ដោយៈ សរិទ្ធ / ភ្នំពេញៈ កម្លាំងជំនាញសហការជាមួយ កម្លាំងសណ្ដាប់ធ្នាប់ចរាចរណ៍ នៃស្នងការដ្ឋាននគរបាល រាជធានីភ្នំពេញ បានឃាត់ខ្លូនជនសង្ស័យ ១នាក់ ករណីជួញដូរ ដោយខុសច្បាប់ នូវសារធាតុញៀន កាលពីវេលាម៉ោង ១១ យប់ថ្ងៃទី១៥ ខែកុម្ភៈ ឆ្នាំ២០២១ នៅចំណុចផ្លូវជាតិលេខ៥ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
នគរបាលមូលដ្ឋាន បានឲ្យដឹងថាៈ ជនសង្ស័យ ឈ្មោះ ង្វៀង យ៉ាំងឌឹក ភេទប្រុស អាយុ៣៨ ឆ្នាំ ជនជាតិវៀតណាម មុខរបរ មិនពិតប្រាកដ មានទីលំនៅបច្ចុប្បន្ន ផ្ទះគ្មានលេខ ផ្លូវលំ ភូមិពោធិ៍មង្គល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ សម្ភារចាប់យកមាន ម្សៅក្រាមសថ្លា ជាគ្រឿងញៀន ចំនួន១ថង់ធំល្មម និង ៣ ថង់តូច, ម៉ូតូម៉ាកស៊ុយហ្ស៊ុយគី វីវ៉ា ពណ៌ខ្មៅ ពាក់ស្លាកលេខ ភ្នំពេញ 1BU-7584 ចំនួន១គ្រឿង និងទូរស័ព្ទដៃម៉ាក oppo ពណ៌ខ្មៅ ចំនួន១គ្រឿង។
ប្រភពដដែល បានឲ្យដឹងទៀតថាៈ នៅមុនពេលកើតហេតុ កម្លាំងផ្នែកជំនាញ សហការជា មួយកម្លាំងចរាចរណ៍ នៃស្នងការដ្ឋាន នគរបាល រាជធានីភ្នំពេញ បានដាក់គោលដៅ ត្រួតពិនិត្យជាតិស្រវឹង និងគ្រឿងញៀន នៅចំណុចកើតហេតុ ខាងលើក៏ប្រទះឃើញ ជនសង្ស័យម្នាក់ ភ្លាមនោះ កម្លាំងយើង ក៏បានហៅឱ្យឈប់ ដើម្បីធ្វើការត្រួតពិនិត្យ ឆែកឆេរ រកឃើញសម្ភារ ដូចបានរៀបរាប់ខាងលើ ហើយកម្លាំង ក៏បានឃាត់ខ្លួនជនសង្ស័យយកមក ធ្វើតេស្ត ស្វែងរកសារធាតុញៀន នៅក្នុងទឹកនោម ជាលទ្ធផលវិជ្ជមាន (មានសារធាតុញៀន ក្នុងទឹកនោម)។
បច្ចុប្បន្ន ជនសង្ស័យខាងលើ ត្រូវបានបញ្ជូនទៅ អធិការដ្ឋាននគរបាល ខណ្ឌព្រែកព្នៅ រួមទាំងវត្ថុតាង ដើម្បីកសាងសំណុំរឿង បញ្ជូនទៅសាលាដំបូង រាជធានីភ្នំពេញ ចាត់ការតាមនីតិវិធីច្បាប់៕/V-PC
