ប្រែ​សម្រួលៈ​វាសនា​/​យ៉ាងហ្គោន​៖​ពួក​អ្នកគាំទ្រ​មេដឹកនាំ​ស៊ីវិល​មី​យ៉ាន់​ម៉ា បាន​ប៉ះទង្គិច​ជាមួយ​ប៉ូលិស​កាលពី​ថ្ងៃ​សុក្រ​ទី​១២​កុម្ភៈ នៅពេល​មនុស្ស​រាប់​ម៉ឺន​នាក់​បាន​ចូលរួម​ក្នុង​បាតុកម្ម​ប្រឆាំង​រដ្ឋប្រហារ​​នៅ​ទូទាំង​ប្រទេស ដោយ​ផ្គើន​នឹង​ការអំពាវនាវ​របស់រ​បប​សឹក ដែល​សុំអោយ​បញ្ឈប់​ការជួបជុំ​តវ៉ា​។​

​ការប្រឆាំង​តវ៉ា​ភាគច្រើន​ដោយ​អហិង្សា​បាន​ផ្ទុះឡើង​នៅ​ពាសពេញ​ប្រទេស​អាស៊ី​អាគ្នេយ៍​នេះ ក្នុង​បាតុកម្ម​មហាជន​ធំ​បំផុត​តាំងពី​មុន​មក​ប្រឆាំង​នឹង​រដ្ឋប្រហារ​យោធា​កាលពី​សប្តាហ៍​មុន នៅ​មួយថ្ងៃ​​បន្ទាប់​ពី​អាម៉េរិក​ដាក់​ទណ្ឌកម្ម​លើ​ពួក​ឧត្តមសេនីយ៍ដែ​លដឹក​នាំ​ការដណ្តើម​អំណាច​។​

​មាន​សេចក្តីរាយការណ៍​ថា មនុស្ស​៣​នាក់​បាន​រងរបួស​នៅ​ពេល​ប៉ូលិស​បាញ់​គ្រាប់កាំភ្លើង​ជ័រ​ដើម្បី​បំបែកហ្វូង​អ្នកប្រឆាំង​តវ៉ា​រាប់ម៉ឺន​នាក់​នៅ​ទីប្រជុំ​ន​ម៉​រឡា​មយីន​។​

​នៅ​ទីក្រុង​យ៉ាងហ្គោន វេជ្ជបណ្ឌិត​រាប់រយ​នាក់​ក្នុង​សម្លៀក​បំពាក់​សបាន​ដើរ​ដង្ហែ​កាត់​វត្ត ស្វេ​ដា​ហ្គុ​ន ដែល​ជា​ទីតាំង​ពិសិដ្ឋ​បំផុត​របស់​ប្រទេស​របស់​អ្នក​កាន់​ព្រះពុទ្ធសាសនា នៅ​ពេល​នៅ​ផ្នែក​មួយ​ទៀត​នៃ​ទី​​ក្រុង អ្នកគាំទ្រ​បាល់​ស្លៀក​បែប​ជា​កីឡាករ​បាន​ដើរ​ជាមួយ​នឹង​បដា​ថ្កោលទោស​រដ្ឋប្រហារ​។​

​បាតុកម្ម​ដទៃ​ទៀត​បាន​កើត​ឡើង​នៅ​ក្រុង​ណៃ​ពីដោរ ទីប្រជុំជន​មាត់សមុទ្រ ដា​វ៉េ និង​នៅ​ក្រុង​មី​យី​ត​គ្យី​ណា នៃ​រដ្ឋកា​ជីន ៕