Home ព័ត៌មានជាតិ សេដ្ឋកិច្ច ​លទ្ធផល​ការងា...

​លទ្ធផល​ការងារ និង​សមិទ្ធផល​សម្រេចបាន របស់​ក្រសួង​សាធារណការ នា​ឆ្នាំ​២០២០ ក្នុង​សន្និបាត​ប្រចាំឆ្នាំ​

​ដោយៈ សុផល / ភ្នំពេញៈ នា​ថ្ងៃទី​១៦ ខែកុម្ភៈ ឆ្នាំ​២០២១ នៅ​ទីស្តីការក្រសួង លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​អញ្ជើញ​ជា​អធិបតី ក្នុង​ពិធី​បើក​សន្និបាត បូកសរុប​លទ្ធផល​ការងារ ប្រចាំឆ្នាំ​២០២០ និង​លើក​ទិសដៅ​ការងារ ឆ្នាំ​២០២១ ដោយមាន​ការអញ្ជើញ​ចូលរួម ដោយផ្ទាល់​ជាង ៣០០ នាក់ នៅក្នុង​សាលប្រជុំ​ធំ និង​ចូលរួម​តាម​ប្រព័ន្ធ​វីដេអូ ពី​ចម្ងាយ​ចំនួន ប្រមាណ ៥០០ នាក់​។​

​សន្និបាត​ឆ្នាំនេះ បានរៀបចំ​ឡើង ក្រោម​ប្រធាន​ប​ទៈ “​លើកកម្ពស់​ការអភិវឌ្ឍ​ធនធានមនុស្ស វិទ្យាសាស្ត្រ បច្ចេកទេស ដើម្បី​ពង្រឹងគុណភាព ប្រសិទ្ធភាព ក្នុង​វិស័យ​សាធារណការ និង​ដឹកជញ្ជូន និង​ភស្តុភា​រកម្ម​” ក្នុង​គោលបំណង ពិនិត្យមើល​វឌ្ឍនភាព​ការងារ ការពិភាក្សា​ផ្លាស់ប្ដូរ​យោបល់ និង​ដកស្រង់​បទពិសោធន៍ ល្អៗ ការអនុវត្ត តាម​អនុសាសន៍ ដ៏​ល្អ​ប្រពៃ មានតម្លៃ និង​ប្រកបដោយ គតិបណ្ឌិត​របស់ ប្រមុខ​រាជរដ្ឋាភិបាល ដើម្បី​ជា​ត្រីវិស័យ និង​ជា​ផែនទី​បង្ហាញផ្លូវ ដោះស្រាយ បំពេញបន្ថែម និង​កែលម្អ ចំណុច​ខ្វះខាត​នានា ដែលមាន​កន្លងមក និង​ដើម្បី​ឈានទៅ​អនុវត្ដ​ទិសដៅ និង​ការងារ​ថ្មីៗ នៅ​បណ្ដា​ឆ្នាំ​ខាងមុខ ជា
​ពិសេស ឆ្នាំ​២០២១ និង​ឆ្នាំ​បន្ត​បន្តា​ប់ ឱ្យសម្រេចបាន​ជោគជ័យ ដ៏​ត្រចះត្រចង់​។​

​ថ្លែង​ទៅកាន់​ពិធី​បើក​សន្និបាត នាឱកាស​នោះ លោក​ទេសរដ្ឋមន្ត្រី បាន​គូសបញ្ជាក់ ពី​សមិទ្ធផល សំខាន់ៗ ក្នុង​វិស័យ​សាធារណការ និង​ដឹកជញ្ជូន ក្នុងនោះ​មាន ការលើកកម្ពស់​គុណភាព​ផ្លូវ ពី​ប្រភេទ​កៅស៊ូ ពីរ​ស្រទាប់​ស្ដើង ទៅជា​បេ​តុ​កៅស៊ូ ការពង្រីក​ផ្លូវ និង​ស្ថាបនា​ផ្លូវ​ថ្មី ការសាងសង់​ផ្លូវ​ល្បឿន​លឿន ស្ពាន ការងារ​ផ្លូវដែក ការងារ​កំពង់ផែ ការងារ​ប្រព័ន្ធ​ចម្រោះ​ទឹក​កខ្វក់ ការងារ​ដឹកជញ្ជូន ការដឹក ជញ្ជូន​សាធារណៈ ការងារ​ដឹកជញ្ជូន តាមផ្លូវ​ទឹក និង​ផ្លូវ​សមុទ្រ ការងារ​សុវត្ថិភាព ចរាចរណ៍​ផ្លូវគោក ការងារ​ដឹកជញ្ជូន លើស​ទម្ងន់​កម្រិត​កំណត់ ការងារ​ភស្តុភា​កម្ម ការងារ​ព័ត៌មានវិទ្យា ការងារ​កំណែទម្រង់​ស្ថាប័ន និង​ការអភិវឌ្ឍ​ធនធានមនុស្ស ការងារ​ច្បាប់ និង​លិខិតបទដ្ឋាន​គតិយុត្តិ​។​

​លោក​ទេសរដ្ឋមន្ត្រី ក៏បាន​ធ្វើ​បច្ចុប្បន្នភាព ជូន​អង្គសន្និបាត អំពី​គម្រោង​ស្ថាបនា​ហេដ្ឋារចនាសម្ព័ន្ធ​ផ្លូវ ចំនួន ៣៨ ខ្សែ នៅក្នុង​ក្រុង​សៀមរាប ខេត្តសៀមរាប (​ថវិកាជាតិ​) គិត​រហូត​មកទល់ពេលនេះ សម្រេចបាន ១១,៦៨% គម្រោង​ស្ថាបនា​ផ្លូវ ចំនួន ១១ ខ្សែ សម្រេចបាន ៣១,១៥% ព្រមទាំង​ការងារ ស្តារ​អូរ ប្រឡាយ​ធម្មជាតិ ចំនួន ៥ ខ្សែ ប្រវែង​សរុប ២៧,៥៤៧ គីឡូម៉ែត្រ សម្រេចបាន ៩៦,៦២% នៅ​ខេត្ត​ព្រះសីហនុ ក្នុង​ក្របខណ្ឌ នៃ​កញ្ចប់​ថវិកា​សន្សំ របស់​ជាតិ គម្រោង​សាងសង់​ផ្លូវ​ល្បឿន​លឿន ពី​រាជធានី​ភ្នំពេញ ទៅដល់​ខេត្ត​ព្រះសីហនុ ក្រោម​លក្ខខណ្ឌ​កិច្ចសន្យា​សាងសង់ -​អាជីវកម្ម – ផ្ទេរ (BOT) សម្រេចបាន ៣១,១៩% គម្រោង​សាងសង់​ស្ពាន ឆ្លងទន្លេ​មេគង្គ (​ក្រូចឆ្មារ​-​ស្ទឹងត្រង់​) ប្រវែង ១.១៣១​ម៉ែត្រ សម្រេចបាន ៩៦,៤៩%​។

​បន្ថែម​ពីលើ​នេះ គម្រោង​សាង់សង់ ផ្លូវជាតិ​លេខ​៣ រាជធានី​ភ្នំពេញ – បែក​គូស (៤ គន្លង​ផ្លូវ​) និង​បែក​គូស -​ខេត្តកំពត ពង្រីក​ដល់ ១២ ម៉ែត្រ សម្រេចបាន ៨៧% គម្រោង​សាងសង់ ផ្លូវជាតិ​លេខ​៥ ព្រែក​ក្តាម​- ក្រុង​ប៉ោយប៉ែត ពង្រីក​ជា ៤ គន្លង​ផ្លូវ ក្នុងនោះ ១-​ព្រែក​ក្តាម​-​ធ្លា​ម្អម ប្រវែង ១៣៥,២៥ គ​.​ម សម្រេចបាន ៣៥,៦២% ២-​បាត់ដំបង​-​សិរីសោភ័ណ ប្រវែង ៨៤,៧៤ គ​.​ម សម្រេចបាន ៨៩,៧៥% និង ៣-​ធ្លា​ម្អម​-​បាត់ដំបង ប្រវែង ១៣៤,២៥ គ​.​ម សម្រេចបាន ២៣,០២% និង
​សិរីសោភ័ណ – ប៉ោយប៉ែត ប្រវែង ៣៤,៤ គ​.​ម កំពុង​ជ្រើសរើស​ក្រុមហ៊ុន ម៉ៅការ​សាងសង់​។

​លោក​ទេសរដ្ឋមន្ត្រី បាន​ជម្រាបជូន អង្គសន្និបាត​ផងដែរ​ថាៈ ក្រសួង​បាន​ទិញ​គ្រឿងចក្រ ចំនួន ២២២ គ្រឿង សម្រាប់​ផ្តល់ជូន មន្ទីរ​សាធារណការ និង​ដឹកជញ្ជូន ២៥ រាជធានី​-​ខេត្ត និង​អគ្គនាយកដ្ឋាន ប្រព័ន្ធ​ចម្រោះ​ទឹក​កខ្វក់ និង​បានទទួល​ជំនួយ ឥត​សំណង ជា​គ្រឿងចក្រ សម្រាប់​កែច្នៃ​គ្រឹះ​ផ្លូវ​ឡើងវិញ (Stabilizer) ចំនួន
១៥ គ្រឿង ពី​រដ្ឋាភិបាល​ជប៉ុន តាមរយៈ​កម្មវិធី​អភិវឌ្ឍន៍​សេដ្ឋកិច្ច និង​សង្គម​របស់​JICA​។​

​ជាមួយគ្នានេះ ក្រសួង​បានទទួល​គ្រឿងចក្រ សម្រាប់​ផលិត​បេតុង​កៅស៊ូ និង​ការងារ​អ៊ុត​កៅស៊ូ ចំនួន ២ ឈុត ចំនួន ១៨ គ្រឿង ពី​ក្រុមហ៊ុន​សំណង់ សៀង​ហៃ (SCG) សម្រាប់​ឆ្នាំ​២០២០ និង​២០២១ ដែល​ក្នុងនោះ រួមមានៈ គ្រឿងចក្រ ផលិត​បេតុង​កៅស៊ូ ដែលមាន​សមត្ថភាព អាច​ផលិត​បេតុង ក្នុង​បរិមាណ ១២០ តោន​/​ម៉ោង ចំនួន​២​គ្រឿង និង​គ្រឿងចក្រ សម្រាប់​ការងារ​អ៊ុត​កៅស៊ូ ចំនួន ១៦ គ្រឿង​៕/V​.mara

ទីតាំងផ្សាយពាណិជ្ជកម្ម

- Advertisment -

Most Popular