ្យ​គេ​ដឹង និង​ឃើញ​នោះទេ​។ លើសពីនេះ​ទៀត ទោះបី​ជាមាន​គោលនយោបាយ​ប្រឆាំងនឹង​អំពើហិង្សា​ក៏ដោយ បុរស​នៅតែ​ទទួលបាន​អំណាច​ប្រើ​អំពើហិង្សា ហើយ​ត្រូវបាន​សង្គម​ទទួលស្គាល់ថា​ជា​របៀប​បង្ហាញ​ភាពជា​បុរស​។ និន្នាការ​ភាពជា​បុរស​ទាំងនេះ​អាច​ប្រែប្រួល​ឬ​កែរ​បាន ជាពិសេស​សម្រាប់​កុមារ​នៅ​កម្ពុជា ប៉ុន្តែ​បច្ចុប្បន្ន​វា​នៅ​រឹងមាំ​នៅឡើយ​ក្នុងសង្គម​កម្ពុជា​។​

​ឥលូវ​នេះ គេ​យល់ថា និន្នាការ​ភាពជា​បុរស​ទាំងនេះ​កំពុង​ជះឥទ្ធិពល​ដោយផ្ទាល់​ទៅលើ​បញ្ហា​ការរំលោភ​ផ្លូវភេទ​លើ​កុមារា​។ កុមារា​រង​ការរំលោភបំពាន​ផ្លូវភេទ​មួយចំនួន​តែង​គិតថា ខ្លួនឯង​ត្រូ​រឹងមាំ និង​ត្រូវ​បង្ហាញ​ភាពខ្លាំង​នោះ​ចេញមក​។ ទោះជា​យ៉ាងណាក៏ដោយ រាល់​ដំណើរការ​នៃ​ការជាសៈ​ស្បើយ​ឡើងវិញ ត្រូវមាន​ការចែករំលែក​អារម្មណ៍ បង្ហាញ​ភាពភ័យខ្លាច បង្ហាញ​ភាពទន់ខ្សោយ​និង​ភាព​ងាយ​រងគ្រោះ ហើយ​ការធ្វើ​បែបនេះ វា​ហាក់ដូចជា​ប្រឆាំងនឹង​ការរំពឹងទុក​របស់​ស​ង្គ​ម​កម្ពុជា​ទៅលើ​កុមារា​។ ហេតុ​ដូច្នេះហើយ កុមារា​ជាច្រើន​បន្ត​លាក់បាំង​និង​រក្សា​រឿងនេះ​ជាការ​សម្ងាត់ ហើយ​មិន​ស្វែងរក​ការជួយ​ពី​ខាងក្រៅ​ទេ​។ ពួកគេ​ធ្វើ​ដូច្នេះ​ដើម្បី​រក្សា​ភាពខ្លាំង ព្រោះ​ការបង្ហាញ​ភាពទន់ខ្សោយ​/​ភាព​ងាយ​រងគ្រោះ​របស់ខ្លួន​អាចធ្វើឱ្យ​ពួកគេ​មាន​អារម្មណ៍​អាម៉ាស់ ភ័យខ្លាច​ការ​ចំអក ឬ​ម៉ាក់​ងាយ​ពី​មិត្តភក្តិ​។

​ហេតុផល​មួយទៀត​អាចមកពី​ឪពុកម្តាយ ឬ​អ្នកផ្តល់​សេវា​មិន​ជឿ​ពួកគេ ដោយសារ​មិនបាន​ត្រៀមខ្លួន​ទទួលយក​បញ្ហា​ការរំលោភបំពាន​ផ្លូវភេទ​កុមារា ។ ក្នុងរ​កណី​ដែលមាន​មនុស្ស​ជឿ​និង​ស្តាប់​រឿងរ៉ាវ​របស់​ពួកគេ​វិញ ភាគច្រើន​គេ​នឹង​ប្រាប់ថា ក្នុងនាម​ជា “​កុមារា​រឹងមាំ​” វា​នឹង​ជាសះស្បើយ​ទៅវិញ​ដោយ​ឯកឯង មិនបាច់​មានការ​ជួយ​ទេ​។ គួបផ្សំ​នឹង​ការហាម​ប្រាម​អំពី​ការនិយាយ​រឿងរ៉ាវ​ផ្លូវភេទ​ផង វា​បាន​រារាំង​កុមារា​ពី​ការរាយការណ៍​ផលប៉ះពាល់​នៃ​ការរំលោភបំពាន​មកលើ​ពួកគេ​។ មាន​ឧបសគ្គ​ជាច្រើន​រារាំង​កុមារា​ពី​ការរាយការណ៍​អំពី​ការរំលោភបំពាន​ផ្លូវភេទ នៅពេល​ពួកគេ​ធ្លាក់ខ្លួន​ជា​ជនរងគ្រោះ​។​

​សព្វថ្ងៃនេះ ចំណេះដឹង​របស់​អ្នកផ្តល់​សេវា​និង​អ្នកជំនាញ​កិច្ចការពា​កុមារ​អំពី​ការរំលោភបំពាន​ផ្លូវភេទ​លើ​កុមារា​នៅមានកម្រិត​។ ជា​រៀងរាល់ឆ្នាំ អង្គការ​ជំហាន​ដំបូង​កម្ពុជា​បាន​បណ្តុះបណ្តាល​និង​បង្កើន​ការយល់ដឹង​ដល់​អ្នកជំនាញ​ជា​មធ្យម​ប្រហែល ៣០០ នាក់ លើ​ការងារ​សង្គមកិច្ច​ក្នុង​វិស័យ​ការពារ​កុមារ ដើម្បី​បំពេញ​ការអនុវត្ត​ការងារ​ឲ្យ​បានល្អ​ប្រសើរ បូក​រួមទាំង​សមត្ថភាព​ក្នុងការ​ឆ្លើយតប​ទៅនឹង​ជនរងគ្រោះ​ជា​កុមារា​។ ដូចដែល​បាន​រៀបរាប់​ដោយ​បុគ្គលិក​របស់​អង្គការ​ជំហាន​ដំបូង​កម្ពុជា ដំណើរការ​សម្រាប់​កុមារ​រងគ្រោះ​ដោយ​ការរំលោភបំពាន​ផ្លូវភេទ “​មាន​រយៈពេល​យូរ ដែល​តម្រូវឱ្យ​កុមារ​បើកចំហរ និង​មានការ​គាំទ្រ​ពី​ក្រុមគ្រួសារ​របស់​ពួកគេ​”​។​

​នៅតាម​ជនបទ យើង​អាច​សង្កេតឃើញ​ការពិត​ដែលថា កុមារា​ចេញទៅ​ដើរលេង​ដោយ​សេរី
​ខណៈពេល​កុមារី​ត្រូវបាន​រឹតត្បិត​ឲ្យ​លេង​នៅតែ​ក្នុងផ្ទះ ហើយ​ដោយសារ​ឪពុកម្តាយ​ខ្វះ​ការយល់ដឹង​ពី​ភាព​ងាយ​រងគ្រោះ​របស់​កុមារា​។ ការទទួលខុសត្រូវ​ផ្នែក​ហិរញ្ញវត្ថុ​សម្រាប់​ក្រុមគ្រួសារ ទន្ទឹមនឹង​ការប្រកាន់​គំនិត​ដែលថា កុមារា​ត្រូវតែ​ខ្លាំង​និង​រឹងមាំ ហើយ​មាន​សិទ្ធិ​ប្រើ​អំពើ​ហឹ​ង្សា​នោះ វា​ប្រៀបដូចជា​ហ្វ្រាំង​មួយ​ដែល​បង្ក​ភាព​រាំងស្ទះ​ដល់​វឌ្ឍន​សមភាព​យេនឌ័រ ដែលជា​អាទិភាព​មួយ​នៅក្នុង​ប្រទេស​កម្ពុជា​សព្វ​ថ្ងៃ​។ ស្ត្រី​ដែល​មិនមាន​ឯករាជ្យភាព មានលទ្ធភាព​តិចតួច ដើម្បី​រួចផុត​ពី​អំពើហិង្សា​របស់​ប្តី​។​

​ខណៈពេលដែល​បញ្ហា​ទាំងអស់នេះ​នៅ​មិនទាន់បាន​ដោះស្រាយ ហើយ​កុមារា​ត្រូវបាន​ទុកឱ្យ​ដើរតួនាទី​ដូចដើម​ក្នុងសង្គម ហើយ​ស្ថានភាព​ចេះតែ​បន្ត​ទៅមុខ​។ យើង​ត្រូវ​ពិនិត្យ​និន្នាការ​ក្រោយ​ភាពជា​បុរស និង​ភាពជា​ស្ត្រី​ឡើងវិញ​។ ការបើក​កកាយ “​បញ្ហា​លាក់កំបាំង​” ទាំងនេះ គឺជា​ដំណើរការ​ដ៏​យូរអង្វែង​មួយ​។ អង្គការ​ជំហាន​ដំបូង​កម្ពុជា តាមរយៈ​កម្មវិធី​ផ្សេងៗ​របស់ខ្លួន បាន​នឹង​កំពុង​ព្យាយាម​បើក​កកាយ​ទៅដល់​គ្រប់​ស្រទាប់​នៃ​សង្គម ដើម្បី​លើកយក​បញ្ហា​នៃ​ការរំលោភបំពាន​ផ្លូវភេទ​លើ​កុមារា ជា​របៀបវារៈ​មិនអាច​មើលរំលង​បាន​។ បញ្ហា​ទាំងនេះ ត្រូវតែ​ដោះស្រាយ​ដោយ​ប្រើ​វិធីសាស្ត្រ​ពីក្រោម​ទៅលើ​។

​ម​ហិ​ច្ឆិ​តា​របស់​អង្គការ​ជំហាន​ដំបូង​កម្ពុជា គឺ​ផ្តល់​វគ្គ​បណ្តុះបណ្តាល​គ្រូ​បង្គោល​ដើម្បី​ផ្សព្វផ្សាយ​អំពី​ការរំលោភបំពាន​កុមារា​ទៅដល់​ប្រជាជន​ដែល​រស់នៅ​តំបន់​ដាច់ស្រយាល និង​ធ្វើ​ឲ្យ​ពួកគេ​យល់ដឹង​អំពី​និន្នាការ​ភាពជា​បុរស​ក្នុងសង្គម​កម្ពុជា ដែល​កំពុង​ជះឥទ្ធិពល​ដល់​កុមារ​គ្រប់រូប បូក​ទាំង​កុមារា និង​កុមារី​ផងដែរ​។

​ការចាត់វិធានការ​លើ​ការរំលោភបំពាន​ផ្លូវភេទ​លើ​កុមារា​និង​ឫសគល់​របស់​វា គឺ​មិន​ត្រឹមតែ​អាច​ការពារ​កុមារា​បាន​ប៉ុណ្ណោះ​ទេ វា​ថែមទាំង​ធ្វើ​ឲ្យ​មនុស្ស​គ្រប់គ្នា​មើលឃើញ​ពី​ផ្នត់គំនិត​រើសអើង​លើ​តួនាទី​យែ​ន​ឌ័​រដែ​ល​ចាក់ឫស​យូរអង្វែង និង​លាក់កំបាំង ហើយ​ថែមទាំង​អាចជួយ​កែលម្អ បញ្ហា​យែ​ន​ឌ័​រ​ដោយ​មិន​ទុក​ឲ្យ​កុមារា​ត្រូវបាន​គេ​មើលរំលង​តទៅទៀត​ឡើយ​៕​