អភិបាល​រាជធានី អំពាវនាវ​ឱ្យ​បងប្អូន​ប្រជាពលរដ្ឋ កុំ​ជឿ​លើ​ជន​អគតិ​មួយចំនួន ជុំវិញ​ការចាក់​វ៉ាក់សាំង​កូ​វីដ​-១៩

ដោយៈ រ៉ា​ម៉ន / ភ្នំពេញៈ លោក​ឃួ​ង ស្រេង អភិបាល​រាជធានី​ភ្នំពេញ បានធ្វើការ​អំពាវនាវ ឲ្យ​បងប្អូន​ប្រជាពលរដ្ឋ​ទាំងអស់ កុំ​ជឿ​លើ​ការឃោសនា ពី​ជន​អគតិ​មួយចំនួន​ជុំវិញ​ការ ចាក់​វ៉ាក់សាំង​កូ​វីដ​-១៩ (Sinopharm Beijing Institute of Biological Products) ខណៈដែល ប្រមុខ​ប្រមុខ​រាជរដ្ឋាភិបាល បាន​ខិតខំ​ប្រឹងប្រែង កៀងគរ រហូត​ទទួលបាន​ចាក់​វ៉ាក់សាំង កូ​វីដ​-១៩ និង​ស្រប​ពេលដែល​ប្រទេស អ្នកផ្តល់ជំនួយ ប្រឈម​នឹង​ជំងឺ​នេះ ដែរនោះ​។​

​លោក ឃួ​ង ស្រេង បាន​មានប្រសាសន៍​បែបនេះ ក្នុង​កិច្ចសម្ភាសន៍​មួយ​ជាមួយ អ្នកកាសែត កាលពី​ល្ងាច ថ្ងៃទី​១៥ ខែកុម្ភៈ​នេះ​ថាៈ កាលពី​ថ្ងៃទី​១០ កុម្ភៈ កន្លងមកនេះ រូបលោក​ផ្ទាល់ លោក ហ៊ុន ម៉ា​ណែ​ត លោក ហ៊ុន ម៉ានិត កូនប្រុស​របស់​សម្ដេច​តេ​ជោ ហ៊ុន សែន និង​ឥស្សរជន​មួយចំនួនទៀត បាន​ចាក់​វ៉ាក់សាំង ការពារ​ជំងឺ​កូ​វីដ​-១៩​នេះ នៅ​មន្ទីរពេទ្យ កាល់ម៉ែត ខណៈដែល​ឥស្សរជន មួយចំនួនទៀត បាន​ចាក់​នៅ​មន្ទីរពេទ្យ​ផ្សេងទៀត ក្រោម​ការរៀបចំ របស់​ក្រសួងសុខាភិបាល​។​

​លោក​បាន​បញ្ជាក់ថាៈ សម្រាប់​រូបលោក គិត​មកដល់ពេលនេះ ការចាក់​វ៉ាក់សាំង​កូ​វីដ​-១៩ មាន​រយៈពេល ៥ ថ្ងៃ​ហើយ ប៉ុន្តែ​វ៉ាក់សាំង​កូ​វីដ​-១៩ មិនបាន​ធ្វើ​ឲ្យ​លោក មាន​បញ្ហា​អ្វី​នោះទេ ពោលគឺ គ្រាន់តែ​ធ្វើឱ្យ​លោក ស្អិត​ភ្នែក​ប្រមាណ ១ ម៉ោង​ក្រោយ​ការចាក់​វ៉ាក់សាំង​នេះ ប៉ុណ្ណោះ បន្ទាប់ពីនោះ សុខភាព​របស់លោក នៅ​ល្អប្រសើរ​ដដែល លោក​អាច​ហាត់ប្រាណ បាន​ដូច​សព្វមួយដង មិនមាន​អ្វីដែល​ធ្វើ​ឲ្យ​ប៉ះពាល់ ដល់​សុខភាព​នោះទេ​។ ដូច្នេះ​លោក សូម​ធ្វើការ​អំពាវនាវ ឲ្យ​បងប្អូន​ប្រជាពលរដ្ឋ​ទាំងអស់ កុំ​ជឿ​លើ​ការឃោសនា របស់​ជន​អគតិ ដែល​ចង់​បំផ្លាញ អាយុជីវិត​ប្រជាពលរដ្ឋ និង​ប្រទេសជាតិ​របស់​យើង​។ ជន​អគតិ​ទាំងនេះ គ្មាន​បំណងល្អ ជាមួយ​យើង​ទេ ពួកគេ​មានតែ​គំនិត ចង់​បំផ្លិចបំផ្លាញ ភាពសុខសាន្ត​របស់​ក​ម្ពុ​ជា​តែប៉ុណ្ណោះ​។​

​លោក​បាន​បន្តទៀតថាៈ សម្ដេច​តេ​ជោ ហ៊ុន សែន​គ្មាន​ហេតុផល​ណាមួយ​ដែល​ត្រូវ​បំផ្លិច បំផ្លាញ អាយុជីវិត​ប្រជាពលរដ្ឋ​នោះទេ ។ សម្ដេច​មិន​ត្រឹមតែ​បាន រំដោះ​ប្រទេសជាតិ ចេញពី​ការកាប់សម្លាប់ នៃ​របប​ប៉ុលពត​ប៉ុណ្ណោះ​ទេ តែ​សម្ដេច បាន​កសាង​ប្រទេស ដ៏​លំបាក​មួយ​នេះ ក្លាយជា​ប្រទេស មានការ​អភិវឌ្ឍ រីកចម្រើន​ថែមទៀត ។ សម្ដេច​បាន គិតគូរ​ពី សុខទុក្ខ​ប្រជាពលរដ្ឋ តើ​មាន​ហេតុផល​ណាមួយ ដែល​សម្ដេច​ចង់​បំផ្លិចបំផ្លាញ អាយុជីវិត​ប្រជាពលរដ្ឋ​នោះ​។​

​លោក​ក៏បាន​បញ្ជាក់ទៀតថាៈ យោងតាម​អនុសាសន៍ របស់​សម្ដេច​តេ​ជោ ហ៊ុន សែន ប្រទេស​កម្ពុជា ក្រោយពី​ទទួលបាន​វ៉ាក់សាំង​កូ​វីដ​-១៩ និង​ក្រោយពី​បាន ចាក់​វ៉ាក់សាំង​នេះ ដល់​ប្រជាពលរដ្ឋ​អស់ នៅក្នុង​ព្រះរាជាណាចក្រ​កម្ពុជា ហើយ​នោះ សេដ្ឋកិច្ចកម្ពុជា នឹង​កម្រើក​ឡើងវិញ​ហើយ តាមរយៈ​ការ​ចូលមក វិនិយោគ​ពី​សំណាក់​អ្នកវិនិយោគទុន បរទេស នៅក្នុង​ព្រះរាជាណាចក្រ​កម្ពុជា ៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular