ដោយៈ រ៉ាម៉ន / ភ្នំពេញៈ ការដ្ឋានស្ថាបនា មហាវិថីថ្មីមួយខ្សែ ដែលមានទទឹង ៣០ ម៉ែត្រ និងបណ្តោយផ្លូវជិត ៦ គីឡូម៉ែត្រ មានសួនច្បារកណ្តាល ចាប់ពីផ្លូវលេខ ១០០៣ (ផ្លូវបត់ចូលផ្សារទំនើប អ៊ីអនសែនសុខ) ស្របប្រឡាយមេ ខាងជើងរាជធានីភ្នំពេញ រហូតដល់មហាវិថី ឈ្នះ ឈ្នះ ក្នុងភូមិសាស្ត្រ ខណ្ឌឫស្សីកែវ ស្ថាបនាសម្រេចបានប្រមាណជិត ៨០ ភាគរយហើយ ដើម្បីសម្រួលចរាចរណ៍ ជូនប្រជាពលរដ្ឋ នៅក្នុងរាជធានីភ្នំពេញ។ នេះបើតាមការបញ្ជាក់ ឱ្យដឹងពីលោក ឃួង ស្រេង អភិបាលរាជធានីភ្នំពេញ ខណៈដែលលោកដឹកនាំមន្ត្រីជំនាញ និងអាជ្ញាធរ ចុះពិនិត្យមើលការដ្ឋាននេះ នៅរសៀល ថ្ងៃទី១៥ ខែកុម្ភៈ ឆ្នាំ២០២១ នេះ។
ក្នុងឱកាសនោះ លោក ឃួង ស្រេង បានមានប្រសាសន៍ថាៈ មហាវិថីថ្មី ដែលបាននិងកំពុងស្ថាបនាឡើងនេះ ជាផ្លូវដែលមានការចូលរួម ពីសប្បុរជន ដែលបាននិងកំពុងអភិវឌ្ឍន៍ លំនៅដ្ឋាន នៅតាមបណ្ដោយផ្លូវនេះ ដោយសហការជាមួយ អាជ្ញាធររាជធានីភ្នំពេញ។
លោកបានបន្តថាៈ មហាវិថីនេះ ត្រូវស្ថាបនាឡើងជា ២ ជំហាន ដោយជំហានទី១ ចាប់ពីផ្លូវលេខ ១០០៣ រហូតដល់មុខហ្គ្រេនភ្នំពេញ និងបន្តពីហ្គ្រេនភ្នំពេញ រហូតទៅដល់ មហាវិថីឈ្នះ ឈ្នះដែលមានទទឹង ៣០ ម៉ែត្រ មានសួនច្បារ នៅកណ្ដាល ជាមួយនឹងការដាក់បណ្ដាញលូ នៅសងខាងផ្លូវផងដែរ ។ ការដ្ឋាននេះ បើគិតមកដល់ពេលនេះ សម្រេចបានប្រមាណជា ៧០ ទៅ ៨០ ភាគរយហើយ។ ប៉ុន្តែទោះបីជាយ៉ាងណាក្តី ការដ្ឋាននេះ ក៏នៅមានបញ្ហាប្រឈម នៃប៉ះពាល់មួយចំនួនផងដែរ នោះគឺប្រជាពលរដ្ឋ ប្រមាណ ២០០ គ្រួសារ រស់នៅលើទ្រូងផ្លូវនេះតែម្ដង ។
បញ្ហានេះ លោកអភិបាលរាជធានីភ្នំពេញ បានជំរុញឲ្យអាជ្ញាធរខណ្ឌឬស្សីកែវ ត្រូវធ្វើការដោះស្រាយ បញ្ហានេះ ឱ្យបានលឿនបំផុត គឺដោះស្រាយឲ្យបាន ក្នុងរយៈពេល ពីរសប្តាហ៍ទៀត។ បើដោះស្រាយមិនចេញ ត្រូវរាយការណ៍បន្ទាន់ មករដ្ឋបាលរាជធានីភ្នំពេញ។
លោកបញ្ជាក់ថាៈ ជាគម្រោងរបស់ រដ្ឋបាលរាជធានីភ្នំពេញ ប្រជាពលរដ្ឋ ដែលទទួលរងផលប៉ះពាល់ ទាំង ២០០ គ្រួសារនេះ រដ្ឋបាលរាជធានីភ្នំពេញ មានជម្រើសពីរ ដើម្បីឲ្យពួកគាត់ ធ្វើការជ្រើសរើស ដោយរដ្ឋបាលរាជធានី នឹងផ្តល់ដី ទំហំ ៤,២ ម៉ែត្រ ពីគុណ ១៥ ម៉ែត្រ នៅទីតាំងពីរកន្លែងនោះ គឺនៅ 7NG ក្នុងខេត្តកណ្តាល (ដែលត្រៀម និងកាត់ចូលមកភ្នំពេញ) និងនៅតាមបណ្ដោយ ផ្លូវលេខ៥១ ក្នុងខណ្ឌព្រែកព្នៅ។
បន្ថែមពីលើនេះទៀត លោក ឃួង ស្រេង ក៏បានជំរុញឲ្យអាជ្ញាធរខណ្ឌឫស្សីកែវ ចុះពិនិត្យការដ្ឋាននេះ ឱ្យបានជាប្រចាំ នឹងជំរុញឲ្យក្រុមហ៊ុន ដែលទទួលការស្ថាបនា មហាវិថីនេះ អនុវត្តឱ្យត្រឹមត្រូវ តាមលក្ខណៈបច្ចេកទេស ត្រូវប្រើគ្រឿងចក្រធំៗ ដើម្បីស្ថាបនាគ្រឹះ។
គួរបញ្ជាក់ថា ការដ្ឋាននេះ បានចាប់ផ្តើម កាលពីថ្ងៃទី៧ ខែកញ្ញា ឆ្នាំ២០២០ ក្រោមវត្តមានលោក ឃួង ស្រេង អភិបាលរាជធានីភ្នំពេញ និងមានការចូលរួមពី ប្រជាពលរដ្ឋ ជាច្រើននាក់ដែរ។ មហាវិថីថ្មីនេះ រត់ត្រង់ជួរ ភ្ជាប់មកមហាវិថីអង្គរ ឆ្ពោះមករង្វង់មូលកាំកូ ។ ជាប្រភេទ ផ្លូវភ្លោះ មានប្រវែង ៥.៨៦០ ម៉ែត្រ ទទឹង ៣០ ម៉ែត្រ ជាផ្លូវបេតុងអាមេរ កម្រាស់ ២០ សង់ទីម៉ែត្រ , ក្នុងនោះ ផ្លូវសងខាង ១២ ម៉ែត្រ សួនកណ្តាល ២ ម៉ែត្រ និងចិញ្ចើមផ្លូវសងខាង ២ ម៉ែត្រ ផ្លូវទ្វេទិស មាន ៣ គន្លង សម្រាប់រថយន្ត ទៅមក និង ១ គន្លង សម្រាប់ទោចក្រយានយន្ត ទៅមក , ដាក់បណ្តាញលូសងខាងផ្លូវ ទំហំ ០,៨ម៉ែត្រ ប្រវែង ១១.៧២០ម៉ែត្រ និងដាក់លូឆ្លងកាត់ទទឹងផ្លូវ ចំនួន៨កន្លែង៕/V
